Isaya 15 - Bibilia Ilagano Lya Kale 2015

Būhangi bo kūkenaagūlwa Moabu

¹ Mhayo kūlwa nsango kū sī ya Moabu: Ī Aali ya Moabu yakenaagūlilwe, yabipile mu būjikū būmò! Nī Kili ya Moabu yakenaagūlilwe, yabipile mu būjikū būmò!

² A bana Diboni a bene baashilīlile kū migūngūli bakūtūlaga ng'hūngū mu hekalu yabo; Ī Moabu īkūbalīlaga bana Nebo na bana Medeba. Pye baatang'anhīlile kwihalūla mapala ī mitwe, nī ndezu būmooga.

³ Bakūshimīzaga mu mayīla bazwalile magūnīla; pye a bose bakūdīīlaga biyinamīīlaga balīīlīla, bangī kwigūlya ya numba jabo, bangī mu gwalugwa ja mu mizengo.

⁴ A bana Heshiboni na a bana Eleale bakūlīlaga no, kūshisha a malaka gabo galigwiwa na bana Yahazi; a bashilikale ba shilanga ū mu Moabu baagwile ng'holò; bakūlīlaga no, baabbahile.

⁵ Ī ng'holò yane īlīīlījiwa būpīna kūlwa sī ya Moabu, nguno a babūngi ba sī yenīyo baasaambaalile no; bangī baapeelelile Zoa, bangī baashikile Egilas-shelishiya. Bangī bakūjaga būlīla balīlinha ngūngūli balolile Lūhītī; balīyūtūngīīla na Holonaimu, baja bakūtūlaga ng'hūngū mu nzīla kūlwa kūkenaagūlwa kwabo.

⁶ A minzī gaakamile ū mu mongo gwa Nimulimu, na a maswa gūūmile; pyī īsho shikazwaga shashilile, shitīho shinīlīzu nūūlū sha ngota.

⁷ Ī sabo jabo ījo baakwaaba, nī shikolo īsho baalī bibīīkīja, balīkīla nasho mongo gwa magobeko.

⁸ Ī ng'hūngū yabo yasanganīkīlile pye a hose ū mu sī ya Moabu; ū kūbbūūlūlūka kwabo kwashikile na Egilaimu, ū kūlīla kwabo kūkwigwiagwa nī Beli-Elimu.

⁹ A minzī ga Dimoni gokalile mininga, alīyo hū nataalī nalī nayo mitaale ya kūbenhela a bana Dimoni; shimba īkūbamalīja a bana Moabu abo balīpūlūgūka, pye abo balashiigīīle ū mu sī.