Hosea 5 - Bibilia Ilagano Lya Kale 2015

Nsango gwa Isilaeli

¹ Bagabīji gwigwagi ū mhayo ūyū! Bing'we Baisilaeli Tegagi matū! Degelekagi numba ya ntemi! Ū nsango ūyū gūliiza kūlwa nguno ying'we: Ī Mispa mulī lūtu lwa kūgwisha, ntego gūtegilwe mu Taboli.

² A bahūganu baajile no ū mu būbūlagi, Pye a bose nakūbahama nene.

³ Ū Efulaimu naamanile no; Ū Isilaeli atīko kwibisa ū kūlī nene. Efulaimu wagalūkīlile būmalahya ī haha; wasosohalile ū Isilaeli.

⁴ Ī shītīle shabo shitūbazunīlīja kūnshokela Mulungu wabo. Ī ng'holò jabo jookala moyo gwa būmalahya; ū SEEBA batang'witegelegije.

⁵ A Baisilaeli būkūbakaanīlaga ū wikumīlīja wabo; a Baisilaeli; Ee, a Baefulaimu, bene bakwipama kūlwa shibi shabo. Nū Yuda akwipama hamò nabo.

⁶ Ūlū būbūūka na madaale gabo ga ng'ombe na ng'holo kūjūnkooba SEEBA, batūmona; wamalile kwisunda ūbīngīla.

⁷ Batī basanyiwa ū kūlī SEEBA; bakabyalaga baana ba nda ja bū. Alilūūlū, ī shigukulu shabo sha Ng'weji mpya shikūbalya a boi, pye na a malaale gabo.

⁸ Ng'ang'aajagi nhaninga ī Gibea, Īlīle mhembe ū mu Lama. Lījagi ng'wano gwa būlūgū ū mu Beeti-aveni; tongelaga ko Benjamini.

⁹ Ū mu lūshikū lwa nsango ī Efulaimu Īkūlekwa īlī buyīkī. Ī ng'anda ja Isilaeli nalījimanīkīja ūyo gūtī gwa kūleba ho.

¹⁰ A batongeeji ba Yuda babange gītī basaamya ba meng'ho ja ha lūbīmbī. Nakūbaholeela būpelanu bone gītī ihūūma lya minzī.

¹¹ Ū Efulaimu wiboneelilwe; ū būlamulwa bokwe būpandagīlwa, nguno ya kūlondeela shiikolile sha kūlamiwa.

¹² Ū kūlī Efulaimu nalī gītī fufuuji, ū kū banhū ba Yuda natikīlile na būbozu.

¹³ Ū Efulaimu aho wībona ī ndwala yakwe, nū Yuda a machūūbagūkīle gakwe, a henaho ū Efulaimu akagalūkīla Ashulu, ūtūma nhūng'wa kūlī Ntemi ntaale alīlomba kūgunanhwa. Alīyo atīko ū kūkūpīja, atī nabo ū būdūla wa kūgapīja a malonda gako.

¹⁴ Nguno ū nene nakūbiza gītī shimba ū kūlī Efulaimu, shimba nhaale ū kūlī Yuda. Nakūbatandagūla hūna naje nabaleke; nakūbabūūcha na atigela wa kūbaguna.

¹⁵ Hanuma nakūshoka kū wikalo wane hangī, kūshisha babūzunye ū būhūbi wabo. A henaho hū bakūbūkooba ū būshū wane; ū mu mayanga gabo bakūnikooba mu welwa ng'holò.