Hosea 12 - Bibilia Ilagano Lya Kale 2015

¹ Ū Efulaimu akwilishaga lūyaga; būlī lūshikū akapeejaga lūyaga lo kīya; akongejaga būlomolomo na wibonya. Ūlū wabeeja būlagane na Ashulu, a maguta ga mizeituni gaaja Misili.

² Ū Seeba andakīīlile ū Yuda; akūng'winha nsango ū Yakobo kūlenganīla na nzīla jakwe; akūng'winha mheela kūlenganīla na shītīle shakwe.

³ Aho balī munda akandima kwishiigina ū nkūlūye; ū mu shikū ja būtaale bokwe wilwisha na Mulungu.

⁴ Akifuka na malaika ūpyena; ūlīla akūlombaga mbango. Ū Mulungu ūnsangīla Beeseli, ūlūngalūnga nang'hwe kwenūko.

⁵ Hū ng'wene ū SEEBA Mulungu wa mabità; SEEBA ūyo akumūkile mu lina lyakwe!

⁶ Alīyo shiigelile munshokele Mulungu wing'we; muhandatīle būtogwa na būtūngīlīja, ū Mulungu wing'we mung'wisagīlwe būlī lūshikū.

⁷ Ū nsūlūja akatūmamīlaga mapimīlo g a būlomolomo, atogilwe būnyeecha.

⁸ Ū Efulaimu akwikumīlījaga ūhaya, “Ī haha nalī nsabi no, ī sabo naapandīkile. Ū mu būsabi wane wenūbū batūbona mo būbi nūūlū shibi shose shose.”

⁹ Ū nene nalī SEEBA Mulungu wako, kūfuma na a haho ūlī mu sī ya Misili; nakūkwīta ūbize ng'wikaji wa mu maduku hangī, ūmo ūkīītīlaga mu shigukulu Īsho ūhelelilwe.

¹⁰ A bahangi naalūngalūnga nabo, nūbinha shakoolechiwa shingī, nūyūfunya na shigemeng'hejo mu nzīla ja kalangīle kabo.

¹¹ Ī Gileadi yabūbi? Alīyo a banhū ba kwene ba sagala! A bana Giligali bakafunyaga nzagamba ja shitambò? Ī myalīlo yabo īkūbiza gītī matūūgo ga mawe ng'wilaale līlīmilwe.

¹² Ū Yakobo akapeelela kū sī ya Alamu, ū Isilaeli widīīmīlīja apandīke nkīma, ū būkwi bokwe būbalīlwa mu kwidīīmīlīja ng'holo.

¹³ Ū SEEBA akatūmamīla ng'hangi ū kūng'wīnja Misili ū Isilaeli, nū kūnang'hana ūtūmamīla ng'hangi.

¹⁴ Alīyo ū Efulaimu wampelanya no; hūna lūūlū ū Seeba akūneka na būbi wa būbūlagi bokwe, na akūng'winha mheela kūlw'ibengwe lyakwe.