Biblia Todo Logo
Bìoball air-loidhne

- Sanasan -

Isaya 19 - Bibilia Ilagano Lya Kale 2015


Būhangi wa kūkenaagūlwa Misili

1 Mhayo kūlwa nsango kū sī ya Misili: Ū SEEBA igashije h'ilunde ipeeji izile Misili; a bamulungu ba kwigīmbīja ba mu Misili bakūdetema ū kū būtongi wakwe. Nū mu ng'holò jabo a Bamisili bakūbbaha.

2 A Bamisili nakūbalwisanya bilemeelwe boi na boi, bayikenya būlī munhū na ng'wanong'wawe, nzenganwa na nzenganwa ng'wiye; nzengo nago na nzengo ng'wichaago, ū būtemi nabo na būtemi wiye.

3 A Bamisili bakūgwa ng'holò, Īyo bakwīhelaga nakūbakenaagūja; bakūyūbūūja kū bamulungu babo ba kwigīmbīja, na kū myoyo ya bafu; bakūyūbabūūja na bachūja, hamò na a balagūji babo.

4 Nīyo a Bamisili nakūbatūūla mu makono ga basugi biboneeji; ū ntemi wa kūbasuga akūbiza nkalī, alīhaya SEEBA wa mabità.

5 Ū mongo gwa Nile gūkūkama a minzī, a hasī hūūme kūlū kūlū.

6 Ī migoka ya minzī īkūyūnung'ha, Ī myongo ya Misili ī mido mido īkūmala a minzī yūūme kūlū kūlū. A madete na a malūtende gakunyaala pye a gose,

7 pyī īsho shizwilwe kū ng'hilimvwa ya mongo gwa Nile shikūūma, nūūlū shibize shilī ū kū nomo gwa mongo gwenūyo. Shose shose īsho shikalīmagwa kū ng'hilimvwa ya mongo shikūūma, shikūheheejiwa nyaga shigaye gete.

8 A bategi ba ndīlo bakūlīla na kūgang'hīla, pye abo bakalobagà na malobo ū mu mongo gwa Nile bakūzwangana no.

9 A ba milīmo ya kūkobola būlūba mu migūnda bakūzwangana, na a babeeja ba myenda misoga bakūgwa ng'holò.

10 Abo bakatūmamaga mu mabeegejo ga myenda bakwikīla, pye abo bakapandīkaga mishahala ya kūlang'hana kaya jabo bakūlemeelwa ūmo bīītīle.

11 A basugi ba Zoani babbūūlī, batī na gwabo; a baganikīji ba ng'wa Falao a ba masala bakafunyaga būganikīji būchile. Mukūdūla kinahe kūng'wīla ū Falao, “Ū nene nalī ng'wana wa banhū ba masala; nalī ng'wintūnja wa batemi ba kale”?

12 Alilūūlū, balī halī a banhū bako ba masala? Nibakūwīlage shi lūūlū, bakūmanīkīje Ī haha īyo SEEBA wa mabità ayiganikile kwīyītīla ī sī ya Misili!

13 A basugi ba Zoani baabbūūlīhile, a batongeeji ba Menfisi baalembilwe; abo balī ng'hīngī ja sī bīhūbije ī Misili.

14 Ū SEEBA wabitīīlile moyo ng'hūnga, bakwīyenhelejaga ī Misili yikale īkūlelengetaga mu yose īyo īkwītaga, gītī nkolwa walwa akūdeedeebūkaga na kūgala gala mu malūki gakwe.

15 Nose ū mu Misili shitīho shose shose īsho shidūgije kūbeejiwa na ntwe nūūlū nkīla, na matambī a ga ming'hwa nūūlū na madete.

16 Ū mu lūshikū lwenūlo a Bamisili bakūbiza gītī bakīma; bakogoha no bayūdetema, nguno ya nkono go ng'wa SEEBA wa mabità, ūyo akūgūgoloola kūlwa kwilwisha nabo.

17 Hūna ī sī ya Yuda īkūbiza na lyogohya ū kū Bamisili, būlī ng'wene ūyo wigwa yahayiwa akūyūdetema, kūlwa nguno ya mihayo īyo SEEBA wa mabità ahelile kūbīītīla.

18 Ū mu lūshikū lwenūlo, mizengo ītanò ya mu Misili īkūlūngalūnga lūlīmi lwa Kanaani; na bakūlahīla kūng'wigwa ū SEEBA wa mabità. Gūmò gwa mizengo yenīyī gūkwitanwa, Nzengo gwa Līīmi.

19 Ū mu lūshikū lwenūlo ū mu sī ya Misili gūkūbiza mo ng'walīlo kūlwa ng'wa SEEBA, hama ū kū lūbīmbī īkwīmīlījiwa ng'hīngī kūlw'ikūjo lya ng'wa SEEBA.

20 Ū mu sī ya Misili būkūbiza ho būlolelo na būkaanīji kūlī SEEBA wa mabità. Ūlū būnīlīīla ū SEEBA kūlwa nguno ya kwibonelwa, akūbatūmīla mpīja na wa kūbalwīlīīla, abagune.

21 Hūna ū mu lūshīkū lwenūlo ū SEEBA akwimanīīcha ū kū Bamisili, nabo bakūng'witegeleja ū SEEBA ū mu lūshikū lwenūlo, na bakūnamya mu kūmfunīja shitambò na shakwinha. Bakūng'wilahilīla shilahīlo ū SEEBA, na bakūshidima.

22 Ū SEEBA akwītūla na mahūūya ī Misili; na ng'hana akūbatūla, alīyo akūbapīja. Bakūnshokela ū SEEBA, nang'hwe akwigwa ū kwikūmbīlīja kwabo abapīje.

23 Ū mu lūshikū lwenūlo līkwilonga ikūūwa itaale lya kūfuma Misili kūja Ashulu. A Baashulu bakūyūja ī Misili, na a Bamisili ī Ashulu. A Bamisili na a Baashulu bakūyūlamīja hamò.

24 Ū mu lūshikū lwenūlo ī Isilaeli īkūbiza ya kadatū, īkūbalanijiwa hamò nī Misili nī Ashulu; ū gwenūyo mhayo gwa ū mu sī.

25 Ū SEEBA wa mabità akūbafuha alīhaya, “Balī na a banhū bane a Bamisili, na a Baashulu, abo balī nīmo gwa makono gane, na a Baisilaeli abo balī wingīji wane.”

Sukuma Bible © Bible Society of Tanzania, 2019.

Bible Society of Tanzania
Lean sinn:



Sanasan