Isaya 11 - Bibilia Ilagano Lya Kale 2015

Itambī kūfuma mulī Yese

¹ Kūfuma ng'witindigishi lya ng'wa Yese, Ūyo alī Isaapa akūfuluma; kwīngīīla mu miji yakwe, Itambī līkūtwaaja matwajo.

² Ū Moyo o ng'wa SEEBA akūlembeela halī we, Moyo wa masala na witegeleja, Moyo wa būganikīji na būdūla, Moyo wa būmani na logohano lwa ng'wa SEEBA,

³ na akūyegela mu logohano lwa ng'wa SEEBA. Atūlamula mhayo kūlwa kūbona na miso gakwe, nūūlū atūlekanya mhayo kūlwa kūlondeela ūmo akwigwīlaga na matū gakwe.

⁴ Alīyo a bahabī akūbalamula mu būtūngīlīja, ī mihayo ya baluhi ba mu sī akwīlekanya mu būdeeba. Ī sī akwītūla na nang'ha gwa mu nomo gwakwe, a babūbi akūbabūlaga na myūyī ya mu nomo gwakwe.

⁵ Ū būtūngīlīja būkūbiza nshipi gwakwe, ū būsanyiwa būkūbiza ngwasho gwa mu nkīmbīlī gwakwe.

⁶ Ī mhūge īkwikala hamò na ng'wana wa ng'holo, ī mbūli nayo īkūtūja na sūbī, hama ī ndama na mūūga shikūdīīma hamò na shimba; nīyo jikūlang'hanwa na nīgīni.

⁷ Ī ng'ombe īkūdīīma hamò na ndūba, a baana bajo bakūtūūgīja ha lūmò, ī shimba īkūlya maswa gītī ntugo.

⁸ Ū ng'wana ūyo ataalī akong'haga akwigusha bbihī na ng'oobo gwa ng'hoboko, ū nīgīnī akūtūūla nūūlū nkono gwakwe ha būhoyelo wa shipīlī.

⁹ Shitīho sha kūminya nūūlū kūkenaagūla hose hose ū mu lūgūlū lwane lwela, nguno ū kūūmana SEEBA kūkūbiza hose pyī ū musī, gīt'ūmo nyanza yokalile minzī.

¹⁰ Ū mu lūshikū lwenūlo ūyo alī Nji go ng'wa Yese akwīmīīla kūbiza lūbembeela kū banhū, hū Ng'wene ūyo mahanga gakūnkooba; hama ū wikalo wakwe būkūbiza n'ikūjo itaale no.

¹¹ Nīyo ū mu lūshikū lwenūlo, ū Seeba akūgūgoloola hangī ū nkono gwakwe lūkangala lwa kabīlī, kūbūkomoola nū būshiigo wa banhū bakwe abo bakūsangwa bataalī Ashulu, Misili, Esiopia, Elamu, Babuloni, Hamasi, na kū majinga ga mu nyanza.

¹² A mahanga akūganungīja lūbembeela, ababilinge a Baisilaeli abo basalang'hanīlile mu būsaamiwa; a banhū ba sī ya Yuda abo basambaalile akūbabilinga kūfuma mhandī inè ja sī.

¹³ Ū wilu wa sī ya Efulaimu būkūshila, na a banishi ba sī ya Yuda bakwīnjiwa; ū Efulaimu atūng'wītīla wilu ū Yuda, nūūlū ū Yuda atūbiza na wanishi ū kūlī Efulaimu.

¹⁴ Ī mbūga ja ng'weli ya sī ya Bafilisti bakūjiikīīla nyakoonà balī dege; nī sī ja kīya bakūjidumīla balī hamò basole ī sabo jaamo. Ī Edomu bakwīdima nī Moabu, na a banhū ba Amoni bakūbiza ha sīlīlī ya būsugi wabo.

¹⁵ Ū SEEBA akūlīkenaagūla ī likondo lya nyanza ya Misili, ū nkono gwakwe akūgūnunja apūūgīīle, gwize nyaga nsebu gūgūkamye ū mongo gwa Fulati. Nīyo ū mongo gwenūyo akūgūtūla, yigele myongo mpungatī mido mido midindibūku, īyo munhū adūgije kwīkīlanhya nūūlū akabiza azwalile shilatū sha nhalabanda.

¹⁶ Līkwilonga ikūūwa igalī kūlwa būshiigo wa banhū bakwe abo bakūlekeelwa Ashulu; gīt'ūmo lyalī kūlwa Baisilaeli aho baafumaga mu sī ya Misili.