Ezila 6 - Bibilia Ilagano Lya Kale 2015

Ishosho lya ng'wa Dalio

¹ Hūna ū ntemi Dalio ūfunya shilagīlo, wītwa būgīsīlīja ī Babuloni, ū mu numba ja kūbīkīla mihayo ya kale.

² Būpandīka shitabo mu sī ya Būmeedi, ng'wikūlū lya Ekibatana; shalī shandīkilwe gīkī, Shizūkījo:

³ Ū mu ng'waka gwa kwandya gwa ntemi Koleshi, ū ntemi Koleshi akafunya shilagīlo kūlwa hekalu ya ng'wa Mulungu īyo īlī Yelusalemu, ūhaya gīkī, Ī hekalu yenīyo n'īzengagwe hangī ū mu Yelusalemu, lībize ipandī lya kūfunīja shitambò, ī misingi yayo ītūūlwe. Ū būgūngūhu wayo būbize futi makūmi kenda, nū būgalī galī futi makūmi kenda.

⁴ Ībize na ng'hīlīlī idatū ja mawe mataale, na lūhīlīlī lūmò lwa mitī; ī hela ja kūgwīta ū nīmo gwenūyo jifume mu fuko gwa ntemi.

⁵ Nī shiseme sha zahabu nī sha feza, ī sha numba ya ng'wa Mulungu, īsho Nebukadineza akashīnja kūfuma ū mu hekalu ya Yelusalemu, ūshenha Babuloni, nasho shishoshiwe mu hekalu ya Yelusalemu; būlī shene shitūūlwe h'ipandī lyasho ū mu numba ya ng'wa Mulungu.

⁶ Hūna lūūlū, ū bebe Tatenai, nsugi wa sī ya kū nkīlo gwa mongo, nū bebe Sesabozenai, na a basugi biching'wi a ba sī ja kū nkīlo gwa mongo, lekanagi nabo a banhū benabo.

⁷ Mutagūhangījagi ū nīmo gwa hekalu ya ng'wa Mulungu yenīyo; nekagi ū nsugi wa sī ya Bayudaya na a banamhala ba Bayudaya bīzenge ī numba ya ng'wa Mulungu yenīy'a h'ipandī lyayo.

⁸ Hanuma a higūlya ya yenīyo nalīlagīja na yīngī īyo īng'wigeleelilwe kūbīītīla a banamhala ba Bayudaya benaba, ū mu nīmo gwa kwīzenga ī numba ya ng'wa Mulungu yenīyī: Ī hela ja kūgwīta ū nīmo gwenūyo jifume ū mu fuko gwa ntemi ūyo gūlī ū kū sī ja kū nkīlo gwa mongo; jitūmame ījo jikafumaga mu goodi, binhwe wangū a banhū benabo pyī ī jose, gūtizīīma ū nīmo nūūlū hado.

⁹ Nīyo īsho būmulomba a bagabīji ba Yelusalemu, jibize nzagamba mūūga, nūūlū ng'ondi, nūūlū ng'ondi songi ja kūfunya kūlī Mulungu wa ng'wigūlū kūbiza shitambò sha kūpemvwa, pyī nūūlū ngano, munhu, divai, maguta; binhagi būlī lūshikū: Yaya gete ū kūleba ho nūūlū hado.

¹⁰ Ū mu gīko bakūdūla kūyūfunya shitambò sha kūnyeja ū Mulungu wa ng'wigūlū, banombela nū ntemi abize nzubūku, hamò na a bitūnja bakwe.

¹¹ Nīyo nalīfunya shilagīlo gīkī, ose ose ūyo wīgalūcha īyo nītūūla yenīyī, gūkwīnjiwa ngamba kūfuma a ha numba yakwe, gūsīmbīlwe hasī; hūna ū wei ūtūngwa hoi! Hanuma ī numba yakwe yūkenaagūlwa lyūbiza itūūgo lya mapalala.

¹² Ū Mulungu ūyo wasola gīkī ī lina lyakwe likale a h'ipandī lyenīlo, ni alīkenaagūlage ihanga lyose lyose, nūūlū banhū bose bose abo balihambe kūshigalūcha ī shilagīlo shenīshi, nūūlū kwīkenaagūla ī hekalu yenīyī, īyo īlī mu Yelusalemu. Nene Dalio nashitūūla ī shilagīlo shenīshi, shiigelile shishikīlījiwe mu būgaliili būtaale.

Hekalu kūshila na kūlugūlwa

¹³ Hūna lūūlū kūlwa nguno ya shilagīlo īsho ntemi Dalio akantwalīla ū Tetanai, ū nsugi wa sī ya kū nkīlo gwa mongo, nū Shesabozenai hamò na bichabo, bakagwīta ū nīmo na būgaliili būtaale.

¹⁴ A banamhala ba Bayudaya bongeja ū kūzenga kūnū bakwinhagwa nguzu na būhangi bo ng'hangi Hagai na Zakalia ng'witūnja o ng'wa Ido. Būmala ū kwīzenga ī hekalu kūlwa kūlondeela ilange lya ng'wa SEEBA Mulungu wa Isilaeli, na kūlwa kūgunanhwa na shilagīlo sha batemi ba Būajemi, ba Koleshi, Dalio na Atashasta.

¹⁵ Hūna ī hekalu yūbiza yamalwa ū kūzengwa, ha lūshikū lwa kadatū mu ng'weji gwa Ada, mu ng'waka gwa katandatū gwa būsugi bo ntemi Dalio.

¹⁶ Pye a Baisilaeli abo baalī biza kūfuma kū būsaamiwa, hamò na a bagabīji, na a Balawī, baalī na shigukulu sha būyegi būtaale no, a h'ikanza lya kwīlombela ī numba ya ng'wa Mulungu.

¹⁷ A h'ikanza lya kwīlombela ī numba ya ng'wa Mulungu yenīyī, bakafunya nzagamba igana, ng'ondi magana abīlī, na ng'ondi songi magana anè; na ngulyati ikūmi n'ibīlī kūlwa shakwinha sha shibi sha Baisileli bose, īmò būlī lūganda lwa Baisilaeli.

¹⁸ Būbatūūla na a bagabīji ū mu magele gabo, na a Balawī ū mu ndīīma jabo kūlwa kūntūmamīla Mulungu ū mu Yelusalemu, kūlenganīla nū mumo handīkīlilwe mu shitabo sha ng'wa Musa.

¹⁹ Mu lūshikū lw'ikūmi n'inè ng'weji gwa kwandya, a banhū abo baalī bashoka kūfuma kū būsaamiwa būshiyegela ī shigukulu sha pasaka.

²⁰ A bagabīji na a Balawī baalī baamala ū kwiyeeja, hū kūhaya baalī beela kūlwa būtūmami wabo. Hūna lūūlū būjisīnza ī ng'holo ja pasaka kūlwa banhū bose, abo baalī bashoka kūfuma kū būsaamīiwa; na a bagabīji bichabo na a boi benekīlī.

²¹ Ī pasaka yenīyo bakīlya a Baisilaeli abo baalī bashoka kūfuma kū būsaamiwa, na būlī ng'wene ūyo walī wazunya kūbiza hamò nabo, ūyo alekanile nū būsoso wa nhūngwa ja banhū ba mahanga, abo baalī bazengile ng'wenūmo hamò nabo, hūna ūbiza namya o ng'wa SEEBA Mulungu wa Isilaeli.

²² Nī shigukulu sha migatī ītī na shibimbya bakashiyegela ikanza lya shikū mpungatī; nguno ū SEEBA walī wabokaja būyegi, kūlwa kūgagalūcha a maganiko ga ntemi wa Ashulu, ūbagunanha ū mu nīmo gwa numba ya ng'wa Mulungu wa Isilaeli.