Isaya 4 - Bibilia Ilagano Lya Kale 2015

¹ Ū mu lūshikū lwenūlo bakīma mpungatī bakūng'wibbūpa ngosha ūmò; bakūng'haja bang'wīle gīkī, “A bise tūkūlya shilīwa shishe, nī shizwalo tūkūzwala shise benekīlī; ū bebe zunyaga dūhū twītanīlwe kū lina lyako. Twīnjage ū mu wibengelejiwa wise!”

² Hama hangī ū mu lūshikū lwenūlo, ū Nzwano go ng'wa SEEBA gūkūbeelela no, na gūkūbiza n'ikūjo itaale. Hūna a matwajo ga sī gakūbiza shingilima n'ikūjo ū kū Baisilaeli abo bakūpūlūgūka.

³ Būlī ng'wene ūyo ūlekeelwa ī Sayuni, ūyo wikala mu Yelusalemu, akwitanwa ng'wela, ose ose ūyo andīkilwe kūpīla ū mu Yelusalemu.

⁴ Ū SEEBA akūbīngīja ū būsoso wabo a bakīma ba Sayūni; akwīyeeja ī Yelusalemu mu kūtūmamīla Moyo wa būlamuji na Moyo wa moto, īkwela pe yīnge ū mu būsoso wa mininga gayo.

⁵ Hūna a higūlya ya bose abo bakwibilinga ha lūgūlū lwa Sayūni ū lose, ū SEEBA akūbeeja ilunde lya lyochi kūlwa kūbalang'hana ng'wikanza lya līīmi, na moto gwa kwenha būpe kūlwa makanza ga būjikū; a higūlya y'ikūjo ī lyose līkwīma ho ifīkījo.

⁶ Līkūbiza lya kūtūūla mbeho ng'wikanza lya līīmi isebu, na būpīlīlo mu makanza ga mbula na ga nyaga.