Isaya 27 - Bibilia Ilagano Lya Kale 2015

Isilaeli kūpījiwa

¹ Ū mu lūshikū lwenulo ū SEEBA akūlūbūūcha ū lūshū lwakwe; lūshū lūtaale, hangī lūūgī na lwa nguzu. Akūlūtūmamīla kūlinha nsango ī Līlewiasani, ī liyoka lya kūlala; Ī Līlewiasani, ī liyoka lya wilinge linge. Akūlībūlaga ī Līshing'weng'we lya mu nyanza lyenīlo.

² Ū mu lūshikū lwenūlo, “Gwīmbīlagi lyīmbo ū ngunda gwawiza ū gwa mizabibu:

³ Nene SEEBA, hū nalī nang'hani wago, na a minzī nakagwisīīlaga nene būlī gwa. Hama nagūlang'hanile chiza līīmi na būjikū, atizilonga wa kūgūkenaagūla.

⁴ Nīyo ī haha natī na būpelanu. Numho ūlū banishi kwiza kūnisakamīla, gītī ming'hwa nūūlū masanzu! A bene hū nakwilwisha būlūgū nabo, nabakūbīkīīle moto pye a bose.

⁵ Ūlū ītī chene ni bizage kūkooba ha kūbūngīlà, ni bizage tūbeeje mhola a ha gatī yabo nū nene.”

⁶ Ū mushikū ja kū būtongi ū Yakobo akūkoma miji, ū Isilaleli akūtūlīka būlabo hama būkūtaamuka, hūna akwīyokaja matwajo ī sī.

⁷ Ī gīsī, ū SEEBA wantūlile ū Isilaeli ūmo akabatūlīla abo bakantūla ū wei? A banhū bakwe baabūlagilwe gīt'ūmo bakabūlagīlwa abo baalī bababūlaga a banhū bakwe?

⁸ Akang'winha nsango gwa kūng'wigeleelwa, ūmpeeja bo kūng'heheeja na nyaga gwa nguzu, gītī mu shikū ja nyaga gwa nguzu gwa kūfuma kīya.

⁹ Hūna lūūlū, ū būkenaagūji bo ng'wa Yakobo būkūlekejiwa, hama a matwajo mashikanu ga koolecha kwīnjiwa kwa shibi shakwe gakūbiza gīkī, pye a mawe ga ha myalīlo agapondagūle gatobagūke gabize gītī swakala, ng'hīngī ja ng'wa Ashela jitizūlekeelwa jīmīīlile, nūūlū ng'walīlo gwa kūzuukīlīgīja būbbani yaya.

¹⁰ Ī chene ū nzengo gūlī na ndugu ya kūgūlang'hana, alīyo ī haha gwitebekile gūlī buyīkī, ipandī lya misaka yike, gītī itogolo lītī na shose shose. Lyabizile idīīmīlo lya ndama, h'ūmo jilīyūdīīla jitūūgije, jikūhūlūlaga madūūtū ga matambī.

¹¹ A matambī ūlū gūūma gakūbbutagwa, bakīma biza kūseenha ng'hwi ja kūpemba mu moto. Hūna lūūlū īkī a banhū benaba batī na witegeleja, ū Meeja wabo atūbachīla shigongo, ū Nsūmbi wabo atūbasaatwa.

¹² Nīyo ū mu lūshikū lwenūlo, ū SEEBA akūgatinginya pye a mabbaala kwandīja kū mongo gwa Fulati kūshisha kū mongo gwa Misili; hūna a bing'we Baisilaeli mūkūkobiwa ūmò ūmò mubilingwe pye a bose.

¹³ Hama ū mu lūshikū lwenūlo, īkung'ang'aajiwa nhaaninga; hūna abo baalī baajimīīlīla mu sī ya Ashulu, na a babo baalī baponyiwa mu sī ya Misili bakwiza ī Yelusalemu kūnamya ū SEEBA, ū mu lūgūlū lwela.