Isaya 2 - Bibilia Ilagano Lya Kale 2015

Lūgūlū lwa ng'wa SEEBA

¹ Ū Isaya ng'wana Amozi akagūbona ū mhayo ūyū, kūlwa nguno ya sī ya Yuda na nzengo gwa Yelusalemu.

² Ū mu shikū ja kū būkalīkījo, ū lūgūlū lwa hekalu ya ng'wa SEEBA lūkwinhwa nguzu na kūgūngūhiwa higūlya ya ngūlū jose nhaale na ndo. Hūna a mahanga gose gakūhūūma gajile ūko lūlī.

³ Banhū bingī bakwiza bakwiwīlaga, Nzūgi tūje ū kū lūgūlū lwa ng'wa SEEBA, ū kū numba ya ng'wa Mulungu o ng'wa Yakobo. Hū wei akūtūlanga ī nzīla jakwe, nise tūdūle ū kūshimīzīla ū mu kajīle kakwe. Nguno ī shilagīlo shikwilonga kūfuma Sayūni, ū mhayo go ng'wa SEEBA gūkūfuma Yelusalemu.

⁴ Wei ng'wenekīlī akūgalamula a mahanga na akūbahūgūla banhū bingī mu wilemeelwa wabo; Ī shū jabo ja būlūgū bakūjipondagūla basule magembe, na a machimu gabo bagasule mihoolo. Lītūbizaho ihanga lya kūbūūcha shilanga kūlwa kwilwisha būlūgū n'ihanga līngī; na batilanga mihayo ya būlūgū hangī.

⁵ Bing'we numba ya ng'wa Yakobo, tūshimīzīlagi ng'wisana lya ng'wa SEEBA.

Lūshikū lwa ng'wa SEEBA

⁶ Ū bebe wabalekanīgije a banhū bako, ī numba ya ng'wa Yakobo. Nguno ya kūlondeela shīmīle sha banhū ba sī ja Kīya, nīyo balīyūtūmamīla na būchūja gītī Bafilisiti, hangī bakwidimaga makono na banhū ba mahanga ayo gatakūmanile.

⁷ Balī na feza na zahabu ningī no ū mu sī yabo, ū wibīkīja wabo wa sabo būtī wa kūmala na hado yaya. Nīyo ī sī yabo yokalile pa falasa, na magogoteni ga būlūgū mingī gatī na būbalīle.

⁸ Ī sī yabo īlī na mashiikolile mingī ga kūlamiwa, bakinamaga kū būtongi wa shikolo sha kūbeeja na makono gabo benekīlī, īsho bakabeejaga na nzwaala jabo.

⁹ Alilūūlū, ū munhū akūdohelejiwa, pye a banhū bakūdalahwa; yaya gete ū kūbalekeja.

¹⁰ Būngīlàgi mu mapilinga, isweng'hagi mu myobo mulīpeele ī lyogohya lya ng'wa SEEBA, nī likūjo lya magaka gakwe.

¹¹ A kalolele ka munhū ndooshi kakūdohelejiwa, nū wikumīlīja wa banhū būkūdalahwa. Hūna ū mu lūshikū lwenūlo SEEBA dūhū hū ng'wene akūgūngūhiwa.

¹² Ū SEEBA wa mabità abīkile lūshikū kūlwa bikumīlīja bose na a bigūngūhya; na kūlwa shose īsho shikigūngūhyaga, pye shikwichiwa ha sīlīlī,

¹³ pyī ī mikoola ya Lebanoni, h'ūmo īlīhīle na kūhama, nī mitūndū ya Bashani yose pye;

¹⁴ na kūlwa ngūlū ī ndīhu pyī ī jose, pyī jose ī ndo nī nhaale,

¹⁵ nī numba ndīhu ja bashilikale; na būlī ndugu īyo īlī na ng'hambī ja kūpīlīla,

¹⁶ pyī nī meli ī jose ī ja basūlūja, nī shikolo sha būlenji pyī ī shose.

¹⁷ Ū būdoshi wa munhū būkwīnjiwa, nū wikumilīja wa banhū būkwichiwa hasī, ū mu lūshikū lwenūlo SEEBA we wike akūgūngūhiwa.

¹⁸ Hūna pyī ī shiikolile sha kūlamiwa shikūgaya gete.

¹⁹ A banhū bakūyūpeelela mu mapilinga ga mawe na mu myobo ya hasī, kūlwa lyogohya lya ng'wa SEEBA n'ikūjo lya magaka gakwe; nguno akwīmīīla ayīdetemye ī sī.

²⁰ Ū mu lūshikū lwenūlo a banhū bakūshiponanja kū ngoso na tūnge, ī shiikolile shabo sha kūlamiwa Ī sha feza na zahabu.

²¹ Bakūyūpeelela mu mapilinga ga shiganga na mu mahalo ga mawe, kūlwa lyogohya lya ng'wa SEEBA n'ikūjo lya magaka gakwe; nguno akwīmīīla ayīdetemyī ī sī.

²² Lekagi ū kūnsanya ū munhū ūyo myūyī yakwe īkafumaga mu mūūlū; ū ng'wenūyo nang'hwe alī na kī?