Hosea 8 - Bibilia Ilagano Lya Kale 2015

Ū Isilaeli akūgesa nshūūlūlū

¹ Lījaga nhaaninga na nomo gwako, ng'hoonà īliza kwīdumīla ī numba ya ng'wa SEEBA, kūlwa nguno a banhū baabūkenaagūla ū būlagane bone, nī shilagīlo shane būshigomela.

² Ū Isilaeli akūnilīlīīlaga, “Ee Mulungu wise, tūkwitegelegije!”

³ Alīyo ū Isilaeli ayīlemile ī yawiza, akūkūūbīlījiwa na ng'wanishi.

⁴ Bakūtūūlaga batemi yaya nū kūnibūūja ū nene; bakūsolanhyaga basugi na a babo natabazunije ū nene. Ī feza nī zahabu jabo bakūjitūmamīlaga kwibeegeja shiikolile sha kūlamiwa; mhayo ūyo gūlī gwa gwikenaagūla boi benekīlī.

⁵ Bebe Samalia, īponyage ī ndama yako ya kwilamīlīgīja! Ū būpelanu bone būpembekile no kūlwa nguno yabo. Kūshisha nanalī bakwikala batī beela?

⁶ A boi Baisilaeli! Ī ndama yenīyī atī Mulungu, shiikolile sha kūbeejiwa na munhū, nsuji wa shikolo. Ī yoi ndama ya Samalia, līkūshika ikanza lya kūtobagūka.

⁷ Bakahambaga lūyaga, Ī sha kūgesa nshūūlūlū. Ī lisīga lītī na lyangala; lītūtwaaja shakūlya, nūūlū lyūtwaja mbeke līkūmilwa na mahanga.

⁸ Ū Isilaeli wamilwa; Ī haha alī mu mahanga, atikīlile na shikolo shitī na solobo nūūlū ndo.

⁹ Nguno bakaja Ashulu gītī nzobe Īkūtagaalījaga iyene. Ū Efulaimu wijinja kū bashihani bakwe.

¹⁰ Nūūlū īkī bijinja kū mahanga, Ī haha nakūbabilinga hamò. Hūna bakūbūdeeba ū būdito bo wiboneeji bo ntemi wa būdūla.

¹¹ Ū Efulaimu wazenga myalīlo mingī ya kūfunīja shitambò sha kweja shibi, alīyo yagaalūka kūbiza myalīlo ya kwītīla ho shibi.

¹² Ū nene nabinha mihayo mingī no Ī ya shilagīlo shane, alīyo bīgalūcha kūbiza shikolo shitī na solobo.

¹³ Bakafunyaga shitambò kūlwa nguno yane, ī nyama bakalyaga boi; alīyo ū SEEBA atabayegelaga. Ī haha akūwizūkwa ū būbi wabo, akūbinha nsango kūlwa shibi shabo: Bakūshoka Misili hangī.

¹⁴ Ū Isilaeli akwinzengelaga manumba g'ikūjo alīyo wang'wīība ū Meeja wakwe; Ū Yuda nang'hwe mizengo mingī wīpīndīlīja ndugu ja kūlang'hana. Alīyo nakwītūmīla moto ī mizengo yabo, gūjinogoteje ī ng'hambī jabo ja bashilikale.