Isaya 10 - Bibilia Ilagano Lya Kale 2015

¹ Balī mu kwihīga abo bakatūūlīlaga banhū shilagīlo shitī mu būtūngīlīja, na a babo bakabeejaga kahelele ka mihayo ya wiboneeji,

² gīkī bayūbataagīja a bagayiwa Īyo ībigeleelilwe, na a banhū bane a bahabī babīngīje a kalamulīle ako kagoloolile; na kūyūlya sha bachīlwa, na kūdaatya sabo ja bapīna.

³ Mukwīta kinehe ū mu lūshikū lwa nsango, ū ng'wikanza lya kwikīīlwa būkenaagūji būfumile kūle? Mukūpeelela kūlī nani mukagunwe? Mukūnekela nani ū būsabi wing'we?

⁴ Gūtīho ū gwa kwīta, ūlū ītī kūguulanyiwa mu batungwa na kwisumata ng'wenūmo dūhū, nūūlū kūgwa hamò na a babo bakūbūlagwa. Alīyo nūūlū īkī īlī gīko ī mihayo, ū būpelanu bokwe būtaalī ū kwīnga, nū nkono gwakwe ataalī agūgoloolile.

Kūlamulwa kwa sī ya Ashulu

⁵ Ee Ashulu, ūyo alī nang'ha gwa būdaki bone; ūyo mu nkono gwakwe alī na būhili wa būpelanu wane!

⁶ Nalīntūma kwihanga lītī na Mulungu, nalīnagīla aje kū banhū abo baanipelanya, kūjūsola nding'wa na shisonzwa, na kūshipandagīla hasī gītī tembe ya mu mapanda.

⁷ Alīyo ū wei atiganikaga kwīta gīko, ū gwenūyū gūtīmo ū mu maganiko gakwe; Ī ng'hūmbū jakwe jilī ha kūkenaagūla, kūmala gete mahanga mingī.

⁸ Nguno akwiwīlaga gīkī, “A batongeeji ba bashilikale bane batī batemi pye a bose?

⁹ Ī Kalino ītī gīt'umo īlī Kakemishi? Ī Hamasi ītalenganīlile nī Alipadi? Ī Samalia nayo yikīlile kinehe nī Damasiko?

¹⁰ Ū nkono gwane gwadima mabūtemi galī na shiikolile sha kūlamiwa, ayo shiikolile shago sha kūsula shalī shibeejiwe mu būgaliili būtaale kūtinda sha Yelusalemu na Samalia,

¹¹ numho nakūlemeelwa kinehe ū kūgwītīla ū nzengo gwa Yelusalemu nī shiikolile shago, ūmo nagwītīlile ū nzengo gwa Samalia na a mashitongelegejo gago?”

¹² Ū Seeba ūlū ūmala ī milīmo yakwe ū kū lūgūlū lwa Sayuni nī Yelusalemu, akūhaya, “Leka lūūlū nang'winhe nsango nang'hwe ū ntemi wa Ashulu, kūlwa būdooshi bo wikumīlīja wa mu ng'holò yakwe, na a kalolele kakwe ka kwigūngūhya we ng'wenekīlī.”

¹³ Nguno akwigīmba gīmbaga ūhaya, “Ū gwenūyū naagūbeegije nene ng'wenekīlī mu nguzu ja nkono gwane, naatūmamīlile masala gane nguno nalī nabo ū būmani; naaseesagūlile mbīmbī ja mahanga, nūdima sabo ja wibīkīja wabo; nalī nzagamba nyang'widīīma, naabatyūlile batemi ha masumbī gabo ga būtemi.

¹⁴ Ūmo munhū akagoloolelaga nkono wagwingīja mu chanjo sha noni, h'ūmo nū nene naagoloolelile nkono gwane kwīnja būsabi wa mahanga; ūmo banhū bakabilingīgījaga magī ayo galekanīgije sagala, h'ūmo nū nene naajibilingīlile ī sī; na walī atīho wa kūgema kūbbabbana nūūlū hado, atigelile wa kwasamya nomo gwakwe gīkī ageme nūūlū ni kūzwigīīla dūhū.”

¹⁵ Ī mbasa yigūngūhye higūlya yakwe ūyo akwīhubengaga, nūūlū ū nsumeno gwikumīlīje ū kūlī ntūmamīji wago? Ūlū chene nū nang'ha gūkūng'hubenga ū ntūmamīji wago, nūūlū ī ng'hoome īkūmūūcha ūyo atī lī ntī.

¹⁶ Hūna lūūlū, a bashilikale bakwe ū ntemi wa Ashulu a ba nguzu, ū Seeba, ū SEEBA wa mabità, akūbatūmīla būsaatu būbaseedeeche; ī likūjo lyakwe līkūpya būsebu gītī wa moto gūkūligimaga.

¹⁷ Ū Mulungu, ūyo alī Isana lya ng'wa Isilaeli, akūbiza moto; u Ng'wela o ng'wa Isilaeli akūbiza būpī būkūbakaga; būkūgapemba mu lūshikū lūmò pye a magwaata na a ming'hwa gakwe ū ntemi wa Ashulu ganogotele.

¹⁸ Būkūganogoteja pye a mapoolu gakwe nī migūnda yakwe; ī likūjo lyakwe līkūgunzagūka no, abize gītī munhū aseedeechiwe būsaatu.

¹⁹ Ī miti ya ng'wipoolu lyakwe Īkūsagīīla migehu no, nūūlū nīgīnī akūdūla kwībala ūwandīka ū būkūmi wayo.

Būshiigo wa Baisilaeli

²⁰ Ū mu lūshikū lwenūlo ū būshiigo wa Baisilaeli, a banhū ba numba ya ng'wa Yakobo abo bakūpūlūgūka, batūnsendamīla hangī ūyo walī wabatūla, alīyo bakūnsendamīla mu ng'hana ū SEEBA, ū Ng'wela wa Isilaeli.

²¹ Būshiigo būkūshoka, būshiigo wa banhū ba numba ya ng'wa Yakobo, h'abo bakūshoka ū kūlī Mulungu wa būdūla.

²² Nguno a banhū bako, Ee Isilaeli, nūūlū bakabiza bingī no gītī maseni ga ha nyanza, alīyo bakūshoka bagehu no, būshiigo wabo dūhū. Būlīho būkenaagūji būhelilwe, būliza mu būtūngīlīja būtaale.

²³ Ū Seeba, ū SEEBA wa mabità, akūbūshikīlīja ū būkenaagūji ūbo būhelilwe kūlwa sī yose.

²⁴ Hūna lūūlū, ū Seeba, ū SEEBA wa mabità alīhaya gīkī, “Bing'we banhū bane bana Sayūni, lekagi ū kūbogoha a Baashulu, abo bakūmutūlaga na nang'ha, bīīta bamubūūkīja ng'hoome, git'ūmo bang'wītīlaga Bamisili.

²⁵ Nguno ū būpelamu wane būtūdīīla ū kūshila, hūna ū būkalī wane būkūbagalūkīla nabo būbayagaje.”

²⁶ Ū SEEBA wa mabità akūbasaanagūla mbooko ūmo akabatūlīla bana Midiani kū shiganga sha Olebu; nū nang'ha gwakwe gūkūbiza higūlya ya nyanza, akūgūbūūcha gīt'ūmo akīītīla Misili.

²⁷ Ū mu lūshikū lwenūlo ū nigo gwabo gūkūbūūchiwa gwīnge a ha mabega ging'we, Ī lijoki lyabo līkwīnjiwa a ha nhingo jing'we, Ī lijoki līkūpaanagūka nguno mukūgīna no.

²⁸ A banishi bashikaga Ayati, balībītīla Migiloni, Balīleka shiyogo shabo Mikimashi.

²⁹ Baabītaga a ha būkīlīlo, bakwiwīlaga gīkī, “Ū būjikū wa lelo tūkūlaala Geba.” Ī Lama īlīzuguma, ī Gibea ya ng'wa Saulo yapeelile.

³⁰ Ee, bebe nshīke Galimu tūlaga ng'hūngū! Ee, bebe Laisha, degelekaga! Ee Anasosi, ūlizīīlwa makoye; hayaga nang'ho!

³¹ Ī Madimena yapeelile, na a banhū ba Gebimu baapeelile kūja kwipīja.

³² Ī lelo yenīy'a banishi bakūmata magūlū mu Nobu, u lūgūlū lwa Sayuni ya Yelusalemu, bakūloolota kūnū bakwikumīlījaga.

³³ Managi gīkī, ū Seeba, ū SEEBA wa mabità, akūgahogagūla bo nguzu a matambī, Ī miti ī milīhu īkūbbutagūlwa, ī mitaale mitaale īkūgwisanjiwa.

³⁴ A mapoolu ayo gashitanile akūgaanīla isengwa galīlīkwe mbasa; ī Lebanoni īkūgwa kū būtongi wakwe ū Wabūdūla.