Isaya 48 - Bibilia Ilagano Lya Kale 2015

Isilaeli ng'wene nambu no

¹ Bing'we numba ya ng'wa Yakobo, gwigwagi ū mhayo ūyū; bing'we abo mukwitanīlagwa mu lina lya ng'wa Isilaeli, abo mulī ba lūganda lwa Yuda, abo mukilahīlaga mu lina lya ng'wa SEEBA, na mukang'hayaga Mulungu wa Isilaeli alīyo ītī mu būtūngīlīja,

² bing'we abo mukihayaga gīkī mulī bajiga jiga ba mu nzengo ng'wela, na gīkī munsendamīlile Mulungu wa Isilaeli, ūyo lina lyakwe alī SEEBA wa mabità,

³ Ī mihayo īyo yabītile nīhaya nene kwīngīīla kale aho ītaalī kwilonga, ū nomo gwane gwīkumūcha, yūmanīka; Ī haha nīyītile mu kwisanganīja, na ng'hana yamalile kwilonga.

⁴ Kwīngīīla kale ū nene nabūmanile ū būgang'hanazu wako, nī gīkī ī nge ja nhingo yako jibange chūma, nū būshū wako būtikīlile na shaba.

⁵ H'ī nguno yene nakakūwīla Ī yenīyī kwīngīīla kale, nūkūmanīkīja aho ītaalī kwilonga, ū kū būjiwa ūtizūyūhaya gīkī, “Shiikolile shane shībeeja ī yenīyī, bamulungu bane ba mantī na ba chūma sha kūsula bakalagīla yilonga.”

⁶ Ī yenīyī wīyigwa ū bebe, Īlolage pyī ī yose. Ūtūdūla ū kūzunya gīkī h'ūmo īlī? Alilūūlū, kwīngīīla ikanza īlī nalīkūmanīkīja mihayo mipya, mihayo īyo yalī ītaalī ībisilwe, wa'lūtīmanile ū bebe.

⁷ Ī mihayo yene yaseemilwe haha, Ītī ya kale; ūtaalī kwīyigwa kūshisha lelo īyī. Hūna lūūlū ūtūdūla kūyomba gīkī, “Ee ī yenīyī nīmanile na kale!”

⁸ Ū bebe ūtaalī ū kwigwa, nūūlū ū kwitegeleja ūtaalī; ū gūtū gwako h'ūmo gūlī kūfuma kale, gūtaalī ū kūpaanuka. Nīmanile ī nyasala sala yako ū bebe, nī gīkī kwīngīīla ikanza lya kūbyalwa kwako ūmanīkile ūlī na ng'haani.

⁹ Kūlwa lina lyane nakabūhangījaga ū būpelanu wane, kūlw'ikūjo lyane nabūlang'hanile būtizūkwidīkīla, nguno natatogilwe kūkūyagaja.

¹⁰ Ū bebe managa gīkī naakwegije, gwike ītī gīt'ūmo jikeegejiagwa feza; naakūgemile wa kūkūbītya mu moto gwa būluhi.

¹¹ Ū gwenūyū nalīgwīta kūlwa nguno yane, nguno yane nene ng'wenekīlī. Nibūlī nalole dūhū ī lina lyane līlīsosohajiwa? Ī likūjo lyane natūlīlekanīja līje na ūngī.

Kūtungūlwa kwa Isilaeli

¹² Ee Yakobo, nidegelekage, bebe Isilaeli ūyo nakakwitana; ū nene hū nalī ng'wene. Nalī wa kwandya na wa kūmalīja.

¹³ Nkono gwane nene ng'wenekīlī gwagūtūūla ū nsingi gwa sī; ū nkono gwane gwa būlyo hū gwene gwagagoloola a mapandī g'igūlū; nakagitanaga gīmīīla pye a gose.

¹⁴ Ikobyagi pye a bose mudegeleke, shiikolile kī īsho shīhaya ī yenīyī aho ītaalī kwilonga? Ū nsolwa ūyo SEEBA antogilwe hū ng'wene akwīshikīlīja īyo ayīhelile kūlwa sī ya Babuloni, ū nkono gwakwe gūkūbagwīla a Bakalidayo.

¹⁵ Nene ng'wenekīlī nalīhaya, alichene nene naang'witanile. Nang'wenhile nene, akūpyena ū mu nīmo gwakwe.

¹⁶ Negeelagi aha ng'wīyigwe Īyo nalīyīhaya. Kwīngīīla ha wandījo nataalī kūhaya mhayo mu mbisīla. Aho īlandya ī yenīyī, ū nene nalīho. Alilūūlū ī haha, ū Seeba MULUNGU wanitūmile mu nzīla ya ng'wa Moyo wakwe.

¹⁷ Ū SEEBA, ū Nkomoji wako, ū Ng'wela wa Isilaeli, alīhaya gīkī, “Ū nene nalī SEEBA Mulungu wako, hū nene nakakūlangaga ya kūkwinha kwīlūkīlwa, hama hū nene nakakūtongeelaga kūshimīzīla mu nzīla īyo īkwigeleelilwe.”

¹⁸ Ūlū n'ūshidīlīlile ī shilagīlo shane, Ī mhola yako ni ningī no gītī ng'hūūmo gwa mongo, ū būtūngīlīja wako ni būlī na nguzu gītī mahuuli ga nyanza.

¹⁹ A banhū ba būbyile wako ni bingī gītī maseni ga ha nyanza, a babyalwa bako ni babange gītī lūsanga sanga lo hasī. Ī lina lyabo ni lītī lya kūjimangūka, nūūlū kūkenaagūka ū kū būtongi bone.

²⁰ Īngagi ī Babuloni, peelagi mubīngīle a Bakalidayo; īkumūchagi ī yenīyī, hamukagi na būyegi mukwīlomeelaga. Īsambaajagi hose pye kūshisha kū ngelelo ya sī; hayagi gīkī, “Ū SEEBA wankomoolile ū ntūmami wakwe Yakobo.”

²¹ Aho babītaga mu sī ng'halamuku abatongeelile, batakolilwe notà; minzī akagīta gūhūūma kūfuma mu shiganga kūlwa nguno yabo; akatandūla iwe gūpumunhīka minzī kūfuma mo.

²² “Alīyo ītīho ī mhola ū kūlī munhū wa malofu.” Alīhaya SEEBA.