Hosea 4 - Bibilia Ilagano Lya Kale 2015

SEEBA kūbahūgūla Baisilaeli

¹ Bing'we Baisilaeli gwigwagi ū mhayo go ng'wa SEEBA, nguno ū SEEBA alī na mhayo gwa kūmuhūgūla a bing'we bikaji ba mu sī īyī: Ī ng'hana ītīho ū mu sī, nī shigongo ndūhū, nūūlū ū kūng'witegeleja Mulungu kūtīho.

² Būlīho būdūkīji dūhū na būlomolomo na būbūlagi, na wibi na būshihani, na wiboneeji; nose ī liibūlaga lītī lya kūshila.

³ Kūlwa yose yenīyī ī sī īlī mu mayanga, a bikaji baamo pye a bose batī na nguzu; ī ndimu ja mu matogolo nī noni ja kūlala, būyaga nī ndīlo ja mu nyanza jikūchaaga.

⁴ Gwike yaya ī lidugumīla, atizilonga munhū wa kūnsaayīla ūngī, nguno a banhū bako babizile gītī bakūndugumīlaga ng'hangi.

⁵ Ū kwipama kwako ū bebe kūlī līīmi na būjikū, na a bahangi bakipamaga hamò nang'ho. Alilūūlū, nakūnkenaagūla ū noko.

⁶ A banhū bane bakūkenaagūkaga kūlwa nguno ya kūgayiwa būmani. Ū bebe īkī ūbūlemile ū būmani, nū nene naakūlemile ū kūbiza ngabīji wane; īkī ūkūshidalahaga ī shilagīlo sha ng'wa Mulungu wako, nū nene nakūbadalaha a baana bako.

⁷ Ūmo bakongegejaga kūkwīlī a bagabīji, h'ūmo bakongegejaga ū kwīta shibi ū kū būtongi bone; bakūlīgalūchaga ī Likūjo lyabo kūbiza shikolo sh'igisha minala.

⁸ Ū mu shibi sha banhū bane h'ūmo bakapandīkīlaga ū nīīlo gwabo, hūna baayūyega ūlū balīta ī yabūbi.

⁹ Alilūūlū, īyo īkūbagwīla a banhū, na a bagabīji īkūbagwīla yenīyo; bose nakūbinha nsango kūlwa nzīla jabo, nakūbinha mheela ya kūlenganīla na shītīle shabo.

¹⁰ Ū kūlya bakūlya alīyo batigūta; ū būmalahya bakwīta no alīyo batūkwīla. Nguno baaneka ū SEEBA bifunya

¹¹ kū būmalahya, kū divai ya kale na sūhya shikolo īsho shikīnjaga masala

¹² ga banhū bane. Bakalombaga na būgunanhwa ū kū mantī ga kūlamiwa, na mhīgī ja mantī jikabashokejaga. Moyo gwa būshihani gwabahūbya; batī ba kūsanyiwa ū kūlī Mulungu wabo.

¹³ Bakalinhaga kū ngūlū nhaale na ndo, baakafunya kwenūko shitambò na shitambò sha kūpemvwa; būyaga na mu mbeho ja mitūndū na mu magobeko, nū mu mitī mitaale ya mbeho fuuku. H'ī chene a bashīke bing'we baagalūkīla būmalahya, na a binga bing'we bashihani.

¹⁴ A bashīke bing'we ūlū būgalūkīla būmalahya natūbinha nsango, nūūlū a bīnga bing'we ūlū būyūshihya, nguno a bagosha bakipūnjaga ha mhūjo na bamalahya, bakafunyaga shitambò hamò na bamalahya ba mu mawilamīlīja. Banhū batī na witegeleja, bakūgwa mu būkenaagūku!

¹⁵ Ū bebe Isilaeli ītaga ū būshihani, alīyo ū Yuda ni atizagūgwa mu kwihīga kūlī gīko. Yaya ū kūja ī Giligali; yaya ū kūja ī Beeti-aveni. Yaya nū kwilahīla ng'ūhaya, “Ūmo SEEBA alī mpanga!”

¹⁶ A Baisilaeli balambu no, babange ndogoosa ya ng'ombe nhanda. Ū SEEBA akūdūla kūbadīīma kinehe gītī ng'holo mu madīīmīlo?

¹⁷ Ū Efulaimu adamīīlile kū shiikolile; nekage gete ū bebe!

¹⁸ Bakamalaga a mang'wa gabo baadima mihayo ya būmalahya; ī mihayo ya minala ībayegije a basugi babo.

¹⁹ Bakūja na nshūūlūlū, Ī shitambò shabo shikūbagoola.