Isaya 50 - Bibilia Ilagano Lya Kale 2015

Shibi sha ng'wa Isilaeli na wigwi wa ntūmami

¹ Ū SEEBA alīhaya gīkī, “Īlī halī ī talaka ya ng'wa nining'we īyo nang'winha kūlwa kūbūlaga kaya nang'hwe nūmpeeja? Nūūlū a bing'we naamujinja kūlī nani ūyo nalī n'igasa lyakwe? A bing'we ng'wajinjiwa kūlwa shibi shing'we; ū nining'we akapeejiwa kūlwa nguno ya būkenaagūji wing'we.

² Aho niza nibūlī walī atīho nūūlū ūmò? Aho nitana ni kinehe atigelile nūūlū wa kwidīka? Ū nkono gwane, gūlī nguhī no nose gūtadūgije ū kūmukomoola a bing'we? Natī najo ī nguzu ja kūmupīja? Ū nene nakakamyaga nyanza yakama; nī myongo nakīgalūchaga yabiza sī ng'halamuku, ī shī jaamo jabola kūlwa kūgayiwa minzī, jayūcha kūwa notà.

³ Ī ligūlū nakalīzwīkaga giiti, naalībeegeja myenda ya magūnīla kūbiza shiikundīkīlo shalyo.”

⁴ Ū Seeba MULUNGU waninhile lūlīmi lwa banhū balangile, gīkī nagūmane ū mhayo ūyo gūdūgije kūngunanha munhū ūyo anogile. Būlī gwa akanimishaga dilū, akagūmishaga ū gūtū gwane gīkī gūdegeleke ūmo bakīītīlaga balangwa.

⁵ Ū Seeba MULUNGU wanilugūlile ū gūtū gwane, nane natanemeelile, nūūlū natashokile kū numa.

⁶ Nakabategela ū ngongo gwane abo baanitūlaga; na a babo baanidutūūlaga ndezu nūbalekela ī saya jane, nū būshū wane natabūbisile ū kū wibengelejiwa na kūswīlwa mate.

⁷ Ū Seeba MULUNGU alī ngunanhi wane, nose natīko kūding'wa minala. Hūna lūūlū ū būshū wane būkwikala būdiimu gītī iwe; nīyo namanile gīkī natīko kūgooka.

⁸ Ū ng'olecha wa ng'hana yane alī hihī nū nene. Nani ūyo alī na mhayo gwa kūnibūūla? N'afumīlage hape twibone! Ū ng'wilwisha wane nani? N'aneegeelage aha!

⁹ Ū ngunanhi wane alī Seeba MULUNGU. Nani lūūlū ū wa kūnisola būbi? Pye a benabo bakūkūlūhala gītī shizwalo, bakūliiwa fufuuji.

¹⁰ Alīho nani ū mu bing'we ūyo alī na logohano kūlī SEEBA, ūyo aligwiile ī lilaka lya ntūmami wakwe? Ūyo akashimīzīlaga mu giiti, ūyo atī n'isana, ni alīsanyage ī lina lya ng'wa SEEBA, ansendamīle ū Mulungu wakwe.

¹¹ Alilūūlū, pye a bing'we abo mukabachaga moto, hūna ng'wayūbacha chenge sha kūligima, shimīzīlagi ū mu moto gwing'we, muje mukwitwimīlaga na chenge shing'we īsho ng'wibeegeja. Gwike ū kūfuma ū mu nkono gwane mukwanukūla shiishi: Mukūshilīla hasī mu būluhi.