Esita 3 - Bibilia Ilagano Lya Kale 2015

Hamani kongejiwa ikūjo

¹ Hanuma ya mihayo yenīyī, ū ntemi Ahasuelo akang'ongeja ī likūjo ū Hamani ū mu būsugi bokwe, ūng'winha isumbī ly'ikūjo kūbaheeba a bana ng'oma biye.

² Hūna pye a batūmami ba ntemi a ba ha mita būyūng'winamīla, kūlwa kūng'winha ikūjo, nguno ū ntemi akalagīla ītīlwe gīko. Alīyo ū Modekai walī atinamaga, nūūlū koolecha ikūjo ū kūlī we yaya.

³ Nose a batūmami ba ntemi abo baalī a ha mita būmūūja ū Modekai, “Nibūlī ū bebe ūshidalahile ī shilagīlo sha ntemi?”

⁴ Jikakwīla ī ng'hangala bakūng'wīlaga ū mhayo gwenūyo, alīyo ū wei walī walema ū kwīta ūmo bahayīlaga. Nose būng'wīla ū Hamani, babone ūlū gīkī ī mihayo ya ng'wa Modekai īkūngunanha īmīīle, nguno akasangwa wabawīlile gīkī ū wei Nyudaya.

⁵ Ū Hamani aho wamona ū Modekai atinamaga ū kū būtongi bokwe, nūūlū atoolechaga ikūjo ū kūlī we, akapelana no.

⁶ Nīyo aho wadeeba gīkī ū Modekai walī Nyudaya, ī liganiko lya kūgelela kūngoloolela nkono Modekai iyene akalīdalaha no. Ū Hamani ūkooba nzīla ya kūbamala pye a banhū b'ihanga lya ng'wa Modekai, pye a Bayudaya hose hose ū mu būsugi bo ng'wa Ahasuelo.

Hamani kūbilumīla ng'haya Bayudaya

⁷ Ū mu ng'weji gwa kwandya, ū ng'weji gwa Nisani, mu ng'waka gw'ikūmi n'ībīlī gwa būsugi bo ng'wa Ahasuelo, būtūlīja mbale, h'ī Puli; nū Hamani alīho alolile, bakoobaga lūshikū na ng'weji. Gūsolwa ng'weji gw'ikūmi n'ībīlī, hū ng'weji gwa Adali.

⁸ Hanuma ya henaho ū Hamani ūng'wīla ū ntemi Ahasuelo, “Līlīho ihanga lya banhū līsambaalile hose hose ū mu būsugi wako, liguulanije ū mu banhū pye a bose būlī kwene ū mu sī ījo jilī ha sīlīlī ya būsugi wako. Ī nhūngwa ja banhū benabo jilekanile nī ja banhū a bangī pye a bose; nīyo nī shilagīlo sha ntemi batashidīlīlaga; nose ītīho solobo yose yose ū ntemi ū kwiyūmīlīja kwikala nabo a banhū benabo.

⁹ Ūlū gūlīnyeja ū ntemi ni afunyage shilagīlo bamalwe pye, ū nene nakūtūūla feza ū mu mfuko gwa ntemi, jikīlile a ha būdito wa kilo shihūmbī magana adatū na makūmi anè, balinhwe abīīti baago ū nīmo gwenūyū.”

¹⁰ Ū ntemi walī azwalile ū kū lwala lwa nkono gwakwe sīlī ya kūmeng'hela, wīyīnja ūng'winha ū Hamani ū muna Agagi, ūyo walī ng'wanishi wa Bayudaya.

¹¹ Ūng'wīla ū Hamani, “Jilekage ī hela, alīyo a banhū benabo bīītīlage gīt'ūmo ūlībonela yigeleelilwe.”

Shilagīlo sha kūbamala Bayudaya

¹² Mu lūshikū lw'ikūmi n'idatū lwa ng'weji gwa kwandya, a bandīki ba ntemi bitanwa. Pyī īyo akīlagīla ū Hamani bīyandīka mu nuguta ja banhū ba mu sī jose, na ndīmi ja banhū bose, ītwalwe ū kū baanangwa ba ntemi na a basugi ba sī jose, na a bana ng'oma ba kūfuma mapandī gose. Ī nyalūba jenījo jikandīkwa mu lina lya ntemi Ahasuelo ng'wenekīlī, hūna jūtūūlīlwa nū lūmeng'ho lwa sīīlī yakwe.

¹³ Hanuma būtūng'wa banhū būjisambaaja ī nyalūba jenījo, hose pyī ū mu sī ījo jalī ha sīlīlī ya būsugi bokwe ū ntemi. Jalī jilagīlile gīkī a Bayudaya bakenaagūlwe, babūlagwe, na kūmalwa pye a bose gete, bado na bataale; na a bakīma na a banīgīnī. Bamalwe mu lūshikū lūmò pye a bose, lūshikū lw'ikūmi n'idatū ng'weji gw'ikūmi n'ībīlī, ū ng'weji gwa Adali; nī shikolo shabo shisolwe pyī ī shose.

¹⁴ Ī mihayo yenīyo yandīkwa, yūtūūlwa ū mu sī pyī ī jose, gīkī shītwe kūbiza shilagīlo, hūna a banhū ba mahanga gose bamanīkījiwe, bandye kwibeeja beeja kūlwa lūshikū lwenūlo.

¹⁵ A banhū abo bakatūng'wa būja wangū, nguno shalī shilagīlo sha ntemi; nū mu nzengo ntaale ū gwa Susa shūfunyiwa ī shilagīlo shenīsho. Hūna ū ntemi nū Hamani bigasha kūng'wa, alīyo a banhū a bangī ū mu nzengo būzwangana no.