Isaya 40 - Bibilia Ilagano Lya Kale 2015

Banhū kūtimbiwa moyo

¹ Batimbyagi moyo, batimbyagi moyo a banhū bane, alīhaya ū Mulungu wing'we.

² Lūngalūngagi nayo ī Yelusalemu ng'wilaka ikoonu, habūlagi n'ilaka lya higūlya ng'wīwīle gīkī, ū būtūmami wayo wa nyasese washikile ha ngelelo, ī shibi shayo shalekejiwe; na gīkī yanukūlile kūfuma mu nkono go ng'wa SEEBA nsango gwa būdito wa ng'hangala ibīlī kūlwa shibi shayo.

³ Ilaka lya munhū akūhamukaga, “Beeja beejagi nzīla ya ng'wa SEEBA ng'witogolo ikalamuku, goloolagi ikūūwa lya ng'wa Mulungu wise.

⁴ Būlī longa lūkūgūngūhiwa, Ī ngūlū jikūtubījiwa, nī migūngūli ī yose; Ī sī ījo jitī nenganīzu jikūsheeshiwa, na a matogolo ga magagala gakūlenganījiwa.

⁵ Hūna ī likūjo lya ng'wa SEEBA līkoolechiwa hape, pye a banhū bakūlībona ng'wikanza līmò. Nguno nomo go ng'wa SEEBA h'ūyo gwahayaga.”

⁶ Ilaka līkūhamuka lyūhaya gīkī, “Hamukaga mhayo!” Nane nūhaya, “Nahamuke mhayo kī?” “Pyī ī mibīlī īlī gītī maswa, nī likūjo lyayo ī lyose līlī gītī lya bonji bo mu matogolo.

⁷ A maswa gakanyaalaga, nū bonji būkalagalaga, kūlwa kūfuulagūlwa na myūyī ya ng'wa SEEBA; na ng'hana a banhū babange maswa.

⁸ A maswa gakanyaalaga, nū bonji būkalagalaga, alīyo ū mhayo go ng'wa Mulungu wise gūlī gwa kūshinga ho welelo bose.”

⁹ Bebe ng'wenhi wa ng'hūlū jawiza mu Sayuni, linhaga kwigūlya ya lūgūlū lūlīhu; bebe ng'wenhi wa ng'hūlū jawiza mu Yelusalemu, hamukaga ūlomeele n'ilaka lya kūhabūla, hamukaga yaya ū kogoha; ī mizengo ya Būyudaya īwīlage gīkī, “Nolagi ū Mulungu wing'we.”

¹⁰ Managi gīkī ū Seeba MULUNGU izile na būdūla būtaale; hama ū nkono gwakwe gwa būdūla gūkūsuga kūlwa nguno yakwe. Managi nī linong'ho lyakwe alī nalyo, nī mheela yakwe ayītongegije.

¹¹ Akūlīdīīma ī lidaale lyakwe gītī ndīīmi wa ng'holo; a baana ba ng'holo akūyūbabilinga na nkono gwakwe wabakumbatīla ha shikuba shakwe; Ījo jilī na baana akūyūjiswaaga na būlyehu.

¹² Nani ūyo wabīta kūgeleka minzī ga manyanza mu shiganza sha nkono gwakwe, nūūlū kūlenganīja būgalī galī wi'gūlū mu kūtūmamīla būlīhu bo nkono gwakwe? Nani wabīta kūkumbanīja lūbuubu lwa sī yose ng'witangwa, nūūlū kūlola būdito wa ngūlū nhaale na ndo ha gapani nūūlū mu shiseme sha kūpimīla?

¹³ Nani ūyo ang'witegelegije ū Moyo o ng'wa SEEBA, nūūlū nani ū nganikīji wakwe ūyo akantonga?

¹⁴ Ū SEEBA akang'wibūūlīla nani gīkī anange masala? Nani akananga ī nzīla ya kalamulīle kasūlūzu? Nani ūyo akananga būmani, nūūlū kūng'olekeja nzīla ya witegeleja?

¹⁵ Alīyo ū gwa ng'hana gūlī gīkī, a mahanga ga banhū gatikīlile n'imote lya minzī mu ndono, a ha kapani mabbūūpu no gītī lūbuubu dūhū; na a majinga akagahwehulaga gītī lūbuubu lūnogu.

¹⁶ Ī lipoolu lya Lebanoni lītigeleelwa nūūlū kūbiza ng'hwi ja kūpemba, nūūlū ī ndimu jaamo jitūdūla ū kwigeleelwa ū kū nīmo gwa shitambò sha kūpemvwa.

¹⁷ Ū kūlī wei a mahanga pye a gose gatikīlile na kūdūhū, agabalile gatī na mpango nūūlū hado, hambū hambū na dalali.

¹⁸ Ī gīsī lūūlū, ū Mulungu mukūnenganīja na nani? Nūūlū mukūng'wikolanīja na shiikolile kī?

¹⁹ Ī shiikolile shikasulagwa na koolī, hūna nsuji wa shikolo sha zahabu washibila zahabu, hama washibeegeja migufu ya feza.

²⁰ Ū munhū ng'habī ūyo atūdūla kūshipandīka ī shenīsho akasolaga ntī ndiimu, gūtabolaga. Hūna wakooba koolī wa kūbeeja shikolo ameegeje shiikolile Īsho shidūgije kwīmīīla.

²¹ Bing'we, mutamanile shi? Mūtaalī ū kwigwa? Mutīnawīlwa kūfuma ha wandījo? Mutaalī dūhū ū kwitegeleja kūfuma aho sī yaseemelwa?

²² Ū wei alī higūlya ya sī yose, igashije h'isumbī lyakwe lya būtemi, ū kūlī we a bikaji ba mu sī babange gītī ng'hūmbī. Hū ng'wene wagamba a mapandī g'igūlū gītī ngeka, ūgagoloola gīt'iheema lya kwikala mo.

²³ Hū ng'wene akabīītaga bataale ba sī babiza sumvwa na ndūhū, na a basugi ba mu sī akabīītaga kūbiza batī na ngofyoolo.

²⁴ Na ng'hana a benabo bakahambagwa gītī mbīyū, bakabībagwa, nī miji bakachimīkaga a hasī, alīyo lītakūlaga ī likanza; akabafuulaga haho na haho, nshūūlūlū gūkabaheheejaga gūbatwalile gītī meela.

²⁵ “Mukūnilenganīja na nani? Nūūlū nani ūyo alī ng'wilika lyane?” Alīhaya ū Ng'wela.

²⁶ Alibūūchagi a miso ging'we ū kwigūlya mulole, nani ūyo washiseema pyī ī shenīshi? Alī wei, ūyo akagenhaga a mabità ga sonda, būlī lyene heeke heeke; hū ng'wene ūyo akajitanaga būlī yene na lina lyayo. Kūlwa būdūla wakwe būtaale, na wingī wa nguzu jakwe, nūūlū īmò ītīko kūleka kūbiza ho.

²⁷ Bebe Yakobo, nibūlī ūkūyombaga gīko? Ee Isilaeli, ni ginehe ūkūlīlaga ūhaya, “Ī nzīla yane ījimīīlīkanile ū kūlī SEEBA; nū būgunanhwa ūbo būniigeleelilwe ū nene abūdalahile ū Mulungu wane?

²⁸ Bebe, ūtamanile shi? Ūtaalī ū kwigwa? Ū SEEBA hū ng'wene ū Mulungu wa welelo bose, hū wei ū Nseemi wa mapandī goose ga sī. Ū We atī na kūgwa wesa, hangī atanogaga yaya; ū būmani bokwe atīho wa kūwitegeleja.

²⁹ Akabinhaga būdūla a baseedeeku, na a bagokolo akabongejaga ī nguzu.

³⁰ Nguno nūūlū a badinha bakanogaga na kūseedeeka, a baalūki nabo bakipamaga na kūgwa;

³¹ alīyo abo bansanije ū SEEBA bakūpandīka nguzu mhya. Bakūlala binunge ng'wigulya na manana gītī ng'hoonà. Bakūpeela, alīyo ū kūseedeeka yaya, bakūshimīza, alīyo yaya ū kūgwa wesa.”