Ezila 7 - Bibilia Ilagano Lya Kale 2015

Ezila kūja Yelusalemu

¹ Hūna ī yenīyo yūbīta; ū mu shikū ja būsugi bo ntemi Atashasta wa Būajemi, walīho ngosha lina lyakwe Ezila, ng'witūnja o ng'wa Selaya, ng'witūnja o ng'wa Azalia, ng'witūnja o ng'wa Hilikia,

² ng'witūnja o ng'wa Shalumu, ng'witūnja o ng'wa Sadoki, ng'witūnja o ng'wa Ahitubu,

³ ng'witūnja o ng'wa Amalia, ng'witūnja o ng'wa Azalia, ng'witūnja o ng'wa Melayote,

⁴ ng'witūnja o ng'wa Zelaya, ng'witūnja o ng'wa Uzi, ng'witūnja o ng'wa Buki,

⁵ ng'witūnja o ng'wa Abishua, ng'witūnja o ng'wa Finehasi, ng'witūnja o ng'wa Eleazali, ng'witūnja o ng'wa Alooni, ūyo walī ngabīji ntaale.

⁶ Hūna lūūlū ū Ezila ng'wenūyū akīnga koi ī Babuloni. Nīyo ū wei walī nangi, munhū ūyo walī ashimanile ī shilagīlo sha ng'wa Musa īsho SEEBA, Mulungu wa Isilaeli walī washifunya. Ū ntemi akang'winha būlī shikolo īsho akalomba, nguno ū nkono go ng'wa SEEBA Mulungu wakwe gwalī hamò nang'hwe.

⁷ Ū mu ng'waka gwa mpungatī gwa ntemi Atashasta, bamò ba Baisilaeli bakaja ī Yelusalemu, na bagabīji balebe, na Balawī, na bīmbi, na balang'hani ba hamilyango, na batūmami ba mu hekalu.

⁸ Ū mu ng'waka gwa mpungatī ū gwa ntemi gwenūyo, ū Ezila akashika ī Yelusalemu mu ng'weji gwa katanò.

⁹ Ū lūgendo lwakwe ū lwa kūfuma ī Babuloni akalwandya mu lūshikū lwa kwandya ng'weji gwa kwandya. Ī Yelusalemu ūshika mu lūshikū lwa kwandya lwa ng'weji gwa katanò, nguno ū nkono gwawiza go ng'wa Mulungu wakwe gwalī hamò nang'hwe.

¹⁰ Nīyo ū Ezila ng'wenūyo walī wīlogeja ī ng'holò yakwe kū mhayo gwa kūshisoma ī shilagīlo sha ng'wa SEEBA, na kūshishikīlīja; na kūbalanga a Baisilaeli a katongeelele na a kahelele kakwe ū SEEBA.

Ezila kwandīkīlwa nyalūba

¹¹ Īyī yene mihayo ya kūfuma mu nyalūba īyo ntemi Atashasta akang'wandīkīla Ezila, ūyo walī ngabīji na nangi ndeeba wa mihayo ya malange ga ng'wa SEEBA, hamò na a kahelele kakwe ū kū Baisilaeli.

¹² Atashasta, ntemi wa batemi: Kūlī Ezila ngabīji, na nangi wa shilagīlo sha ng'wa Mulungu wa ng'wigūlū: Anukūlaga kūgīsha.

¹³ Ī haha nalīfunya shilagīlo gīkī, Ng'wisilaeli ose ose ū mu būsugi bone, abize ngabīji nūūlū ūmò wa Balawī, ūlū alītogwa kūja ī Yelusalemu hamò nang'ho, adūgije ū kūja.

¹⁴ Nguno ū bebe watūmagwa na ntemi, hamò na bagunanhi bakwe ū mu mihayo ya būtemi. Jaga ūkīgīsīlīje ī mihayo ya Būyudaya nī Yelusalemu, ūbone ūmo īlī ī mihayo ya shilagīlo sha ng'wa Mulungu wako īsho ūshidimile.

¹⁵ Ūjitwale nī feza hamò nī zahabu ījo wafunije ū ntemi, na a bagunanhi bakwe kūlwa kūng'winha ū Mulungu wa Isilaeli, ūyo akikalaga mu Yelusalemu;

¹⁶ pyī nī feza nī zahabu ījo ūlapandīke kūfuma ū mu sī ya Babuloni ī yose, nī shakwinha sha wiyaabī īsho balafunye a banhū na a bagabīji, kūlwa hekalu ya ng'wa Mulungu wabo īyo īlī Yelusalemu.

¹⁷ Ī hela jenīji ūkūjitūmamīla kūgūla nzagamba ja ng'ombe, ng'ondi ja ng'holo, na ng'ondi songi, hamò nī shakwinha sha būsu nī sha kūng'wiwa, īsho shikajīlanījaga nasho. Ī shose shenīshi ūkashifunye a ha ng'walīlo gwa mu hekalu ya ng'wa Mulungu wako ī Yelusalemu.

¹⁸ Ī feza nī zahabu ījo jilasaage ūkūjitūmamīla mu yose yose īyo īlabeelele mu miso gako na a ga badūgū bako; ītagi gīt'ūmo atogelilwe ū Mulungu wing'we.

¹⁹ Ī shiseme īsho winhagwa kūlwa nguno ya myanya ya kūlamya ū mu hekalu ya ng'wa Mulungu wako, shishishage ū kūlī Mulungu wa Yelusalemu.

²⁰ Ūlū ng'ūgehelwa shikolo shose shose īsho shiigelile mushipandīke kūlwa nguno ya hekalu ya ng'wa Mulungu wing'we, mudūgije kwīnja hela ū mu mfuko gwa ntemi ng'ūgūla.

²¹ Nene ng'wenekīlī ntemi Atashasta nalīfunya shilagīlo ū kū balang'hani ba sabo abo balī ū kū sī ja kū nkīlo gwa mongo; gīkī, ū Ezila ū ngabīji na nangi wa shilagīlo sha ng'wa Mulungu wa ng'wigūlū, ūlū alalombe shose shose, inhwe mu būtūsusanya.

²² Ng'winhagi nūūlū kūshisha feza ja būdito bo kilo shihūmbī shidatū na magana anè, ī ngano kilo shihūmbī ikūmi, ī divai madebbe igana, a madebbe ga maguta ga mizeituni igana; ū munhu ū gwene ūmo alatogelwe.

²³ Shose shose īsho shilagīlilwe na Mulungu wa ng'wigūlū, shītwe na moyo gūmò kūlwa nguno ya hekalu ya ng'wa Mulungu wa ng'wigūlū. Nibūlī nose tūng'wenheleje kūbūpelanīla ū būsugi wa ntemi na a bitūnja bakwe?

²⁴ Na hangī shing'wigeleelilwe mumane gīkī, a bagabīji na Balawī na a bīmbi, na a balang'hani ba ha milyango, na a bagunanhi ba mu hekalu, nūūlū a batūmami a bangī a ba mu numba ya ng'wa Mulungu, batī ba kūtobishiwa goodi gete a benabo. Batī ba kūfunya nūūlū ī sabo īyo īkakumingagwa kūlwa kūlang'hana sī, na kūlwa kūfunya būlūmbi kū selekali.

²⁵ Hūna lūūlū ū bebe Ezila, ū kūlenganīla nū witegeleja bo ng'wa Mulungu wako ūbo ūlī nabo, solanhyaga balamuji na bagunanhi ba banhū, abo badūgije kūyūbalamula pye a banhū ū mu sī īyo īlī kū nkīlo gwa mongo; bose bose abo bashimanile ī shilagīlo sha ng'wa Mulungu wako, abo batashimanile ūkūbalanga.

²⁶ Munhū ose ose ūyo ūshilema ī shilagīlo sha ng'wa Mulungu wako nī shilagīlo sha ntemi, shing'wigeleelilwe kwinhwa nsango gwa kūbūlagwa nūūlū kūpeejiwa ū mu sī, nūūlū kūtaajiwa pyī ī shikolo shakwe, nūūlū kūtungwa.

²⁷ Akumīlījiwe ū SEEBA, ū Mulungu wa bakūlūgenji bise, ūyo akatūūla mhayo gītī gwenūyū ū mu ng'holò ya ntemi, kūlwa kwībeeja chiza gīko ī numba ya ng'wa SEEBA īyo īlī mu Yelusalemu.

²⁸ Hū ng'wene ūyo wanoolekegije wiza, ūnīīta kwanukūlwa ū kū būtongi bo ntemi na a bagunanhi bakwe, na a batūmami ba ntemi pye a bose abo balī na būdūla ū mu sī. Hūna lūūlū īkī ū nkono go ng'wa SEEBA Mulungu wane gwalī hamò nane, nakashisha ng'holò; nūsolanhya banhū ba kūja nabo, abo baalī bamanīkile ū mu Baisilaeli.