Ezekia 3 - Bibilia Ilagano Lya Kale 2015

Ezekia kūwīlwa ya kwīta

¹ Hūna ūniwīla, “Ng'wana wa munhū, lyaga īsho ūlinhwa, shilyage ī shitabo shenīshi, ūje ūkabawīle a banhū ba numba ya Isilaeli.”

² Ng'hana naasama ū nomo ūninha ī shitabo nashilye.

³ Ūniwīla, “Ng'wana wa munhū, shilyage ī shitabo īshi nalīkwinha shenīshi, yokale ī nda yako.” Nūshilya, ū mu nomo gwane shūnona gītī būūkī.

⁴ Ūniwīla hangī, “Ng'wana wa munhū, jaga lūūlū ī haha ū kū banhū ba numba ya Isilaeli ūkabawīle ī mihayo yane.

⁵ Ūtūtūmagwa kū banhū ba kalūngalūngīle kageni nūūlū lūlīmi lūlambu, alīyo kū banhū ba numba ya Isilaeli.

⁶ Ītī kū mahanga ga banhū bingī ba lūlīmi lūgeni na kalūngalūngīle kalambu, abo ūtūdūla kwitegeleja mihayo yabo. Ūlū ni nalīkūtūma kū banhū ba mbika yenīyo, a benabo ni bakūdegeleka.

⁷ Alīyo a banhū ba numba ya Isilaeli batūkūdegeleka, nguno batatogilwe ū kūnidegeleka ū nene; nguno pyī ī numba ya Isilaeli nambu hangī ndaamu no.

⁸ Alīyo ū bebe naakwītaga kūbiza gīt'ūmò balī a boi; ūlī ndaamu na munhū atī wa kūgwa ng'holò.

⁹ Ū būshū wako nawītaga kūbiza būdaamu no, kūtinda iwe lyose lyose nūūlū līkabiza idaamu na kinehe. Yaya ū kūbogoha nūūlū batizūkūdetemya, nūūlū īkī a boi balī ba numba ya būshitiigwa.”

¹⁰ Ongeja kūniwīla, “Ng'wana wa munhū ī mihayo yane īyo nalīkūwīla īdegelekage, hangī wīlang'hane chiza ū mu ng'holò yako.

¹¹ Jaaga lūūlū ī haha ū kū banhū ba kūfuma kūsī ya ng'wing'we abo balī mu būsaamiwa ūkalūngalūnge nabo. Bawīlage gīkī, ‘Ū Seeba MULUNGU alīhaya gīkī,’ ni badegelekage nūūlū baleme ū kūdegeleka.”

¹² Ū Moyo ūnibūūcha higūlya, nigwa ilaka lya shibagato shitaale ū kū numa yane: Ikūjo lya ng'wa SEEBA līkumīlījiwe ū ng'wipandī lya wikalo bokwe.

¹³ Ī lilaka lyenīlo shalī shibagato sha manana ga shiseeng'wa shipanga gakwikwajaga goi na goi, na sha madandali ayo gaalī gihelile nasho; shalī shibagato shitaale no.

¹⁴ Hūna lūūlū ū Moyo ūnibūūcha higūlya, ūnīnja a henaho, nūja napelanile, ī ng'holò yane īdakile no; nū nkono gwa nguzu go ng'wa SEEBA gūlī hamò nane.

¹⁵ Nūūkashika kū basaamiwa abo bikalaga Teli-abibu, bbihī na Mongo gwa Kebali. Nigasha hamò nabo kwenūko ikanza lya shikū mpungatī nalī sele nakūkumyaga dūhū.

Kūhūgūlwa kwa Baisilaeli

¹⁶ Aho namala shikū mpungatī, gūnizīīla ū mhayo go ng'wa SEEBA gūlīhaya,

¹⁷ “Ng'wana wa munhū, naakwītaga kūbiza nang'hani kūlwa numba ya Isilaeli, hūna lūūlū ūkūyūgwigwa ū mhayo ūyo nalīgūhaya wabahūgūla mu būhūgūji bo kūfuma kūlī nene.

¹⁸ Ū munhū wabūbi ūlū nūng'wīla gīkī, ‘Bebe ūkūcha;’ hūna ū bebe ūleka ū kūng'hūgūla, nūūlū kūnganikīla gīkī īnge ū mu nzīla jakwe ī jabūbi, abūpīje ū būpanga bokwe, ū munhū wabūbi ng'wenūyo akūchīla mu shibi shakwe; alīyo nakūkūbalīla bebe ū lūfu lwakwe.

¹⁹ Gwike ūlū ūng'hūgūla ū munhū wabūbi alīyo ūlema ū kūgalūka īnge ū mu nzīla jakwe ī ja malofu, nūūlū ū mu būbi bokwe, akūchīla mu shibi shakwe; alīyo ū bebe ūkūbiza wabūpījaga ū būpanga wako.

²⁰ “Hama hangī nūūlū munhū ntūngīlīja ūlekana nabo ū būtūngīlīja bokwe wandya kwīta yabūbi, nane nūntūūlīla sha kūng'wipamya ū kū būtongi bokwe, akūcha; īkī ūtang'hūgūlile akūchīla mu shibi shakwe, ī shītwa shakwe shawiza īsho wīta shitizūkīlwa; alīyo nakūkūbalīla bebe ū nsango gwakwe.

²¹ Alīyo hangī ū munhū ntūngīlīja ūlū ūng'hūgūlū gīkī atizīta shibi na ng'hana ūleka ū kwīta ī shibi, ū ng'wenūyo akūpīla gete, nguno wazunyaga ū kūhūgūka, nū bebe ūkūbiza wabūpīja ū būpanga wako.”

²² Ū nkono go ng'wa SEEBA gwalī hamò nane a henaho; ūniwīla, “Būūkaga ūje kū mbūga, nakūjūhooya nang'ho kwenūko.”

²³ Na ng'hana nūbūūka nūja ū kū mbūga, ī likūjo lya ng'wa SEEBA lyalī kwenūko, gītī ī likūjo īlo naalī naalībona kū Mongo gwa Kebali; nūgwa hasī nabundaalile.

²⁴ Alīyo ū Moyo ūningīla, ūnigūngūmūla nīmīīla na magūlū gane, ūniyombya akūniwīlaga, “Jaga ūkilugalīle mu numba yako.

²⁵ Nīyo ū bebe ng'wana wa munhū, ūkūtungwa ngoye, bakūkūbohya ooye ū kūyeela na a banhū.

²⁶ Ū lūlīmi lwako nakūlūdaamīīja kwilangū lya nomo gwako ūbize njomba, ūlemeelwe ū kūbahūgūla nūūlū īkī a boi balī numba ya būshitiigwa.

²⁷ Alīyo būl'ikanza ūlū nūyomba nang'ho, nakūgūlugūla ū nomo gwako; nang'ho ūkūbawīla, ‘Ū Seeba MULUNGU alīhaya gīkī na gīkī.’ Ū wa kwigwa ni igwage, nū wa kūlema ū kwigwa n'alemage; nguno a benaba balī numba ya būshitiigwa.”