Isaya 51 - Bibilia Ilagano Lya Kale 2015

Mihayo ya kūlūngūjiwa Sayuni

¹ Nidegelekagi bing'we abo mukūbūkoobaga būtūngīlīja, abo mukankobaga SEEBA; shilolagi ī shiganga īsho ng'wapūnzwa kūfuma musho, ī lichongo lya mawe īlo ng'wasīmvwa kūfuma mulyo.

² Nolagi ū sīng'we ū Abulahamu, nū Saala ūyo akamubyala. Nguno nang'witana al'iyene dūhū, hūna nūng'wīlūkīla mbango; nūng'wīta kūbiza banhū bingī.

³ Ū SEEBA akwīlūngūja ī Sayūni, akūgachīla shigongo pye a mapandī gayo ayo gakenaagūlwa, a matogolo gaamo a makalamuku akūgagalūcha gabize gītī ngūnda gwa Edeni, a mabbaala ayo gatī na shose shose gakūbiza gītī ngūnda go ng'wa SEEBA. Būyegi na būzalabanu shikwilonga mo, hamò na kūlūmba na malaka ga bīmbi.

⁴ Bing'we banhū bane nidegelekagi, nigwagi bing'we ihanga lyane. Nguno shilagīlo shikūfuma kūlī nene; ū būlamuji wane būkūbiza isana kū mahanga.

⁵ Ū būtūngīlīja wane būliza wangū, wegeelaga, ū būpīji wane būlī mu nzīla. Ū nkono gwane gūkūgasuga a mahanga. A majinga gakūniisagīlwa nene, ū nkono gwane gakūgūlindīīla mu kwisagīlwa.

⁶ Būūchagi a miso ging'we ū kwigūlū, lolagi na hasī ng'wībone ī sī; a mapandī g'igūlū gakūbīta gītī lyochi, ī sī nayo īkūkūlūhala gīkī shizwalwa; na a bikaji baamo bakūshila gītī ngi. Alīyo ū būpīji wane būkūshinga ho būja na būja; nū būtūngīlīja wane būtī wa kūkalīka.

⁷ Bing'we abo muwitegelegije ū būtūngīlīja, abo shilagīlo shane mushidimile mu ng'holò jing'we; lekagi ū kūbogoha ū būsondagīji wa banhū; yaya nūūlū kūdetema kūlwa mashimango gabo.

⁸ Nguno a benabo bakūliiwa fufuuji gītī jikūlyaga myenda; ngino jikūbalya gītī jikūlyaga booya wa ng'holo. Alīyo ū būtūngīlīja wane būkūshinga ho welelo na welelo; ū būpīji wane būkūbiza ho kūlwa shibyalīlwe shose.

⁹ Mishaga, mishaga! Manulaga nguzu jako, Ee nkono go ng'wa SEEBA mishaga gīt'ūmo walī mu shikū ja kale, ū mu shibyalīlwe īsho shabīta kale. Ī gīsī wal'ūtī bebe ūyo ūkalībbutagūla mapingili mapingili Ī lī Lahabu, nī Līshing'weng'we ūlīchima?

¹⁰ Wal'ūtī bebe ūyo ūkīyūmīcha Ī nyanza, ū būjiba bo minzī mashimu, ūbeeja nzīla mu būjiba bo nyanza, gīkī bakīle a bakomoolwa?

¹¹ A bakomoolwa ba ng'wa SEEBA bakūshoka, bakūshikīīla ī Sayuni bakwīmbaga; būyegi wa būja na būja būkūbiza ngikili kū mitwe yabo. Bakwikīīlwa būyegi na kūzalabana kūtaale, ū būpīna nū kūgang'hīla shikūpeela shibīngīle.

¹² Nene, alichene, nene ng'wenekīlī, hū nalī nūngūja wing'we. Ū bebe ūlī nani nose wikale ūkūng'ogohaga munhū ūyo akachaaga, munhū dūhū ūyo atikīlile na maswa?

¹³ Īkī nose ūtūng'wizūkagwa ū SEEBA, ūyo alī Meeja wako, ūyo wagamba a mapandī g'igūlū, nī misingi ya sī wītūūla ho wei! Gwa gwa gwa būlī lūshikū ūkwikalaga ogohaga būkalī wa ng'wiboneeji, ūyo maganiko gakwe galolelile ha būkenaagūji! Ī gīsī ū būkalī wa ng'wiboneeji būlī halī?

¹⁴ Ū ntungwa akūtungūlīlwa wangū, atūchīla mu būtungwa, nūūlū atūgayiwa ī shilīwa.

¹⁵ Ū nene nalī SEEBA Mulungu wako, hū nene nakalibangūlaga nyanza, mahuli gayo galunduma na nguzu; Ī lina lyane nalī SEEBA wa mabità.

¹⁶ Hū nene naakūtūūlīlile ī mihayo yane ū nomo gwako. Hama hū nene naakūfīīkīgije na mbeho ya nengeeji gwa nkono gwane; nene h'ūyo naagatūūla a mapandī g'igūlū aho galī, nū nsingi gwa sī naagūtūūla nene; na a bana Sayuni nakabawīlaga gīkī, “A bing'we mulī banhū bane.”

Ng'halīlo ya būpelanu bo ng'wa SEEBA

¹⁷ Mishaga, mishaga! Ee Yelusalemu, īmīīlaga; bebe ūyo washing'wile ī shikombe sha būpelanu bo g'wa SEEBA kūfuma mu nkono gwakwe, ūshing'wa ī shikoji sha kūdeedeebucha, kūshisha ūgamala pye na a madika.

¹⁸ Ū mu baana pye abo wababyala, atīho nūūlū ūmò wa kūntongeela; ū mu baana pye abo wabalela atīho nūūlū ūmò wa kūndima nkono.

¹⁹ Ū mu mayanga būbīlī wago ayo gaakūgwīlile nani akūkūlūngūja? Kūkenaagūlwa na kūkambagūlwa; nzala na būlūgū! Nani akūlīla hamò nang'ho?

²⁰ A baana bako bakūgwaga mhūngīli, būlī kwene ūko gamanhīgije mayīla ūkūbasanga balambalalile gītī mhalà jigwashiwe mu lūbeto. Ū būpelanu o ng'wa SEEBA būkūbidīkīlaga wabokalīīla; kenako kahamīle ka ng'wa Mulungu wako.

²¹ Alilūūlū, gwigwage ū mhayo ūyū bebe nuhiwa, bebe ūyo ūkikalaga ūkolilwe shikoji, shikoji īsho shitī sha kūng'wiwa.

²² Ū Seeba, ū MULUNGU wako, ū Mulungu ngunīja wa banhū bakwe; alīhaya, “Managa gīkī nakwīngījaga ū mu nkono gwako ī shikombe īsho shalūkūdeedeebuchaga; Ī shikombe sha būpelanu bone shenīsho ūtalashing'wela hangī.

²³ Nakūshitūūla mu nkono gwa baluhya bako, abo bakūwīlaga gīkī, ‘Bandaga hasī tūkūkīlanhye.’ Nang'ho wal'ūzunije gīkī ū ngongo gwako gūgeng'we sī, gūbize gīt'ikūūwa lya kūbītīla.”