Hagai 1 - Bibilia Ilagano Lya Kale 2015

Kūkomigwa kwandya nzenga hangī

¹ Mu lūshikū lwa kwandya ng'weji gwa katandatū, ng'waka gwa kabīlī gwa Ntemi Dalio, mhayo go ng'wa SEEBA gūkiza mu nzīla ya ng'hangi Hagai; gwiza kūlwa nsugi wa Yuda, Zelubabeli ng'witūnja o ng'wa Shatieli; na ngabīji ntaale Yoshwa, ng'witūnja o ng'wa Yehozadaki.

² Ū SEEBA wa Būdūla bose alīhaya, “A banhū benaba bakūhayaga gīgī, ‘Ī likanza lya kūzengwa numba ya ng'wa SEEBA lītaalī ū kūshika.’”

³ Hūna ū mhayo go ng'wa SEEBA gwiza mu nzīla ya ng'hangi Hagai gūlīhaya:

⁴ “A bing'we hū līl'ikanza ling'we lya kwikala mu numba ja mbaawa jigaliilile chiza, alīyo ī numba yenīyī gūlī nsaka dūhū?”

⁵ Alilūūlū, ū SEEBA wa Būdūla bose alīhaya gīkī, “Jiideedeng'hanyagi chiza ī nzīla jing'we.

⁶ Mukūhambaga mbīyū ningī, alīyo ū kūgesa ng'wagelela shigehu. Ū kūlya mulīyūlya alīyo ū kwigūta biya. Nū kūng'wa mulīng'wa alīyo ū kūfulwa yaya. Ī shizwalo mukūzwalaga lelo ū kūlūngūja ndūhū. Ī hela ja mheela mukūpandīkaga ng'wajidītīla mu mhīnda jichibūkile.”

⁷ Ū SEEBA wa Būdūla bose alīhaya gīkī, “Jiideedeng'hanyagi chiza ī nzīla jing'we.

⁸ Linhagi kū ngūlū mukabbute mitī ng'wize ng'wīzenge ī numba nīyegele; napandīke ikūjo.” Alīhaya Seeba.

⁹ Ū Seeba wa Būdūla bose alīhaya, “Ī gīsī nibūlī mukwisagīlagwa kūpandīka shikolo shingī alīyo ng'wapandīka shigehu dūhū. Hama īsho mulīyenha mu kaya nakūshiheheejaga shajimīīla? Īlī kūlwa nguno ya numba yane, īyo kūshisha haha īlī nsaka dūhū, alīyo būlī ng'wene ū mu bing'we akwigulambījaga kūzenga numba yakwe we ng'wenekīlī.

¹⁰ Nose kūlwa nguno ying'we a malunde gatūmugwisījaga nūūlū lūme, nī sī ītūzwishaga shose shose sha kūmugunanha.

¹¹ Nenhile būūmà kūlwa malaale ging'we nī ngūlū, pyī nī shilīwa sha mu migūnda, nī mizabibu ya kūng'winha divai, nī mitī ya maguta; nī shose īsho shikazwaga hasī; nū kū banhū nī mitugo, nū kū milīmo ya makono ging'we.”

¹² Na ng'hana ū Zelubabeli ng'witūnja o ng'wa Shatieli, nū ngabīji ntaale Yoshwa, ū ng'wana Yehozadaki, na a banhū a bangī pye abo baalī basaagīīla; būliigwa ī lilaka lya ng'wa SEEBA Mulungu wabo, nū mhayo gwa ng'hangi Haggai, nguno ū SEEBA Mulungu wabo hū ng'wene walī wantūma. A banhū būtūūla logohano ū kūlī SEEBA.

¹³ A henaho ū ntūmami o ng'wa SEEBA ū Hagai, ūbinha a banhū mhayo ūyū kūfuma kūlī Seeba, “Ū nene nalī hamò ning'we.” Alīhaya Seeba.

¹⁴ Hūna ū SEEBA ūgūsoosela ū moyo gwa nsugi wa Yuda, ū Zelubabeli ng'witūnja o ng'wa Shatieli, nū moyo gwa ngabīji ntaale Yoshwa ng'wana Yehozadaki, nū moyo gwa būlī ng'wene ū mu banhū bose abo baalī basaagīīla. Būfuma būūkandya kwīzenga ī numba ya ng'wa SEEBA wa Būdūla bose, ū Mulungu wabo.

¹⁵ Yalī mu lūshikū lwa makūmi abīlī n'inè ng'weji gwa katandatū, mu ng'waka gwa kabīlī gwa Ntemi Dalio.