Esita 4 - Bibilia Ilagano Lya Kale 2015

Bayudaya kūlīla ng'hūngū

¹ Ū Modekai aho wīdeeba pyī īyo īkahelwa yenīyo, ūtandūla ī shizwalo shakwe, ūzwala magūnīla, wisamagūlīla na mabu. Hūna ūja ū mu nzengo kūnū akūlīlaga ng'hūngū na būpīna būtaale, n'ilaka lya higūlya.

² Ūja ūūkashika a ha mita gwa ha ng'wa ntemi, wikala hanze; nguno ū munhū ūyo azwalile shizwalo sha magūnīla walī atazunīlījiwe ū kwingīla ū mu mita gwa ha ng'wa ntemi.

³ Būlī mu sī yene shabizaga ūlū shashika ī shilagīlo sha ntemi, a Bayudaya batandūkaga kūlīla ng'hūngū, būyūfunga, na būbiza banhū ba kwikala bakūlījiagwa būpīna dūhū; nīyo bingī babo būyūdīīla balambalalile ha magūnīla na mu mabu.

Modekai kūlomba būgunanhi bo ng'wa Esita

⁴ Ū ngole Esita aho bang'wīla a batūmami bakwe a bakīma, na a basoloolwa, akapīnīhala no; ūntūmīla shizwalo ū Modekai akazwale, agazuule a magūnīla ayo walī azwalile; alīyo ū Modekai atashanukūlile.

⁵ Hūna ū Esita ūng'witana Hasaki, ūmò wa basoloolwa ba ntemi, ūyo walī wasolwa kūyūngunanha; ūnagīla aje akagīsīlīje, amane īyo yankoyaga ū Modekai, na ni nguno kī.

⁶ Na ng'hana ū Hasaki ūja ū kūlī Modekai, walī mu gwalugwa ya mu nzengo, a ha būtongi bo mita gwa kwingīla ng'wa ntemi.

⁷ Ū Modekai ūng'wīla yose īyo yalī yang'wilongela, pye nī hela ījo walī wahaya ū Hamani gīkī akūjitūūla ū mu mfuko gwa ntemi, kūlwa kūkenaagūlwa kwa Bayudaya.

⁸ Nī nyalūba īyo yalī yandīkwa kūlwa kūbakenaagūla a Bayudaya, īyo yalī yasambaajiwa hose pyī ū mu nzengo gwa Susa, ūng'winha aje akang'olekeje ū Esita, ūng'wīla akansomboolele chiza ī mihayo yenīyo. Na gīkī akankomeleje ū Esita aje akibone nū ntemi ang'wikūmbīlīje na kūbalombela a banhū bakwe bachīlwe shigongo.

⁹ Ū Hasaki ūja ng'hana ū kūlī Esita, ūūkansomboolela īyo akīhaya ū Modekai.

¹⁰ Nang'hwe ū Esita ūntūma hangī aje akang'wīle gīkī,

¹¹ “A batūmami ba ntemi, na a banhū ba mu sī jose ījo ajisugile ū ntemi, bamanile gīkī munhū ose ose, abize ngosha nūūlū nkīma, ūlū ūja kwibona nū ntemi ū ng'wibīndo lya mu gatī, alīyo atitanilwe, ū ntemi alī na shilagīlo shimò dūhū, ū munhū ng'wenūyo abūlagwe. Gūlīho mhayo gūmò dūhū ūyo gūdūgije kūpīja munhū, ū ntemi ūlū ūng'olota ū munhū ng'wenūyo na nang'ha gwakwe gwa zahabu. Alīyo ī haha jabītaga shikū makūmi adatū ū nene nataalī ū kwitanwa kūja ū kūlī ntemi.”

¹² Ū Modekai aho wawīlwa ī mihayo ya ng'wa Esita,

¹³ ūbawīla bashoke koi bakang'wīle, “Ūtiganikage gīkī ū bebe īkī ūlī ng'wikūlū lya ntemi h'ūkūpīla bebe iyene dūhū ū mu Bayudaya a bose.

¹⁴ Nguno ūlū ūlahuumūle ū ng'wikanza lyenīlī, a Bayudaya bakūpandīka kwifuula na būpīji kūfuma mu nzīla yīngī, alīyo ū bebe nī numba ya ng'wa so mukūyagaala. Ī gīsī nani ūyo amanile, hamo wingīlile ū ng'wikūlū kūlwa nguno y'ikanza gītī lyenīlī?”

¹⁵ Hūna ū Esita ūbawīla bakang'wīle ū Modekai gīkī,

¹⁶ “Jaga ūkababilinge pye a Bayudaya abo balī mu nzengo gwa Susa, mufunge kūlwa nguno yane. Yaya ū kūlya nūūlū kūng'wa, ikanza lya shikū idatū līīmi na būjikū; nū nene nakūfunga na a batūmami bane a bakīma, gīt'ūmo mulīītīla a bing'we. Ū gwenūyū ūlū gwamala ū kwītwa, nakūja nakamone ū ntemi, nūūlū īkī ī shilagīlo shilemile. Ūlū icha līlīho, yene nakūcha!”

¹⁷ Ū Modekai ūja ūkīīta ng'hana būlī mhayo ūyo akalagīīlwa na Esita.