Isaya 46 - Bibilia Ilagano Lya Kale 2015

Bamulungu ba Babuloni

¹ Ū Beli wagwile, ū Nebo winamile; h'ī shiikolile shabo sha kūlamiwa Ī shenīsho. Shikasegejiagwa shibūūchiwe ndimu, shikabūūchiagwa ng'ombe. Ī shiikolile īsho mukashibūūchaga kūshitwala ūko na ūko shenīsho shilī miligo midito ya kūnoja mitugo.

² Shiinamile, shagwile ī shose; shitī na būdūla wa kūpīja, nī shoi shilīsaamiwa shitwalwe mu būsese.

³ Nidegelekagi bing'we ba numba ya ng'wa Yakobo, bing'we bose a ba būshiigo kūfuma mu numba ya ng'wa Isilaeli, abo nene namudima kwīngīīla aho mutaalī mu nda, abo namubūūkije kūfuma kūbyalwa kwing'we.

⁴ Nūūlū kūshisha kū būnamhala, nūūlū ng'wikanza lya nzwīlī jing'we kwela, ū nene hū nalī ng'wene dūhū; hū nene ū nang'hani wing'we. Ū nene nalī meeja wing'we, na nakūmubūūcha; nakūmulang'hana na nakūmupīja.

⁵ Mukūnilenganīja na nani, nūūlū mukūniisaabīla ng'wilika lya ng'wa nani? Nani ūyo mukūniikolanīja kūlī we, gīkī niyikole nang'hwe?

⁶ Balīho banhū abo bakakīmūlaga zahabu mu mifuko yabo, nūūlū kūpima feza ha kapani, hūna bagoodisha nsuji wa zahabu wababeegeje shiikololie sha ng'wa mulungu wabo, bayūshitugīja mazwi na kūshilamya.

⁷ Bakashibūchaga baashisesela kū mabega; bakashikīndīkaga h'ipandī lyasho shīmīīla henaho ilalī. Shitīko kūsegeja kwīnga ho, nūūlū munhū akashilīlīīla shitīko kūng'widīka nūūlū kūnguna mu makoye.

⁸ Bing'we bahūnga yizūkagwi ī yenīyī, Ītūūlagi ū mu maganiko ging'we, ng'wīdimīīle ū mu ng'holò jing'we.

⁹ Yizūkagwi īyo yabīta kale, Ī ya shikū ja kale; ū nene nalī Mulungu, atīho ūngī, nalī Mulungu ū nene, atīho wa kūbiza gītī nene.

¹⁰ Ī ng'halīlo ya mihayo nakīkūmūchaga kūfuma ha mbūkī yayo, īyo īlī kū būtongi nakīhayaga ikanza ilīhu aho ītaalī kwilonga. Nakahayaga, Īyo nīhelile īkwīmīīla, yose īyo nīyiganikile īkūshikīīla.

¹¹ Nakwitana mbeeshi kūfuma kīya; munhū wa kūfuma kū sī ya kūle akūshikīlīja ūmo nahelile nene. Īyo nīhayile nakwīshikīlīja, Īyo nīhelile nakwīyīta.

¹² Bing'we ba ng'holò ngang'hanazu, abo mulī kūle na būtūngīlīja, nidegelekagi.

¹³ Ū būtūngīlīja wane nalīwenha, nīyo būtī kūle; hama ū būpīji wane būtūdīīla ū kūshika. Nakūtūūūla būpīji ū mu Sayuni, ī likījo lyane lībize mu Isilaeli.