Isaya 49 - Bibilia Ilagano Lya Kale 2015

Ntūmami o ng'wa SEEBA

¹ Nidegelekagi bing'we majinga, na a bing'we mahanga ga kūle igwagi. Kwandīja aho nataalī mu nda ū SEEBA anitanile. Ī lina lyane walīhaya kūfuma aho nataalī mu gatī ya ng'wa mayū.

² Ū nomo gwane wagūnoola gūbiza gītī lūshū lūūgī; kwīngīīla kale anibisile mu mbeho ya nkono gwakwe, anīītile kūbiza isonga līnoolile lyeela pe, anibisile mu ntana gwakwe.

³ Akaniwīla gīkī, “Ū bebe ūlī ntūmami wane, ū bebe Isilaeli ūyo mulī bebe nakūgūngūhiwa.”

⁴ Alīyo nane nūshosha gīkī, “Naakoyile no, ndūhū nū gwa kūpya; naajimīīgije nguzu jane nakūkoyaga, alīyo ndūhū ū gwa kūsola; gwike ū gwa ng'hana gūlī gīkī, Īyo īnigeleelilwe īlī mu nkono go ng'wa SEEBA, Ī mheela yane īlī kūlī Mulungu wane.”

⁵ Alilūūlū, ī haha ū SEEBA alīyomba, ūyo wanibūmba mu nda ya ng'wa mayū gīkī nabize ntūmami wakwe kūlwa kūnshosha Yakobo kūlī we, na kūbabilinga Baisilaeli kūlī we; nguno ninhilwe ikūjo kū būtongi o ng'wa SEEBA, ū Mulungu wane wabizile nguzu jane.

⁶ Ū ng'wenūyo alīhaya gīkī, “Gūlī mhayo ndo no ī gīkī ū bebe nakwīte kūbiza ntumami wane kūlwa kūgūngūmūla ng'anda ja ng'wa Yakobo, na kūbashosha a ba mu Baisilaeli abo nabalang'hanile nene. Nakūkwīta ūbize isana nū kū mahanga, ū būpīji wane ūbūtang'anhye hose pyī kūshisha kū ngelelo ya sī.”

⁷ Ū SEEBA, ū Nkomooji na Ng'wela wa Isilaeli alīyomba; alīhaya ū kūlī we ūyo adalahilwe, ūyo mahanga gankolilwe, ū ntūmami wa basugi; alīng'wīla gīkī, “Batemi bakūbona bīmīīle, a bataale nabo bakwinama kūlwa nguno ya ng'wa SEEBA, ūyo alī nsanyiwa, ū Ng'wela wa Isilaeli, ūyo akūsolile ū bebe.”

Kūgūngūmūlwa kwa Isilaeli

⁸ Ū SEEBA alīhaya gīkī, “Naakwigwile ng'wikanza īlo līzunīlījiwe, hama nūkūgunanha mu lūshikū lo būpīji; nīyo naakūlang'hanile ū bebe, hama nūkūfunya gīkī ūbize ilagane kūlwa banhū, kūlwa kwīshosha būpya ī sī, na kūbūgaba būpya ū wingīji ūbo walī būkenaagūkile;

⁹ abo balī mu būtungwa kūbawīla gīkī, ‘Fumagi mo,’ na a babo balī mu giiti gīkī, ‘Iyolechagi’. Bakūbiza gītī ng'holo bayūdīīmīla bbihī na nzīla, nū mu magūlya makalamuku gose pye bakūpandīka būdīīmīlo.

¹⁰ Batūtuuba, nūūlū notà batūkolwa; nūūlū lūyaga lūkalamuku lūtūbakoya, pyī nūūlū būsebu wa līīmi būtūboocha. Nguno ū nchīji wabo wa shigongo akūbatongeela, akūbatonga kūja kū ng'hilimvwa ya nzwizī ja minzī.

¹¹ Pyī ī ngūlū jane nakūjigalūcha jibize mapanda; ī nzīla jane ī nhaale jikūbiza ja mu magūlya.

¹² Managi gīkī bakwiza bafumile kūle; bangī bakūfuma sukuma, na bangī ng'weli; na bamò bakwīngīīla sī ya Sinimu.”

¹³ Bing'we mapandī g'igūlū, yoganyagi kūlwa būyegi; bebe sī tūlaga mhūndū. Bing'we ngūlū hīlīīlagi kwīmba! Nguno ū SEEBA wabalūngūgije a banhū bakwe; akūbachīla shigongo a banhū bakwe abo bakūluhiagwa.

¹⁴ Alīyo ū Sayūni akūyombaga gīkī, “Ū SEEBA anilekanīgije ū nene; ū nene wanīība gete ū Seeba.”

¹⁵ Ū nkīma adūgije kūng'wīība ng'wana wakwe ūyo ataalī akong'haga, ūgaya isūngū kūlwa ng'wana wa kūfuma mu nda yakwe? Ū nkīma ū ng'wene adūgije ū kwība ng'hana, alīyo ū nene natīko ū kwība.

¹⁶ Managa gīkī nakwandīkile mu shiganza sha makono gane; nīyo būl'ikanza ū bebe ūlī mu būtongi wane.

¹⁷ A baana bako baliza lwīsī lwīsī bakangīlīgije, alīyo a bakenaagūji bako balīja balīkwīngīla.

¹⁸ Alibūūchaga a miso gako wilalangīje hose hose, pye a bose balibilinga kwiza kūlī bebe. “Ūmo nene nalī mpanga,” SEEBA alīhaya, “Pye a bose ūkūbazwala gītī shizwalo sha ntoolwa.”

¹⁹ Nguno nūūlū īkī walī wakenaagūlwa, ūbiza buyīkī, nī sī yako yūbipiwa, Ī haha lūūlū ūkūbiza ūlī mpine no ū kū banhū bako; hama abo baalī baakūgabanha bakūkūsegenela.

²⁰ A baana abo bakabyalwa ng'wikanza lya būchilwa wako, bakūkūwīla hape gīkī, “Ī lipandī lyenīlī lītūniigelagwa, ipine no nigalīhījage ū nzengo.”

²¹ Nang'ho ūkūyiwila ū mu ng'holò yako gīkī, “Nani shi ūyo wanibyalīlile a baana na wingī aba? Īkī ū nene nachīlwa a baana bane, hangī nīyo nūgwīlwa na būgūmba; hūna nūsaamiwa, nūleng'wa na kūleng'wa. Alilūūlū nani ūyo wabenhile pye a benaba? Ū nene naalī nasaaga iyene dūhū, a benaba baafumile he ī gete?”

²² Ū Seeba MULUNGU alīhaya, “Managa gīkī, nakūgabukīja nkono gwane a mahanga; a banhū nakūbanungīja lūbembeela lwane, hūna bakūbenha a bitūnja bako bababūkije mu shikuba shabo, na a bashīke bako bakūbenha babaseselile kū mabega gabo.

²³ Batemi bakūbiza baaso ba kūkūlela; a bake babo a bagole bakūbiza baanoko baleji bako. Bakwinama kū būtongi wako bachimīgije hasī ū būshu wabo; bakūlamba lūbubu kū mhambala jako. A henaho hūna ūkwitegeleja gīkī ū nene nalī SEEBA; abo banisendamīlile nene batīko kūgooka.”

²⁴ A bashilikale badūgije kūtaagījiwa nding'wa jabo, nūūlū abo bakadimagwa mu būlūgū bashikile kūpījiwa ū mu nkono gwa ndiimi wabo?

²⁵ Alīyo gūūyū ūyo alīgūhaya ū SEEBA: “Na ng'hana nūūlū abo bakadimagwa mu būlūgū bashikile ū kwīnjiwa ū mu makono ga bashilikale; nī nding'wa adūgije kūtaagījiwa ū ndiimi wajo. Gwike ū nene nakwilwisha nabo a bilwisha bako, nakūbapīja a baana bako.

²⁶ A baluhya bako nakūbīīta balye nyama ja mibīlī yabo boi benekīlī; bakūng'wa mininga gabo kūshisha gabakole gītī kūkolwa walwa. Hūna pye a banhū bakwitegeleja gīkī ū nene SEEBA hū nalī Mpīja wako na Nkomoji wako; hū nene wa būdūla bose, nene Mulungu o ng'wa Yakobo.”