Ezekia 9 - Bibilia Ilagano Lya Kale 2015

Kūbūlagwa balamya ba shiikolile

¹ Kwimanīla nigwa wahīlīka n'ilaka lya higūlya alīhaya, “Bing'we benhi ba nsango mu nzengo, egeelagi; būlī ng'wene ize na shilanga shakwe mu nkono.”

² Nūbona bagosha batandatū baliza kūfumīīla kwipandī lya mita gwa kwigūlya, ūyo gūlolelile sukuma; būlī ng'wene ū mu nkono walī na shilanga shakwe sha kūbūlagīla. Na ngosha ūmò azwalile shizwalo sha kitaani, hūna ūtunga ha nkīmbīlī mhembe ya wino bo kwandīkīla walī hamò nabo. Aho bashika bīmīīla bbihī nū ng'walīlò gwa shaba.

³ Ī likūjo lya ng'wa Mulungu wa Isilaeli lyalī lyamala kwīnga a ha Makelubi aho lyikalaga, lyūja ha būshikīlo bo ha nyango go hekalu. Hūna ū SEEBA ūng'witana ū munhū ūyo walī azwalile shizwalo sha kitaani, ūyo walī na mhembe ya wino bo kwandīkīla ha nkīmbīlī gwakwe.

⁴ Ūng'wīla, “Bīta bītaga pye a hose ū mu nzengo gwa Yelusalemu, ūje ūkūbatūūlīlaga meng'ho abo bakapīnīhalaga na kūlīla kūlwa mihayo y'ipelanya īyo īkīītagwa ū mu nzengo gwenūyū.”

⁵ A bangī ūbawīla naligwa; ūhaya, “Nkūūbījagi pye a hose ū mu nzengo, muje mukūbūlagaga, ndūhū kūsaatwa nūūlū kūchīla shigongo.

⁶ Būlagagi pye gete, banamhala, basūmba, banhya, bakīma na a baana; alīyo ose ose ūyo alī na lūmeng'ho yaya ū kūnkuumya. Andījagi ū ng'wipandī lyane lyeela.” Būbandīja a banamhala abo baalī kū būtongi bo hekalu.

⁷ Ūhaya, “Īsosohajagi ī hekalu, gokale mibimba a mabīndo. Jagi!” Būfuma hanze būūkandya kūbūlaga hose pyī ū mu nzengo.

⁸ Aho balībūlaga nane naalekagwa iyene, nūgwa hasī nabundaalile nūlīla, “Ee Seeba MULUNGU! Ūkūbūmala pye ū būshiigo wa Baisilaeli ūmo wīpelanīlilwe gīkī ī Yelusalemu?”

⁹ Ūnishokeja alīhaya, “Ū būbi wa numba ya Isilaeli nī ya Yuda būtaale no būkīlanīgije. Ī sī yookala būbūlagi, nū nzengo gookala wiboneeji. Bakwiwīlaga, ‘Ū SEEBA wīgumanīja ī sī, ū SEEBA atūtūbona.’

¹⁰ Hūna lūūlū nū nene ī liso lyane lītūbachīla shigongo, nūūlū natūbasaatwa na hado yaya; alīyo nakūbenhela kū mitwe yabo pyī īyo bīyīta.”

¹¹ Ū munhū ūyo walī azwalile shizwalo sha kitaani, ūyo walī atungile mhembe ya wino bo kwandīkīla ha nkīmbīlī gwakwe ūshoka; wiza ūhaya, “Nīta gīt'ūmo walī walagīīlīlaga.”