Hosea 7 - Bibilia Ilagano Lya Kale 2015

¹ Ūlū nihamba kūmpīja ū Isilaeli, ū būbi wa Efulaimu būkwitendaga hape, ū būkenaagūji wa Samalia būkwiyeelekaga. Bakatūmamīlaga būlomolomo, na biibi bakakambūlaga numba, nū kū makūūwa malika ga basambo gakiboneelaga banhū.

² Gwike batamanile gīkī nashiizūkilwe pyī ī shītwa shabo ī shabūbi; ī haha ī shibi shabo shibagubbanīgije gubbi gubbi, būlī gwa shilī kū būtongi bone.

³ Ū ntemi bakanyejaga mu mihayo yabo yabūbi, na a basugi mu nzīla ja būlomolomo.

⁴ Pye a bose bashihani, ū mu mhayo gwenūyo basebu no gītī liiko lya nzugi, Īlo moto gwalyo akagūsooselaga kūfuma wandījo wa kūbīkīla fugo kūshisha īsībūkīle.

⁵ Ū mu lūshikū lwa shigukulu sha ntemi wise, a basugi bakabaka no kūlwa mapūūya, hūna badimana na banhū b'ibengwe.

⁶ Ī ng'holò jabo jikasebaga gītī ha mahiga, hūna bayūng'wizīīla mu nyasala sala. Ū kwikūmvwa kwabo kūkakeeyulaga kūkūzuukīīlaga gītī lyochi; ūlū wela ī dilū kwapuumūka gītī ndali ja moto.

⁷ Bose pyī ūmo bagelelile basebu no gītī liiko. Babūlagi ba basugi babo; a batemi babo bakamanagūshila, alīyo atīho nūūlū ūmò ūyo akanilīlīīlaga.

⁸ Ū Efulaimu wiguulanya mu mahanga; abange būgalī būtazugūūlile.

⁹ Ī nguzu jakwe jikong'hagwa na mahanga, alīyo ū wei ndūhū ū kūdeeba. Ū mu nzwīlī jakwe jiilobelile mo na jape, ū wei atagūmanile ū gwenūyo.

¹⁰ Ū Isilaeli būkūnkaanīlaga ū wikumīlīja bokwe; alīyo ū mu yose yenīyī atatogilwe kūnshokela ū SEEBA Mulungu wakwe, nūūlū kūnkooba dūhū yaya.

¹¹ Ū Efulaimu abange mhunda, ng'wangū ū kūlembagūlwa, atī na masala; lelo akūbitanaga Bamisili, ntondo akūbagalūkīla Baashulu.

¹² Ūlū būja nakūbaponegeja ikila lyane nabagwashe, nakūbahungumūla gītī noni ja kūlala. Ūlū nūbiigwa bandya kwikobya hamò, nakūbagwasha.

¹³ Bimana boi, al'īkī baataalī būnileka ū nene! Īkī baanigomela ū nene, ni bagwīlagwe mayanga! Ū nene natogilwe ū kūbapīja alīyo a boi bakanibyaagījaga mihayo ya būlomolomo.

¹⁴ Bakalīlaga kūnū bakūgalagalaga mu būlīīlī wabo na kwisananga mibīlī, alīyo batanilīlīīlaga ū nene kūfuma mu gatī ya ng'holò jabo. Bakikobyaga kūlya būsīga dūhū na kūng'wa mapūūya, alīyo baagalūka būnileka ū nene.

¹⁵ Ū kūbalanga naabalanga nene, nūbinha nī nguzu; alīyo hū bakūnilīīlaga gwīnda ya mihayo mibii bii bi.

¹⁶ Batangalūkīlaga ūyo alī Higūlya No; batikīlile na būta būtadadīlilwe. A basugi babo bakūmalwa līlūshū kūlwa mihayo yabo ītī y'ikūjo. Ū gwenūyū gūkūbenhela wibengelejiwa būtaale no ū mu sī ya Misili.