Danyeli 6 - Bibilia Ilagano Lya Kale 2015

Danyeli kūkolwa na batūmami biye

¹ Ū Dalio akabona chiza kūsolanhya banhū igana na makūmi abīlī abatūūle ha būsugi pye a hose ū mu būtemi bokwe,

² babize ho na batongeeji badatū a higūlya yabo; ūmò wabo Danyeli. A batongeeji būlagīlwa kūyūbatonga a basugi ī ya kwīta, ū ntemi atizūjimīīja ī sabo jakwe.

³ Alilūūlū ū Danyeli akabaheeba pye a batongeeji biye, na a basugi kūlwa nguno walī na moyo ng'wiza no; nose ū ntemi ūhela gīkī akūntūūla kūbiza higūlya ya būtemi pyī ū bose.

⁴ Ū mu shikū jenījo a batongeeji na a basugi būyūgema kūbeeja nzīla gīkī bapandīke nguno ya kūmūūlīla ū Danyeli kūbītīla mu mbika ya katūmamīle ka milīmo yakwe ū mu selekali, alīyo batadūgije. Batamonile na būbi bose bose, nguno ū wei walī munhū nsanyiwa jigi, walī atī na nkono nīhu, nūūlū būtūdīlīla.

⁵ Nose a banhū benabo banoga biwīla, “Tūtūpandīka nzīla ya kūmūūla ū Danyeli ng'wenūyū, numho gūbize mhayo gwa kūbītīla mu shilagīlo sha ng'wa Mulungu wakwe.”

⁶ Hūna lūūlū a batongeeji na a basugi būja ū kūlī ntemi balī kaganda; būkang'wīla, “Baba Ntemi Dalio, kūlaga ūhangame!

⁷ A batongeeji ba ng'wikūlū, na a batwaale na a basugi na a baganikīji ba ntemi, na a bataale ba basugi; pye a bose bizunīlīgije gīkī ū ntemi atūūle mhayo, nīyo agūlang'hane na nguzu ja shilagīlo; gwa gīkī ūyo alalombe kūlī mulungu nūūlū kūlī munhū ūngī ose ose ng'wikanza lya shikū makūmi adatū kwandīja haha, ūlū ītī kūlī bebe dūhū baba ntemi, akūponyiwa ng'wipilinga lya mashimba.

⁸ Alilūūlū baba ntemi, funyaga ī shilagīlo, nīyo ūshandīke shitizūbiza sha kūgalūka galūka; shibize gīt'ūmò bakajīlaga na kale dūhū a Bameedi na a Baajemi.”

⁹ Na ng'hana ū Ntemi Dalio ūgūtūūla ho ū mhayo, nīyo ūgwandīka.

Danyeli kūponyiwa mu mashimba

¹⁰ Ū Danyeli aho wamana gīkī ū mhayo gwenūyo gwafunyiagwa, ūja kū ng'wakwe ūūkalinha kū chumba sha kū golofa, īsho madilisha gasho gaalī galolelile kū lwande lo Yelusalemu. Ūyūtuja mazwi ng'hangala idatū būlī lūshikū kūlomba, na kūnūmba Mulungu wakwe, gīt'ūmo wītīlaga na kale.

¹¹ Hūna a banhū benabo būja koi balī kaganda, būnsanga ū Danyeli alīlomba kūlī Mulungu, na kūlomba būgunanhi bokwe.

¹² Būja ū kūlī ntemi būūkahooya nag'hwe ū mhayo gwa shilagīlo shakwe sha nyatemi. Būhaya, “Ūtafunije shilagīlo kūhaya gīkī mu shikū makūmi adatū kwandīja haha ūyo ūlomba kūlī mulungu ose ose nūūlū munhū ūngī, ūlū ītī kūlī bebe dūhū baba ntemi, akūponyiwa ng'wipilinga lya mashimba?” Ū Ntemi ūshosha, “Ī shilagīlo h'ūmo shīmīīlīlile dūhū; ūmo bakajīlaga na kale a Bameedi na a Baajemi, ndūhū kūshoka numa.”

¹³ Hūna būng'wīla ū ntemi, “Ū Danyeli, ūyo alī ūmò wa basaamiwa ba kūfuma kū sī ya Yuda, atakūdīlīlile nūūlū hado baba ntemi, nūūlū ī shilagīlo īsho washandīkile yaya gete. Ataalī akūlombaga ng'hangala idatū būlī lūshikū.”

¹⁴ Ū ntemi aho wagwigwa ū mhayo gwenūyū akakoya no; ī ng'hūmbū jakwe jūlola ha kūmpīja ū Danyeli; akatūmamīla būlī nzīla nose lyūloka ī līīmi.

¹⁵ A banhū benabo būnsanga hangī ū ntemi balī ū ng'wigelè lyabo; būūkang'wīla, “Izūkaga baba ntemi gīkī ūmo bakajīlaga na kale a Bameedi na a Baajemi, katīho kahelele nūūlū shilagīlo īsho shidūgije kūgalūchiwa alīyo shitūūlilwe na ntemi.”

¹⁶ Nose ū ntemi ūlagīja, būng'wenha ū Danyeli būmponeja ū ng'wipilinga lya mashimba. Ū Ntemi ūhaya, “Ū Mulungu wako ūyo ūkantūmamīlaga būlī gwa ni akūpījage!”

¹⁷ Lyenhwa iwe lyūtūūlwa a ha nomo gwipilinga lyūdamiwa nde nde nde; hūna ū ntemi ūlītūūlīla lūmeng'ho lwa sīlī yakwe, na a banikūlū bakwe būlītūūlīla meng'ho ja sīlī jabo. Ī mihayo ya ng'wa Danyeli yūbiza ītī na būgalūkīje.

¹⁸ Hanuma ya henaho ū ntemi ūshoka kwikūlū, ūūkakeyūla, hama ataliile; nūūlū shose shose sha kūnyeja atenhelilwe.

¹⁹ Aho wela dūhū ī gīkī ū ntemi ūbūūka, ūfuma wihuuta ajile ū kwipilinga lya mashimba.

²⁰ Kwegeela dūhū a hipilinga ūng'witana ū Danyeli nilaka lya būpīna, “Danyeli ntūmami o ng'wa Mulungu mpanga, ū Mulungu ūyo ūkantūmamīlaga gwa wakūpījaga ū kū mashimba?”

²¹ Ū Danyeli ūshosha, “Baba ntemi, kūlaga ūhangame!

²² Ū Mulungu wane wantūmaga malaika wakwe wīmumya ī milomo ya shimba. Jitanīītile mhayo, nguno ū kū būtongi bokwe natī na shisembo, nūūlū kū būtongi wako baba ntemi nataalī kūhūba.”

²³ Ū Ntemi akayega no, ūlagīja wīnjiwa ū Danyeli ū ng'wipilinga. Aho wafunyiwa ū Danyeli ū ng'wipilinga kaalī katīho nūūlū ka būchūūbūke kado ū kū mīlī gwakwe, nguno walī ansanije ū Mulungu wakwe.

²⁴ Ū ntemi ūlagīla a banhū abo baalī bamūūla kūlwa wilu ū Danyeli benhwa, biza būponejiwa ū ng'wipilinga lya mashimba, na a bake babo na a baana babo. Aho bataalī nūūlū kūshika a hasī ū ng'wipilinga, a mashimba gūbasaasagūla, na a maguha gabo gūūgapaanagūla pye a gose.

²⁵ Hūna ū Ntemi Dalio wandīka kūlwa banhū bose, ba mahanga gose, na ndīmi jose; hose pye ū mu sī, Ūhaya, “Ngw'īlūkīlwe no no no!

²⁶ Nafunya shilagīlo gīkī, hose hose ū mu būtemi bone a banhū shibigelile kūng'ogoha na kūnkūja ū Mulungu o ng'wa Danyeli. Nguno alī Mulungu mpanga, hangī alī wa welelo na welelo; ū būtemi bokwe būtī bo kūkenaagūlwa, ū būsugi bokwe būtī na ngelelo.

²⁷ Akakomoolaga na akapījaga; ng'wigūlū nū mu sī akabeejaga shimanīkījo na shakūkumya. Wampīgije ū Danyeli kūfuma mu nguzu ja shimba.”

²⁸ Hūna lūūlū ū Danyeli wīlūkīlwa ningī no ū mu būsugi bo ng'wa Dalio nū būsugi bo ng'wa Koleshi (Kulo) wa Būajemi.