Ezila 3 - Bibilia Ilagano Lya Kale 2015

Ng'walīlo kūzengwa

¹ A Baisilaeli būbiza balembeela mu mizengo yabo, a ho gwashika ng'weji gwa mpungatī a banhū būja Yelusalemu, bibilinga gītī munhū ūmò.

² Hūna wīmīīla Yeshua ū ng'wana Zadoki, hamò na a bagabīji biye, nū Zelubabeli ū ng'wana Salatieli, na a biye bandya kūgūzenga ū ng'walīlo go ng'wa Mulungu wa Baisilaeli kūlwa kūfunīja hoi shitambò sha kūpemvwa, gīt'ūmo handīkilwe mu shilagīlo sha ng'wa Musa munhū o ng'wa Mulungu.

³ Ū ng'walīlo bakagūtūūla a h'ipandī lyago kūlwa nguno ya kūbogoha a banhū ba sī jenījo abo baalī babapīndīlīgije mhandī jose jose; hūna būmfunīja hoi shitambò sha kūpemvwa ū SEEBA, dilū na mhīndī.

⁴ Būshiyegela nī shigukulu sha maduku kūlenganīla nū mumo handīkīlilwe, nī shitambò būyūfunya kūlenganīla nī lisaabu īlo līlagīlilwe būlī lūshikū.

⁵ Hanuma ya henaho būja nago nū gwa kūyūfunya ī shitambò īsho shilagīlilwe kūlengalīna na shikū nhaale ījo jitūūlilwe; gītī Ng'weji mpya, nī shigukulu sha ng'wa SEEBA ī shingī pyī ī shose īsho shihelilwe, nī shakwinha sha būlī ng'wene ūyo wafunyaga shakwinha sha wiyaabī kūlwa nguno ya ng'wa SEEBA.

⁶ Ū kūfunya ī shitambò sha kūpemvwa kūlwa nguno ya ng'wa SEEBA, bakandya lūshikū lwa kwandya lwa ng'weji gwa mpungatī. Gwike ū nsingi gwa hekalu ya ng'wa SEEBA gwalī gūtaalī ū kūtūūlwa hoi.

⁷ Hūna būbinha hela a bazengi na a baselemala; hama būyūbinha shilīwa na sha kūng'wa na maguta banhū ba Sidoni na Tulo, gīkī bayūbenhela magogo ga mitī ya mibanga kūfuma kwipoolu lya Lebanoni kwītwaala kū ng'walo gwa nyanza ya Yopa, gīt'ūmo baalī bazunīlīgījiwa nū ntemi wa Buajemi ū Koleshi.

Kwandya nzenga ya hekalu

⁸ Ū mu ng'waka gwa kabīlī kwīngīīla aho bakashikīla ī Yelusalemu ū kū numba ya ng'wa Mulungu, ū mu ng'weji gwa kabīlī ū Zelubabeli ū ng'witūnja o ng'wa Salatieli, nū Yoshwa ū ng'witūnja o ng'wa Yozadaki, bakagwandya ū nīmo hamò na badūgū babo a bangī a bagabīji, na a Balawī, na a bangī abo baalī biza Yelusalemu kūfuma ūko baalī basaamījiwa. Būbasola a Bagabīji ba kwandīja ha myaka makūmi abīlī na kūja kwigūlya, bagūdime ū nīmo gwa kūwīmīīla ū būzengi wa numba ya ng'wa SEEBA.

⁹ Ū Yeshua walī na a bitūnja bakwe, hamò na a badūgū bakwe; hamò na a bitūnja ba ng'wa Henadadi abo baalī Balawī, na a baana babo na a badūgū babo.

¹⁰ A bazengi aho bagūtūūla ū nsingi gwa hekalu ya ng'wa SEEBA, a bagabīji bakiza na mhembe jabo, bazwalīlile shizwalo shabo sha milīmo, a Balawī nabo a bitūnja ba ng'wa Asafu biza na nzege jabo kūnkumīlīja ū SEEBA gīt'ūmo Daūdi ntemi wa Isilaeli walī walagīīlīla;

¹¹ būyūng'wīmbīla ū SEEBA mu būyegi na kūlūmba, bakwiyinhīlījaga būhaya gīkī, “Ū wei alī wawiza no, ū būtogwa wakwe būlī bo welelo na welelo ū kū Baisilaeli.” Hūna pye a banhū būhamuka n'ilaka itaale aho balīnkumīlīja ū SEEBA, nguno ū nsingi gwa numba ya ng'wa SEEBA gūkatūūlwa.

¹² Gwike bingī ū mu bagabīji na a Balawī na a batongeeji ba kaya ja ndūgū jabo, a banamhala abo baalī bībona ī hekalu ī ya kwandya, a bene bakalīla n'ilaka aho bagūbona ū nsingi gwa hekalu yenīyī gwatūūlwa ho, nūūlū īkī bingī bayoganyaga kūlwa būtogwa;

¹³ nose yalī shilambu a banhū ū kwīdeeba ī yoge īyo yalīho kūlwa nguno ya būyegi, nī yīyo yalīho kūlwa nguno ya kūlīla, nguno a banhū bayoganyaga na yoge nhaale no; ī lilaka lyabo ligwiagwa kūshisha kūle no.