Isaya 26 - Bibilia Ilagano Lya Kale 2015

Lyīmbo lya kūkumīlīja

¹ Ū mu lūshikū lwenūlo ī lyīmbo īlī līkwīmba ū mu sī ya Yuda: Ū nzengo gwise gūlī nzengo gwa nguzu, ū Mulungu alagīlile būpīji būbize h'ī ndugu na lūgūtū kūlwa kūgūlang'hana.

² Īlugūlagi ī mibita lingīle ī lihanga Ī litūngīlīja, ī lihanga īlo līlī mu kūzunya.

³ Ū munhū wa maganiko galembeelile kūlwa kūkusanya bebe, ūkūnang'hana ikale mu mhola īshikanile.

⁴ Nsanyagi ū SEEBA welelo bose, nguno ū SEEBA MULUNGU hū ng'wene ūyo alī Shiganga sha welelo na welelo.

⁵ A bigūngūhya mu kikalīle kabo akabadohelejaga; nūūlū nzengo ūlū ngwigūngūhya akagūgwishaga wagūtobagūlīla hasī, na kūgūjimīīgīja mu lūbuubu.

⁶ Jikūyūpandagīla ho mhambala, nīyo hangī mhambala ja bakunese; na baluhi ba baluhi bakūbīta hoi bakūgaadūūkaga.

⁷ Ī nzīla ya ntūngīlīja īlenganīlile, Ee, bebe Uyo ūlī wa nzīla ja wīmà, ī nzīla ya ntūngīlīja ūkīlenganījaga bebe.

⁸ Alichene, Ee SEEBA, a bise tūkūlindīīlile bebe tūkūshimīzīlaga mu nzīla ya kalamulīle kako; Ī ng'humbū ja būpanga wise jilī ha lina lyako na lūkumo lwako.

⁹ Ū būpanga wane būkakūkūmbūlaga no ū mu makanza ga būjikū, nī dilū ī ng'hūmbū ja moyo gwane jilī ha kūkūkooba bebe. Nguno a kalamulīle kako ūlū kalīmo ū mu sī, a ba mu sī bakwilanga būtūngīlīja.

¹⁰ Ī shigongo nūūlū shikoolechiwa ha ng'wape ū kū banhū babūbi, a boi batilangaga ū būtūngīlīja, nguno nūūlū mu sī ya wīmà, bakīītaga ya malofu dūhū, batalīdīlīlaga ī likūjo lya ng'wa SEEBA.

¹¹ Ee SEEBA, ū nkono gwako ūgūnungije higūlya, alīyo batūgūbonaga; boolekejage ū wilu wako babūbone, ūbo ūlīnabo kūlwa nguno ya banhū bako, bading'we soni. Ī gete ni gūbagabbulage ū moto ūyo gūbīkilwe kūlwa banishi bako.

¹² Ee SEEBA, bebe h'ūyo ūkatūbeegejaga mhola, shose shose īsho tūkashibeejaga, bebe h'ūyo ūkatwītīlaga.

¹³ Ee SEEBA Mulungu wise; twabīta kūbiza ha sīlīlī ya baseeba bangī kūleka ū bebe, alīyo tūlīkūgije lina lyako dūhū.

¹⁴ A benabo bachile ī haha, batī bapanga hangī; ī yenīyo myoyo yamala kwīnga, Ītalagūngūmūka. Ūkabinha nsango ūbaponya mu būkenaagūku, ūbīnja ho gete, hama ītīho nzīla ya kūbizūkwa.

¹⁵ Ee SEEBA, walyongegije ī lihanga; alichene, na ng'hana walyongegije ī lihanga, wiyenhelile ikūjo bebe ng'wenekīlī; ī mbīmbī ja sī wajigalīhije pyī ī jose.

¹⁶ Ee SEEBA, baagwile mu makoye hū biza bakūkūkoobaga, a kahūgūlīle kako kakabaminya būmana na kūyūlomba.

¹⁷ Ū nkīma ūyo alī nda ūmo akagalagalīlaga na kūlīla, kūlwa kūlung'wa būsūngū ng'wikanza lya kūbyala, h'ūmo twalī na a bise ū kū būtongi wako, Ee SEEBA.

¹⁸ Na a bise twalī nda, twalījiagwa būsūngū, alīyo aho twabyala, lūyaga dūhū. Tūtenhile būpīji ū mu sī, nūūlū bikaji ba mu sī batabyalilwe.

¹⁹ Alīyo a bafu bako bakūbiza bapanga hangī, ī mibīlī yabo īkūjūka. Bing'we abo wikalo wing'we būlī mu lūbuubu, mishagi mutūle mhūndū kūlwa būyegi. Ū lūme lwako lūlī gītī lūme lwa dilū, nīyo ī sī īkūbafunya a bafu abo balī muyo.

²⁰ Bing'we banhū bane, jagi mukingīle būlī ng'wene mu chumba shakwe; hama ūlū ng'wingīla mulugale ī milyango; ibisagi ikanza ido kūshisha ū būpelanu bokwe būbite.

²¹ Managa gīkī ū SEEBA izile kūfuma mu wikalo wakwe, akwiza abinhe nsango a banhū ba mu sī, kūlwa nguno ya shibi shabo. Ī sī nayo īkūgafunīja hape a mininga ayo gitwa higūlya yayo, Ītikala ībabisile a banhū bayo abo baabūlagwa.