Isaya 35 - Bibilia Ilagano Lya Kale 2015

Būyegi wa bakomoolwa

¹ Ī litogolo ī likalamuku līkūyega, pyī nī sī īyo ītatūlagwa mbulà; nī sī īyo batikalaga mo banhū īkūzalabana na kūtaamuka būlabo būsoga kūlola;

² Īkookala bonji pye a hose, Īkūyega no īyūtūla na mhūndū kūlwa būyegi būtaale. Ī likūjo lya Lebanoni īkwinhwa yoi, nū wiza bo lūgūlū lwa Kalimeli, pyī nū wa mbūga ya Shaloni. Bakūlībona ī līkūjo lya ng'wa SEEBA, Ī likūjo lya ng'wa Mulungu wise.

³ Gaguzuhyagi a makono a manogoleku, na a mazwi ayo gayogomile mugahandīkīje.

⁴ A ba ng'holò ng'haahūku bawīlagi, “Lekagi ū kogoha, timbyagi ng'holò! Managi gīkī ū Mulungu wing'we akwiza na shiilī yakwe, na shilīpīlo sha ng'wa Mulungu; akwiza kūmupīja a bing'we.”

⁵ Hūna lūūlū a miso ga babboku gakūlolechiwa, na a matū ga baagulu gakūlugūlwa.

⁶ Hama a balema bakūbiza na būdūla bo kwizwanuka gītī saala, nī ndīmi ja bashitayomba jikūyūtūla mhūndū kūlwa būyegi. Nguno ū mu sī īyo batikalaga mo banhū gakūpumūka mo minzī mingī, nū ng'witogolo ikalamuku jikūdūlūka mo njonga ja kūsela minzī.

⁷ Ī sī ja mabuushī makalamuku jikūgalūka kūbiza malambo ga minzī; nū mu sī ja notà jikūdūlūka mo nzwīlo ja minzī. Ū mu mapandī ayo nyamhawa jalī jishekije būhooyelo gakūzwa mo maswa, na madete na malūtende.

⁸ Hama īkūchibūka na nzīla nhaale, Īyo īkūyitanwa Nzīla Neela. A basoso batūshimīzīla mo, Īkūbiza ya banhū abo bigeleelilwe kūbīta ū mu Nzīla yenīyo, a babbūūlī a ba malofu batī ba kwībītīla na hado yaya.

⁹ Ītūbiza mo shimba, nūūlū shiinū yose yose ng'henaagūji ītīko kūpanda mo; Ī jenījo jitalabiza mo na hado yaya, alīyo a bakomoolwa hū bakūbītīla ng'wenūmo.

¹⁰ A bakomoolwa ba ng'wa SEEBA bakūshoka, bakūshikīīla ī Sayuni bakwīmbaga; būyegi wa būja na būja būkūbiza ngikili kū mitwe yabo. Bakwikīīlwa būyegi na kūzalabana kūtaale, ū būpīna nū kūgang'hīla shikūpeela shibīngīle.