Isaya 34 - Bibilia Ilagano Lya Kale 2015

Nsango kū banhū ba mahanga

¹ Egeelagi mudegeleke bing'we mahanga, Tegagi matū bing'we banhū! Nī sī nayo yigwe, nī shose īsho shilī muyo; nī shiseeng'wa shose ī shitī sha mu sī!

² Ū SEEBA agapelanīlile pye a mahanga, alī na būpelanu būtaale no ū kū mabità gabo. Akūbakenaagūla bashile ho gete, akūbafunya baje kūjūsīnzwa.

³ A banhū babo ūlū babūlagwa bakūyūponyiwa hanze sagala, ū būnung'hu wa mibimba yabo būkūsambaala pye a hose; ī ngūlū jikūloba mininga gabo.

⁴ Pye a mabità ga shiseeng'wa sha kwigūlū gakwaabiwa, nī ligūlū līkūpaligwa gītī shilago; Ī libità lya sonda ī jose līkūgwa, ūmo gakalagalīlaga madūūtū ga mizabibu ūlū galīnyaala, nūūlū gītī madūūtū ga ntini ūlū ganyaalile.

⁵ Nguno ī līlūshū lyane lyang'wile sha ng'wigūlū lyūfula, ī haha lūūlū managi gīkī līlika Edomu kwenha nsango, kū banhū abo nabazumile.

⁶ Ī līlūshū lya ng'wa SEEBA lyalalūkījaga za mininga, lyajimaga masasu, līkūtoonaga mininga ga baana ba ng'holo na ba mbūli; na mazezele ga kūfuma mu mhīgo ja ng'ondi. Nguno ū SEEBA alī na nīmo gwa shitambò mu Bozila, alī na būsīnzi būtaale ū mu sī ya Edomu.

⁷ Ī mbogo ja mu bū, jikūgwa hamò nabo, ī songi pyī nī shadiima; Ī mbūga jabo jikūjima mininga, ū lūbuubu nalo lūkūzeema zeema maguta ga masazu.

⁸ Nguno ū SEEBA alī na lūshikū lwa kūmala shiilī, ng'waka gwa shilīpīlo, kūlwa kwīgunīja ī Sayūni.

⁹ Ī myongo ya mu Edomu īkūgalūka kūbiza laami, ū lūbubu lwamo lūkūbiza būgota wa shibiliti; hūna lūūlū ī sī yenīyo īkūbiza laami īkūligimaga moto,

¹⁰ gūtī gwa kūjima līīmi na būjikū; Ī lyochi lyago līkwinunga ng'wigūlya būja na būja. Ī sī yenīyo īkwikala dalali myaka ya shibyalīlwe na shibyalīlwe; atalilonga munhū wa kūbīta mo hangī.

¹¹ Īkūbiza sī ya mafungwe na manūngū, jikūyikala mo ging'hi na makūngūūlū; ū Mulungu akūbītya mo lūgoye lwakwe īzwangane, n'igoloolelo lyakwe īkenaagūke.

¹² A basugi bayo bakūgayiwa ī sha kwitanwa gīkī būtemi ū wenūbo, nīyo pye a bataale baamo batūbalwa gīkī nabo balī shikolo.

¹³ Ū mu numba jaamo ī j'ikūlū gakūzwa mo ming'hwa; ū mu mapandī gaamo a ga kūbūngīlà gakūzwa mo malūbambe na masanzu, būkūbiza būhoyelo wa nyamhawa na wikalo wa ging'hi.

¹⁴ Shiinū ja mu masaka jikūyikobya moi, būyaga na mbiti; ngūlūgūlū jikūyūdīīla ng'wenūmo jikwilīlīīlaga, nī noni ja būjikū jikūpandīka wifuulīlo kwenūko.

¹⁵ Ī ging'hi īkūbeegeja chanjo ng'wenūmo īteele magī gayo, īkūgabundaalīla īgomeje makune, na kūyūgabandīla mu manana gayo; nī lūbalà jikūyikala ng'wenūmo, būlī yene na nichaayo.

¹⁶ Lolagi ū mu shitabo sha ng'wa SEEBA musome, nūūlū shimò shitūgaya ū mu shenīshi, nīyo būlī shene shikūbiza na nichaajo; nguno īlagīlilwe chene na nomo go ng'wa SEEBA; hama ū Moyo wakwe h'ūyo akūshikuminga.

¹⁷ H'ūmo ashigabīlile ū mu kagabanhīgīje kakwe, hūna ūshisambaaja kūlenganīla na kahelele ka nkono gwakwe; būlī shene shisuge ipandī lyasho welelo bose, shiikale henaho kūshisha shibyalīlwe na shibyalīlwe.