Ezila 10 - Bibilia Ilagano Lya Kale 2015

Kūlahīla kūbaleka bake babo

¹ Ū Ezila aho alīlomba na kūtambūūla, kūnū akūlīlaga na kwiponanja hasī ū kū būtongi bo numba ya ng'wa Mulungu, ibità itaale lya Baisilaeli līkibilinga aho walī, bagosha na bakīma na baana; nabo būyūlīla mu kūsaatwa kūtaale.

² Kwimanīla Shekania ng'witūnja o ng'wa Yehieli, ūmò wa banhū ba shibyalīlwe sha ng'wa Elamu ūng'wīla ū Ezila, “Twang'hūbile ū Mulungu wise kūlwa nguno twatoolile bakīma ba kūfuma mu mahanga ga banhū ba mu sī īyī; alīyo nahene kūtaalī kūlīho ū kwisagīlwa ū kū Baisilaeli, nūūlū īkī yajile gīko.

³ Alilūūlū, tūtūūlagi ilagane a ha gatī yise nū Mulungu wise, tūbaleke a bakīma benaba pye a bose, na a baana babo, gīt'ūmo ūlītūganikīla baba; ūmo bahayīlile na a bangī abo baalī na logohano kū shilagīlo sha ng'wa Mulungu wise, nīyo ī lilagane lyenīlo lītūūlwe gīt'ūmo shihayīlile ī shilagīlo.

⁴ Būkaga baba, ū mhayo gwenūyū gūlī mu nkono gwako; gwītage, na a bise tūlī hamò nang'ho kūkūguzuhya.”

⁵ Hūna ū Ezila ūbūka, ūbilahīja a bagabīji a batongeeji na a Balawī, na a Baisileli a bose, gīkī bakwīta īyo yahayiagwa; nabo ng'hana bilahīla.

⁶ A henaho lūūlū ū Ezila hū wīnga ū kū būtongi bo numba ya ng'wa Mulungu, ūja mu chumba sha ng'wa Yohanani, ng'witūnja o ng'wa Eliyashibu ūūkakeyula ng'wenūmo, atalile nūūlū kūng'wa yaya; nguno walī ataalī ūlīla kūlwa nguno ya banhū abo baalī bafuma kū būsaamiwa, abo bakalemeelwa ū kūbiza bishigwa.

⁷ Hūna gūhelwa gwa kwibilinga pye a banhū abo baalī bashoka kūfuma kū būsaamiwa, hūna būkumūkījiwa hose pyī ū mu Būyudaya nī Yelusalemu, gīkī bize kwibilingīla Yelusalemu.

⁸ Shūtūūlwa shilagīlo gīkī ose ose ūyo alaleke kūshika aho shikū idatū jitaalī kūshila, a basugi na a banamhala badūgije kūlagīla ataajiwe pyī ī shikolo shakwe, hama ū wei ng'wenekīlī asūngūlwe ū ng'wibità lya bashoki ba kūfuma kū būsaamiwa.

Libilinga lya Yelusalemu

⁹ Na ng'hana pye a bagosha ba mu Būyudaya nī Benjamini bibilinga ī Yelusalemu aho jitaalī ū kūshila ī shikū īj'idatū. Lwalī lūshikū lwa makūmi abīlī ng'weji gwa kenda; a ha būtongi bo numba ya ng'wa Mulungu lyalīho ibbaala igalī, pye a banhū bigasha henaho hasī, bakūdetemaga kūlwa nguno yago ū mhayo gwenūyo, na kūlwa nguno yatūlaga mbula nhaale.

¹⁰ Hūna ū ngabīji Ezila wīmīīla ūbawīla, “Ng'wahūbile nguno ng'watoolile bakīma ba kūfuma mu mahanga, ng'ūbongeleleja ū būbi wa Baisilaeli.

¹¹ Alilūūlū, ī haha ntambūūlīlagi ū SEEBA Mulungu wa bakūlūgenji bing'we, ng'wīte īyo ayīhayile. Mulekane nabo a banhū abo mukwikalaga hamò nabo, na a bake bing'we a ba kūfuma mu banhū ba mahanga.”

¹² Pye a banhū būhaya n'ilaka lya higūlya, “H'ūmo īlī; shitwigelile twīte gīt'ūmo ūlīhayīla.

¹³ Gwike ī haha balī bingī no a banhū, hama nīyo īlītūla na mbula; tūtūdūla ū kwikala twīmīīlaga hanze aha. Na hangī nīyo ū nīmo gwenūyū gūtī gwa kwītwa lūshikū lūmò dūhū nūūlū ibīlī, nguno twahūbile no ū mu mhayo gwenūyū.

¹⁴ A batongeeji bise ni bīmīīla a ha ng'wanya gw'ibità lya banhū. Hūna pye abo balī mu mizengo yise abo batoolile bakīma ba kūfuma mu mahanga, bahelelwe makanza gigelile, bayiza hamò na a balamuji na a banamhala ba mu mizengo, kūshisha būtwīngīle ū būpelanu bo ng'wa Mulungu wise ū mu mhayo gwenūyū.”

¹⁵ Yonasani ng'witūnja o ng'wa Asaheli, na Yahizeya ng'witūnja o ng'wa Tikiva; a babīlī benabo būlema ū kwizunīlīja nago ū mhayo gwenūyū, būgunījiwa na Balawī ba Meshulamu na Shabetai.

¹⁶ Na ng'hana a banhū abo baalī bashoka kūfuma kū būsaamiwa bīīta gīt'ūmo gūkahelelwa. Ū Ezila ū ngabīji ūsolanhya banhū, abo baalī bataale ba kaya ja bakūlūgenji babo, munhū ūmò būlī kaya ya bakūlūgenji, pye a bose bandīkwa a mina gabo. Mu lūshikū lwa kwandya mu ng'weji gw'ikūmi bigasha kūgūlola ū mhayo gwenūyo.

¹⁷ Aho lwashika lūshikū lwa kwandya mu ng'weji gwa kwandya, būmala ū kwīlola ī mihayo ya bagosha abo baalī batoola bakīma ba kūfuma mu banhū ba mahanga.

Abo bakabonwa būhūbi

¹⁸ Ū mu ba shibyalīlwe sha bagabīji, a banhū aba hū baalī batoola bakīma ba mahanga gangī: A ba kūfuma mu shibyalīlwe sha ng'wa Yeshua ng'witūnja o ng'wa Yosadaki na baana ba ng'wawe baalī, Maaseya, Eliezeli, Yalibu na Gadalia.

¹⁹ (A benaba bakazunya ū kūlekana na a bake babo, ī shakwinha shabo ī sha kūfunya kūlwa kwihīga yūbiza ng'ondi ya ng'holo kūfuma ng'widaale.)

²⁰ A ba kūfuma mu shibyalīlwe sha ng'wa Imeeli baalī, Hanaani na Zebadia.

²¹ A ba kūfuma mu shibyalīlwe sha ng'wa Halimu baalī, Maaseya, Eliya, Shemaya, Yehieli, na Uzia.

²² A ba shibyalīlwe sha ng'wa Pashuli baalī, Elioenai, Maaseya, Ishimaeli, Nesaneli, Yozabadi, na Elasa.

²³ Abo baalī ba shibyalīlwe sha Balawī baalī, Yozabadi, Shimei, Kelaiya (hū kūhaya Kelita), Petahiya, Yuda na Eliezeli.

²⁴ Ū kūfuma mu bīmbi, Eliashibu. A ba kūfuma mu balang'hani ba ha milyango baalī, Shalumu, Telemu, na Uli.

²⁵ Aba bene ba kūfuma mu Baisilaeli a bangī. Ū mu shibyalīlwe sha ng'wa Paloshi baalīho ba, Lamia, Izia, Malikīya, Miyamini, Eleazali, Malikīya, na Benaya.

²⁶ Ū kūfuma mu shibyalīlwe sha ng'wa Elamu, Matania, Zakalia, Yehieli, Abudi, Yelemosi, na Eliya.

²⁷ Ū kūfuma mu shibyalīlwe sha ng'wa Zatu, Elioenai, Eliyashibu, Matania, Yelemoti, Zabadi, na Aziza.

²⁸ Ū kūfuma mu shibyalīlwe sha ng'wa Bebai, Yehohanani, Hanania, Zabai, na Asilai.

²⁹ Ū kūfuma mu shibyalīlwe sha ng'wa Bani, Meshulamu, Maluchi, Adaya, Yashubu, Sheali, na Yelemoti.

³⁰ Ū kūfuma mu shibyalīlwe sha ng'wa Pahati-moabu, Adina, Kelali, Benaya, Maaseya, Matania, Bezaleli, Binui, na Manase.

³¹ Ū kūfuma mu shibyalīlwe sha ng'wa Halimu, Eliezeli, Ishiya, Malikīya, Shemaya, Shimeoni,

³² Benjamini, Maluchi, na Shemalia.

³³ Ū kūfuma mu shibyalīlwe sha ng'wa Hashumu, Matenai, Matata, Zabadi, Elifeleti, Yelemai, Manase na Shimei.

³⁴ Ū kūfuma mu shibyalīlwe sha ng'wa Bani, Maadai, Amulamu, na Ueli,

³⁵ Benaya, Bedeya, Keluhi,

³⁶ Vania, Melemoti, Eliyashibu,

³⁷ Matania, Matenai, Yaasu.

³⁸ Ū kūfuma mu shibyalīlwe sha ng'wa Binui, Shimei,

³⁹ Shelemia, Nasani, Adaya,

⁴⁰ Makinadebai, Shashai, Salai,

⁴¹ Azaleli, Shelemia, Shemalia,

⁴² Shalumu, Amalia, na Yosefu.

⁴³ Ū kūfuma mu shibyalīlwe sha ng'wa Nebo, Yeieli, Matisia, Zabada, Zebina Yadai, Yoeli, na Benaya.

⁴⁴ Pye a benaba baalī baatoola bakīma ba kūfuma mu mahanga, nīyo bamò babo baalī babyala nabo baana.