Ezekia 16 - Bibilia Ilagano Lya Kale 2015

Lūsumo, Yelusalemu ītī ya kūsanyiwa

¹ Ū mhayo go ng'wa Seeba gūnizīīla,

² “Ng'wana wa munhū, ū nzengo gwa Yelusalemu goolekejage ī shīītīle shago ī sha malofu.”

³ Gūwīlage, “Ū Seeba MULUNGU alīyīwīla ī Yelusalemu gīkī, ī fumo yako nū būbyalwa wako būlī mu sī ya Bakanaani; ū so walī muna Amoli, ū noko walī Ng'hītī.

⁴ Ū mu lūshikū lwa kūbyawa kwako walī ūtasanilwe ū lūlīla lwako, nūūlū koojiwa mu minzī gīkī wele yaya; nūūlū munhu ūtasheshaanījiwe, nūūlū myenda walī ūtakonzeelilwe.”

⁵ Walī atīho wa kūkūchīla shigongo, nūūlū kūkūsaatwa gīkī akwītīle gūmò gwa mihayo yenīyī. Ūkaponyiwa kū mabbaala dūhū, nguno ū mu lūshikū lwa kūbyalwa kwako walī ndalahwa.

⁶ Alīyo ū nene nakabīta bbihī nang'ho, nūkūbona ūlīgalagala mu mininga gako, aho ūlambalalile henaho mu mininga gako nūkūwīla, “Bizaga mpanga!”

⁷ Nakakūgaliila ūfuluma gītī ntī gwa mu malaale, ongeja ū kūkūla ūbiza nsoga no; ūzwa ndutu, nī nzwīlī jako jūlīha, alīyo walī ūtaalī dūūhū manyegu.

⁸ Nahayūbīta lwise lūngī hangī, aho nakūlola nūkūbona gīkī washikile ng'wilika lya banhū kūkūtogwa, nūgoloola ng'wenda gwane nūkūkundīkīja, ūtizikala ūlī dūūhū. Nakakwilahīlīla twizunīlīja ū bebe nū nene, alīhaya Seeba MULUNGU; hūna ūbiza wane.

⁹ Naalī naamala kūkooja na minzī nūkwīngīja a mininga gako, hūna lūūlū nūkūbila na maguta;

¹⁰ nūkūzwīka n'ilinda līsumīīlilwe būlenji būsoga; nūlola nūkūzwalīkīja na shilatū ū kū mhambala jako. Nakakūzwīka shizwalo sha kitaani yawiza, nūkūgumīīla myenda ya mpango ntaale no.

¹¹ Hama nūūkūtūlīla būlenji būsoga no, bangili ja mu makono na ngufu gwa mu nhingo.

¹² Nakakūtūūlīla na sīlī ya kū nindo, nī ja kū matū; nūkūzwalīkīja na ngofila soga no ū kū ntwe gwako.

¹³ Ūbiza wabeelela kīngī nasho, būlenji bo zahabu na feza, na myenda ya kitaani soga, na ya būlūba būdosilwe chiza. Ī shilīwa shako shalī sha būsu būsoga, na būūkī na maguta ga zeituni. Ūkabeela no ūhangama, ūbiza ngole.

¹⁴ Ū lūkumo lwako lūkasambaala ū mu mahanga kūlwa nguno ya būsoga wako. Ū wiza ūbo naalī nakwītīla būkawīta ū būsoga wako būbize būtī na shisembo nūūlū hado; alīhaya Seeba MULUNGU.

¹⁵ Alīyo ūkabūsanya ū būsoga wako, ū lūkumo lwako ū lūsoga ūlūtūmamīla kūbiza malahya. Wandya kūyūng'witīīla būtogwa wako būlī ng'wene ūyo ūbīta; nū būsoga wako būbiza bokwe.

¹⁶ Ūyūsola ī shizwalo shako shimò na shimò, wayūtūūla būlenji ha mapandī gako ga higūlya ga kūlamīja, kūlwa kwītīla hoi mihayo yako ya būmalahya. Ī yenīyo yalī ītigeleelilwe yilonge, nīyo ītī yakwītwa gete.

¹⁷ Nī shikolo sha mpango ntaale ī sha būlenji īsho naalī nakwinha ūshisola, ī sha zahabu na feza. Aho washisola wibeegeja shiikolile sha bamulungu, babize bagosha ūyīta nabo mihayo ya būmalahya.

¹⁸ Ūshisola ī shizwalo shako īsho shisumilwe chiza ūbazwalīkīja, na a maguta gane nū būbbani ūyūbafunīja shitambò.

¹⁹ Nī shilīwa īsho nakwinha, ū būsu ū būsoga, na a maguta ga zeituni, nū būūkī; īsho naalī nakwinha shakūlya, ūyūbafunīja gīkī shibize shitambò sha kūzuukīja. H'ūmo wītīlaga; alīhaya Seeba MULUNGU.

²⁰ Na a baana abo walī wanibyalīla, bagosha na bakīma, ūyūbasola wabafunya shitambò kūlwa kūshilisha ī shiikolile sha kūlamiwa shenīsho. Ū bebe boolī būtakwigelile ū būmalahya wako?

²¹ Nose na a baana bane ūyūbabūlaga wabafunya shitambò kū shiikolile sha kūlamiwa!

²² Ū mu shītīle shako sha malofu pyī ī shose nū būmalahya wako ūtajizūkilwe ī shikū ja ha būdo wako, aho walī dūūhū manyegu, ūkūpandaganaga mu mininga gako.

²³ Ūlī mu kwihīga! Ū bebe ūlī mu kwihīga; alīhaya Seeba MULUNGU. A higūlya ya būbi wako bose ū būngī,

²⁴ ūkizengela ipandī igūngūhu būlī ha nhūng'wanhīlo ya banhū, būlī kwene wibeegeja ipandī lya higūlya lya kūlamīja.

²⁵ Na būlī ha būmanhījo bo nzīla ūzenga ipandī lya higūlya, ū būsoga wako ūyūbūgoola kūlwa būmalahya būkīlanīgije, ūkwiyanikīlaga na kūgūfunya ū mīlī gwako kū būlī ng'wene ūyo alabīte.

²⁶ Wīta mihayo ya būmalahya na Bamisili, a bazenganwa biyo a bamalahya bataale, ūnipelanya no kūlwa wīmīlīzu wako ūbo būtī na lūbīmbī.

²⁷ H'ī chene nakakūgoloolela nkono gwane kūkwinha nsago, nīdoohya ī sī yako, nūkūlekanīja wiboneelwe na bashīke ba Bafilisiti, banishi bako abo bakwikūmbilwe, abo ūkūbagekemaja kūlwa būsoso wa nhūngwa jako.

²⁸ Na a Baashulu ūyīta nabo ī mihayo ya būmalahya, nguno ūtamalaga malusu, hama na haho wamala ī yenīyo nahene ūtafulilwe.

²⁹ Hūna ongeja, ūgalūkīla na kū sī ya Bakalidayo, sī ya basūlūja; alīyo nī chene ūtafulilwe.

³⁰ Yee, ūlī na ng'holò būgokolo būlī; alīhaya Seeba MULUNGU, pyī ī yenīyī wīyīta bebe dūhū; shītīle sha ng'wa malahya atī na būchaamīle!

³¹ Aho wizengela mapandī ga higūlya būlī ha būmanhījo bo nzīla, wibeegeja na mapandī ga higūlya būlī hene aho banhū batūng'wanhīlaga; ūkīnga ū mu kaīle ka bamalahya, nguno ū bebe walemaga nū kūhongwa ī hela.

³² Ū bebe ūlī nkīma ng'wīmīlīzu. Ūyegelile bagosha ba hanze kūtinda ngoshi wako!

³³ Būlī malahya akahongagwa, alīyo ū bebe ūkabinhaga manong'ho pye abo bakakūkoobaga, wayūbenha kūfuma būlī kwene kwiza kwīta nabo mihayo ya būmalahya.

³⁴ Nose ū bebe wipūūganije nabo a bamalahya a bangī, nguno atīho ūyo akakūkoobaga. Ū bebe ūlī kīngī gete, nguno ūkabinhaga shihongeelo, alīyo ū bebe ūtinhagwa nūūlū kī!

³⁵ Alilūūlū, bebe malahya gwigwage ū mhayo go ng'wa SEEBA!

³⁶ Ū Seeba MULUNGU alīhaya gīkī, Kūlwa nguno ya kwitagūla būsoso wa kwikūmvwa kwako, ūzuula na kū būtongi wa bashihya bako ūkwītaga nabo mihayo ya būmalahya; na kūlwa nguno ya shiikolile shako sha malofu, īsho washifunījaga mininga ga baana bako,

³⁷ nakūbabilinga pye a bashihya bako abo walūyegaga nabo; abo ūbatogilwe na a babo ūbakolilwe. Nakūbabilinga pye a bose kūfuma hose hose hūna nakūzuuje kū būtongi wabo bakūbone ūlī dūūhū pyī ū mīlī gwako.

³⁸ Nakūkwinha nsango ūyo gwigeleelilwe kū bakīma bashihani na babūlagi ba banhū; a mininga ga shiilī kūlwa būpelanu na wilu wa būdaki bone nakūgenhela halī bebe.

³⁹ Hanuma ya henaho nakūkūponya mu makono ga bashihya bako bagaseesagūle a mapandī gako a magūngūhu, na a mapandī gako ga higūlya bagakenaagūle. Bakūkūzuuja ī shizwalo shako, bakwīngīje nī shikolo shako sha būlenji, bakūleke ūlī makono dalali hangī ūlī dūūhū.

⁴⁰ Bakwiza n'ibità lya kūkūdumīla bayūkūponda mawe, bakūbbutagūle mapingili mapingili na mapanga gabo.

⁴¹ Ī numba jako bakūjipemba moto, bakwinhe nsango kū būtongi wa bakīma bingī. Nakūbūmala mu gīko ū būmalahya wako, ooye nū kūbahonga a bashihya bako.

⁴² Hūna ū būpelanu bone ūbo nakūpelanīlile būkūpola, nū būdaki bo wilu bone būkūgalūka būkwīngīle; nakūlembeela, nooye ū kwikala nasaayile.

⁴³ Īkī ūtajizūkilwe ī shikū ja ha būdo wako, alīyo ūnisaayīcha kūlwa yose īyī, īyo wīyīta nakūkūtūūlīla ha ntwe gwako ng'hana; alīhaya Seeba MULUNGU. Ī gīsī a higūlya ya mihayo y'ipelanya pyī ī yose īyo, ūtongegije ho na lūhya?

⁴⁴ Būlī munhū ūyo atogilwe kūtūmamīla lūsumo mu kūkūhaya bebe akūlūtūmamīla ūlū, Nzīla ya nshīke īkatalagwà na nina.

⁴⁵ Ū bebe ūlī nshīke wakwe gete ū noko, ūyo wal'andalahile ū ngoshi na a baana bakwe. Hama ūlī ng'wanong'wabo gete a bakūlūyo, abo baalī babadalahile bagoshi babo na baana babo. Ū noko walī Ng'hītī, ū so ng'wene muna Amoli.

⁴⁶ Ū nkūlūyo walī Samalia, wikalaga hamò na bashīke bakwe ipandī lya sukuma yako; ū nzunayo ūyo wikalaga na bashīke bakwe dakama yako ū ng'wene walī Sodoma.

⁴⁷ Gwike ū bebe ūtafulagwa ū kūgelela kūjilondeela ī nzīla jabo, nū kwīyīta ī y'ipelanya īyo bīyītaga a boi, alīyo ū mu nhūngwa jako pyī ī jose, ū bebe wiyoolekije gīkī ūlī wabūbi no kūbaheeba a boi.

⁴⁸ Alilūūlū, ū Seeba MULUNGU alīhaya: Ūmo nene nalī mpanga, managa gīkī ū nzunayo ū Sodoma na a bashīke bakwe batīītile īyo ūkwītaga ū bebe na a bashīke bako.

⁴⁹ Bayīnga hūna yene, ī shibi sha ng'wanong'wing'we ū Sodoma shalī īshi: Ū wei na a bashīke bakwe baalī bikumīlīja, baleebilwe shizeeze, na baalī nasho pyī ī sha kwigunanhīla; gwike baalī batatogilwe ū kūbagunanha a bahabī na a bagayiwa.

⁵⁰ Baalī badooshi no, hangī bīīti ba mihayo y'ipelanya ū kū būtongi wane. Hūna lūūlū nakabīnja gīt'ūmò ūkabonela.

⁵¹ Ū Samalia ū ng'wene atashikile nūūlū a ha nusu ya shibi īsho washīta ū bebe. Ī y'ipelanya īyo wīyīta ū bebe yabūbi no kūbaheeba a boi, nose kūlwa yose yenīyī, wabenhelegije kūbi gīkī batūngīlīja.

⁵² Alilūūlū, gabūūchage a magooke gako, nguno a baana bang'wing'we wababeegegije nzīla ya kūbi gītī batūngīlīja kūkūheeba ū bebe. Haho lūūlū, minyiagwa minala ūgabūūche a magooke gako; nguno a baana bang'wing'we wabīītile kūbi gīkī balī batūngīlīja.

Sodoma na Samalia kūshokejiwa mbango

⁵³ Gwike ī chene ū Sodoma na a bashīke bakwe nakūbashokeja ī jabo, pyī nū Samalia na bashīke bakwe; nū bebe nakūkūshokeja ī jako,

⁵⁴ gakūminye a magooke gako; ūkoye na minala kūlwa yose īyo wīyīta ūkūbalūngūjaga.

⁵⁵ Ū nzunayo ū Sodoma na a bashīke bakwe nū nkūlūyo ū Samalia na a bashīke bakwe bakūshoka hangī ū mu mbika jabo ī ja kwandya; nū bebe nang'ho na a bashīke bako mukwīshokela ī mbika ying'we ūmo ng'walī ī kwandya.

⁵⁶ Ū mu shikū ja wikumīlīja wako ū bebe, walī ūtagemaga nūūlū kūlīhaya ī lina lya ng'wanong'wing'we ū Sodoma!

⁵⁷ A makanza gene ū būbi wako boolī būtaalī ū koolechiwa hape; alīyo ī haha nang'ho bakūkūsondagūlaga a bashīke ba ng'wa Edomuu na a bazenganwa bichabo, na a bashīke ba Bafilisiti; nīyo pye a bazenganwa biyo abo bakūpīndije hose hose.

⁵⁸ Ūkūgūbūūcha ū nsango gwa lūhya lwako nī shītīle shako ī sh'ipelanya; alīhaya SEEBA.

⁵⁹ Alichene, ū Seeba MULUNGU alīhya gīkī, Nakūkwītīla gīt'ūmo īkwigeleelilwe, nguno ya kūshidalaha ī shilahīlo shane, ūlīkenaagūla ī lilagane.

⁶⁰ Gwike nakūlizūkwa ī lilagane īlo nakabeeja nang'ho mu shikū ja ha būdo wako, hangī nakūbeeja nang'ho ilagane lya welelo na welelo.

⁶¹ Hūna ūkūjizūkwa ī nzīla jako ūding'we minala ūlū ūlībanukūla a baana bang'wing'we, a bataale na a bado bako. Nakūbīīta babize gītī bashīke bako, alīyo ītī gīt'ūmo twalī twizunīlīgīja ū ng'wilagane lyane nū bebe.

⁶² H'ī gīko lūūlū, nakūbeeja ilagane nū bebe, hūna ūkūdeeba gīkī ū nene nalī SEEBA,

⁶³ Ūlū nūbeeja isangī kūlwa nguno yako ū mu yose īyo wīyīta, ūkwizūkwa ūding'we minala; ūtalahaya mhayo hangī kūlwa minala yako; alīhaya Seeba MULUNGU.