Danyeli 8 - Bibilia Ilagano Lya Kale 2015

Danyeli na shakoolechiwa sha Ng'ondi na Ngulyati

¹ Mu ng'waka gwa kadatū gwa būsugi bo Ntemi Belishaza, ū nene Danyeli nakabona shakoolechiwa, a ha numa ya shisho shaalī shanilongela.

² Ū mu shakoolechiwa shane nakibona nalī mu ng'hambī ya kūpīlīla, ya mu nzengo gwa Susa mu sī ya Elamu. Ū mu shakoolechiwa naalī kū mongo gwa Ulai.

³ Aho naponya a miso nūbona ū kū būtongi bone ng'ondi īlī na mapembe abīlī, yīmīīlaga ha ng'hilimvwa ya mongo; a mapembe gayo gaalī malīhu no. Līmò lya mapembe genayo lyalī ilīhu kūtinda, nīyo līkazwa numa.

⁴ Nīyiloleela ī ng'ondi īkūmanaga yūpama, yūpama īlolile ng'weli, yūpama īlolile na sukuma, hama yūpama īlilole na dakama. Yalī ītīho shiinū ya kwīma kwilwisha nayo, yaya nūūlū ū kūpīja dūhū ū kwīnga ū mu nguzu jayo. Yītaga ūmo yalī ītogelilwe, kūnū īkoolechaga ū būdūla wayo.

⁵ Aho nataalī nūgwiganika ū mhayo gwenūyū, kwimanīla nabona ngulyati y'ipembe līsongokile ha gatī gatī ya miso gayo. Īkiza īlīfumīīla mu ng'weli īkūtandūlaga mabbaala ga sī ngima, alīyo ītūkuumyaga a hasī.

⁶ Yūnsanga ū muna ng'ondi wa mapembe abīlī, ūyo naalī namona īmīīlile ha mongo, yūshikīla kūndumīla na būdaki būtaale no nīyo.

⁷ Nībona īlīyūmpama ū muna ng'ondi na būdaki būtaale no, yūmpamagūla kūshisha gūbīnzagūka a mapembe gakwe a gose būbīlī wago. Ū muna ng'ondi walī atī na būdūla bo kwigunanha; ī ngulyati yūntaalīka hasī yūntoba īntobile, walī atīho ū wa kwīguna ī ng'ondi yenīyo ū mu nguzu ja ngulyati yenīyo.

⁸ Ī ngulyati yenīyo yūbiza sugi nhaale, alīyo ū būdūla wayo aho boshika kwigūlya gete, ī lipembe lyayo ī litaale lyīnīlo lyūmogoka, a ha ng'wanya gwalyo gūūzwa mapembe anè ga kūloleelela kūle; gūūkūla galolile kū mhandī inè ja miyaga ya kwigūlū.

⁹ Lyūzwa ipembe līngī kūfuma a ha līmò lyago; lyandya gītī ido, alīyo lyūbiza na būdūla būtaale ū kūlola ī dakama nī kīya, nū kūlola ū kū Sī ī Soga.

¹⁰ Līkakūla no kūshisha lyūkuumya mabità ga ng'wigūlū, nīyo sonda jimò lyūjiholomolela hasī, hūna yūjipandagīla.

¹¹ Yigūngūhya na kwiyīta kūbiza gīt'ūmo alī ū Nsugi ū ntaale wa mabità; yūng'wīngīja nī shitambò īsho shikafunyiagwa būlī lūshikū, nī likūjo ly'ipande lyakwe lyeela lichiwa ha sīlīlī.

¹² Kūlwa nguno ya būgomi, ī libità lya beela nī shitambò sha būlī lūshikū shikatūūlwa mu makono gayo; yūyūbeeja būlī nīmo gwaja ūmo ītogelilwe, nī ng'hana yūponyiwa sagala.

¹³ Ī likanza lyenīlo nūng'wigwa ng'wela ūmò alīlūngalūnga, na ng'wela ūngī ūng'wīla, “Ī shakoolechiwa shenīshi shikūsola ikanza kī hū shishikīlījiwe, īsho shiloolecha kwīnjiwa kwa shitambò sha būlī lūshikū, nī sha būgomi ūbo būkenhelejaga būkenaagūji, nī sh'ipandī lyeela kūfunyiwa hamò n'ibità lya beela gīkī shipandagīlwe ha sī?”

¹⁴ Ūniwīla, “Jikūbīta shikū shihūmbī shibīlī na magana adatū, mhīndī na diilū, hūna ī lipandī lyeela līkwejiwa būpya.”

Kūwīlwa makūlū ga shakoolechiwa

¹⁵ Ū nene Danyeli aho nataalī nūshilola ī shakoolechiwa, na nakūgemaga kūshiitegeleja, nakahayimanīla a ha būtongi bone wīmīīla ūmò wa kūbiza gītī munhū.

¹⁶ Niigwa ilaka lya munhū kūfuma ū kū mongo gwa Ulai alitana, “Gabulieli ng'wīlage ū munhū ng'wenūyū a makūlū ga shakoolechiwa.”

¹⁷ Aho wegeela a h'ipandī īlo naalī nīmīīla nogoha, nūūgwa nachimīgije hasī. Ū wei ūniwīla, “Ng'wana wa munhū, deebaga gīkī ī shakoolechiwa shenīshi shilī sh'ikanza lya kū būkalīkījo.”

¹⁸ Aho alīniyombya nakalaala tūlo nhaale, ū būshū bone nachimīgije hasī, hūna ūnikuumya ūnīīmīlīja nīmīīla na magūlū gane.

¹⁹ Ūhaya, Nakūkūwīla īyo īkwilonga ū kū shikū ja kū būtongi ū ng'wikanza lya koolechiwa būpelanu, nguno ī shakoolechiwa shenīshi sh'ikanza īlo līhelilwe lya kū būkalīkījo.

²⁰ Ī ng'ondi ya mapembe abīlī īyo wībonaga, īlī ha ng'wanya gwa batemi ba Būmeedi na Būajemi.

²¹ Ī ngulyati ya būyenze ng'wene ntemi wa Būyunani, ī lipembe ī litaale īlo lyalī ha gatī ya miso gakwe ng'wene ntemi wa kwandya.

²² A mapembe ay'anè ayo gaalī giza a ha ng'wanya gwipembe ī līmò īlo lyaalī lyamogoka, galī ha ng'wanya go būtemi būnè bo būkūbūūka kūfuma ū ng'wihanga lyenīlo, alīyo būtūbiza na nguzu gīt'ū būsugi ū bo kwandya.

²³ Ū kū makanza ga kū būtongi ū mu būsugi wabo, a bagomi ūlū būkangīlīja no no no ū mu būbi, akwilonga ntemi atakalalagwa, ūyo atīko kūliganyiwa mhayo gose gose.

²⁴ Akūbiza na nguzu ningī no, alīyo ītī mu būdūla bokwe. Akūkenaagūla na kakenaagūlīle ka kūkamaaja, nīyo būlī gwene ūyo ūgwīta gūkūshikīīla. Akūbakenaagūla a banhū ba būdūla na a beela.

²⁵ Kūlwa mbika ya katongeelele kakwe akwenheleja būnyecha wiyongeje, alīyo ū wei akwibona gīkī alī higūlya no. Akūbisanganīja banhū bingī ababipye ng'wikanza īlo bakwiganikaga gīkī balī mu mhola; hama akūbūūka kwilwisha nū Ntaale wa basugi. Alīyo akūkenaagūlwa mu būtūtūmamīla nguzu ja banhū.

²⁶ Ī shakoolechiwa sha makanza ga mhīndī na ga dilū īsho winhagwa sha ng'hana ī shenīsho, gwike shibambīlage ī shakoolechiwa shenīsho, nguno ī shoi sha kū shikū ja kūle kū būtongi.

²⁷ Ū nene Danyeli nakanoga no, nūlaala mu būlīīlī nalī nsaatu ikanza lya shikū būlebe. Hanuma ya henaho nūbūūka nandya hangī ī milīmo ya ntemi. Shikanikamaaja no ī shakoolechiwa, shalī shinikīlile ū witegelegeje.