Isaya 16 - Bibilia Ilagano Lya Kale 2015

¹ Kūfuma Seela bītagi mu sī y'itogolo, jagi kū lūgūlū lwa Sayuni mutwale inong'ho lya baana ba ng'holo ū kūlī nsugi wa sī.

² A bashīke ba Moabu balī ha būkīlīlo wa mongo gwa Alinoni, babizaga gītī makune ga noni gakūbbabbanaga gapamagwa kwīnga mu chanjo.

³ “Twinhagi ū būganikīji wing'we, lamulagi mu būgunanhi. Ū ng'wikanza lya līīmi ntwe gatī, ū nengeeji gwing'we gūbize gītī būjikū; abo balīkooba būpīlīlo ng'ūbabisa, yaya ū kūboolecha a babūngi.

⁴ Abo bakūpeelaga kūfuma Moabu balekagi bikale hamò ning'we; bizagi ibūngīlò lyabo ū mu kūmpeela ū nkenaagūji.” Ū ng'wiboneeji akūshika a ha ngelelo yakwe, ū būkenaagūji nabo būkūshila, nū ng'wibonya akūgaya ū mu sī.

⁵ Hūna isumbī lya būtemi līkūtūūlwa ho, līkwīmīīla na nguzu mu nzīla ya būtogwa; na munhū wa numba ya ng'wa Daūdi akūligasīja asuge mu kūsanyiwa; munhū ūyo mu kalamulīle kakwe akakoobaga kūlamula mu ng'hana, hangī ng'wangu kwīta ya būtūngīlīja.

⁶ Ī mihayo ya wikumīlīja wa Moabu twayigwile, alī na wikumīlīja na wigūngūhya būtaale no, nīyo ū wikumīlīja bokwe bo nyadooshi; alīyo ū mu kwihaya kwakwe ītīmo ī ng'hana.

⁷ Alilūūlū, ī Moabu n'īng'oolage, būlī munhū n'ayīlīlage ī Moabu. Līlagi ng'hūngū, mupīnīhale kūlwa migatī ya mizabibu īyo ng'walyaga Kili-haleseti.

⁸ Ī migūnda ya Heshiboni yanyaalile, pyī nī mizabibu ya Sibuma. A basugi ba mahanga bītobangile Ī mizabu ya matwajo masoga, īyo yalī īfulumile kūshisha Yazeli, yūlandaala kūlola kwitogolo; nīyo a malandaala gayo gaalī gaasambaala gūūkakīla na nyanza.

⁹ Hūna lūūlū nū nene nakūlīlaga gīt'ūmo Yazeli īkūlīīlīlaga, kūlwa nguno ya mizabibu ya Sibuma. Ee, Heshiboni nū bebe Eleale nalīmudotya na shisoji shane. Nguno jashililaga ī mhūndū ū mu shikū ja magesa gako.

¹⁰ Ū būyegi nū būzalabanu shīnjiagwa ū mu migūnda ya mizabibu; atīho wa kwīmba nūūlū kūtūla mhūndū mu migūnda ya mizabibu. Ndūhū munhū wa kūpandagīla mizabibu ng'wikamīlo apandīke divai; nguno ī mhūndū ja būyegi kūlwa magesa naajihumūgije.

¹¹ Ū būpanga wane būlīdaaya gītī ndono kūlwa nguno ya Moabu, nī ng'holò yane kūlwa nguno ya Kili-haleseti.

¹² Hūna lūūlū, ū Moabu nūūlū alinhe kūja kwipandī lya kwigūlya, alīnogela madūhū; nūūlū akaja kū hekalu yakwe kwitongeleja, nahene atūpandīka shose shose.

¹³ Ū mhayo gwenūyū h'ūyo wagūhaya ū SEEBA kūfuma kale kulwa nguno ya Moabu.

¹⁴ Alīyo ī haha ū SEEBA alīhaya, “Ng'wikanza lya myaka idatū, gīt'ūmo ng'witūmamīja wa mheela akabalīlaga ikanza lyakwe, ī likūjo lya Moabu līkūdalahwa; pye na a banhū bakwe, nūūlū īkī balī mabità na mabità. Hama abo bakūsaagīīla bakūbiza bagehu, nīyo hangī balelengetu no.”