Hosea 9 - Bibilia Ilagano Lya Kale 2015

Isilaeli alindīīlilwe nsango

¹ Ee Isilaeli, lekaga ū kūyega, yaya ū kūzalabana gīt'ūmo galī mahanga gangī. Nguno ūtī ng'wishigwa ū kūlī Mulungu wako; ū mu būmalahya wako ūkadutagwa mbūūga ja kūtūlīla būsīga kūlwa kūpandīka mheela.

² A banhū bakooya ū kūlya ī sha kūfuma ha mbūūga ja būsīga, nī sha kūfuma mu makamīlo ga divai; Ī divai mhya batalībona hangī.

³ Batikala ū mu sī ya ng'wa SEEBA; ū Efulaimu akūshoka Misili, na akūja Ashulu ayūlya shilīwa shisoso kwenūko.

⁴ Bakooya kwiita shakwinha sha divai kū būtongi bo ng'wa SEEBA hangī, nīyo ī shitambò shabo shitūnyeja. Ī shitambò shenīsho ū kūbo shikūbiza gītī shilīwa sha ha waalami mu shilīlo shabo; būlī ng'wene ūyo ūshilya akūsosohala. Ī shenīsho shilīwa shabo dūhū, shitī sha kwingīla mu hekalu ya ng'wa SEEBA.

⁵ Mukwīta ginehe ū mu shikū ja shigukulu shing'we, Ī shikū ja shigukulu sha ng'wa SEEBA?

⁶ Nūūlū bakabūpūlūgūka ū būkenaagūji, Ī Misili īkūbakobya, nī Menfisi īkūbajīka. Masaka ga magwaata gakūzwa gajikundīkīje ī sabo jabo ījo bibīīkīja, masaka ga ming'hwa gakūzwa gajikundīkīje ī kaya jabo.

⁷ Ī shikū ja nsango jashikaga, jitī kūle ī shikū ja kwanukūla mheela, ū Isilaeli shing'wigelile agūdeebe ū gwenūyū. A bing'we ī shibi shing'we shingī no nū wanishi wing'we būtaale no, nose ū kū bing'we ū ng'hangi akūbiza gītī mbūūlī, ū wa Kiimoyo ng'wene saji dūhū.

⁸ Ū ng'hangi nang'hani o ng'wa Mulungu wane, atūūlilwe kūlwa Efulaimu; alīyo hose pyī ū mu nzīla jakwe alindīīlilwe mitego, nū mu numba ya ng'wa Mulungu wakwe wanishi.

⁹ Baalibīla no ū mu būbi, gītī mu shikū ja Gibea. Ū Mulungu akūwizūkwa ū būbi wabo abinhe nsango kūlwa shibi shabo.

¹⁰ Ū kūmpandīka ū Isilaeli yalī gītī kūpandīka mizabibu minonu mu sī ya notà; ū kūbabona a basīng'we yalī gītī kūbona matwajo ga ntiini manonu mu shikū ja wandījo. Alīyo aho bashika Baali-peoli, bakifunya mu būshikaanu bose kū līshiikolile ly'iponda soni; nabo būbiza ba kūpelanya no, gīt'ūmo līlī ī līshikolo ly'ipelanya Īlo bakalītogwa lyenīlo.

¹¹ Ī likūjo lya Efulaimu līkūlala, gītī noni līkūng'ula lījile; ū kūtūnga nda kūkūshila, Ī nda ndūhū ū kūlenda ūlū jingīla, nū kūbyalwa a baana kūkūshila.

¹² Nūūlū bakabalela a baana babo, nakūbamala pye a bose bachīlwe. Bakwimana boi ūlū nūbalekanīja!

¹³ Ī Efulaimu nakībonaga gīt'ūmo Īlī Tulo, īhambilwe ha sī soga no, alīyo ī Efulaimu īkūbatwala a baana bayo kūjūbūlagwa.

¹⁴ Ee SEEBA, binhage, hīmba ūlū kūbinha kī shi ī gete? Binhage nda ja kūfunda funda, na mbeele jitī na mabeelè.

¹⁵ Ū būbi wabo ī Giligali būkakūla no, kūshisha nūbakolwa. Nakūbapeeja ū mu numba yane kūlwa nguno ya būbi bo shītīle shabo. Natikala nabatogilwe yaya, nguno a batongeeji babo bagomi pye.

¹⁶ Ī Efulaimu yatūlwa yūminyiwa, Ī miji yabo yanyaala, batūdūla kūtwaja matwajo. Nūūlū būbyala baana, nakūbūbūlaga ū būbyīle ūbo babūyegelile.

¹⁷ Ū Mulungu wane akūbalema, kūlwa nguno ya kūleka kūng'wigwa; bakūbiza banhū ba kūyūnga ūko na ūko mu mahanga.