Biblia Todo Logo
Bìoball air-loidhne

- Sanasan -

Danyeli 5 - Bibilia Ilagano Lya Kale 2015


Ntemi Belishaza na nkono kwandīka ha ndugu

1 Ntemi Belishaza akabeeja shigukulu shitaale kūlwa banikūlū bakwe shihūmbī shimò; ūyūng'wa nabo divai.

2 Ū Belishaza aho akūng'waga ī divai yakwe, akīīta ūlagīja gīkī shenhwe ī shikombe sha zahabu nī sha feza, īsho ise Nebukadineza walī washīnja mu hekalu ya Yelusalemu, gīkī ū ntemi na a banikūlū bakwe na a bake bakwe, na a bakīma bakwe a bangī bize bashing'wele.

3 Na ng'hana shenhwa ī shikombe sha zahabu īsho shaalī shinjiwa Yelusalemu mu hekalu ya ng'wa Mulungu, hūna ū ntemi na a banikūlū bakwe na a bake bakwe, na a bakīma bakwe a bangī bandya kūshing'wela.

4 Aho bakūng'waga būyūbakumīlīja bamulungu ba zahabu, ba feza, ba shaba, na ba chūma, na ba mantī na ba mawe.

5 Kwimanīla jiilonga nzwala ja nkono gwa munhū gūkwandīkaga ha būteleleje bo ndugu hihī nikīndīkīlo lya tala, ū mu numba ya h'ikūlū. Ū Ntemi ūgūkalalīla ū nkono aho gūkwandīkaga.

6 Ū būshū bokwe būjilūka, akogoha no ūyūdetema kūshisha a mazwi gakwe gūyitūlanya; a magūlū gakwe gūyogoma.

7 Ū ntemi ūhīlīka alitana benhwe bachūja na baloji ba sonda na baboni; hūna ūbawīla a banhū ba masala ba mu Babuloni benaba, “Ūyo alabūsome ū wandīke wenūbū aniwīle na a makūlū gaho akūzwalīkījiwa shizwako sh'ikūjo sha nzulunge, ūtūūlīlwa na ngufu gwa zahabu ū mu nhingo yakwe; nū mu būsugi bo sī akwītwa kūbiza wa kadatū ū mu būtaale.”

8 Hūna biza pye a banhū ba masala ba ntemi, alīyo būlemeelwa ū kūbūsoma ū wandīke, nūūlū kūng'wīla ū ntemi a makūlū gaho.

9 Ū Ntemi Belishaza ongeja ū kogoha nū būshū bokwe bongeja ū kūjilūka. A banikūlū bakwe būlemeelwa ūmo bīītīle.

10 Ū ngole aho wigwa ī lilaka lya ntemi na a malaka ga banikūlū bakwe wiza ū mu numba ya shigukulu. Ūng'wīla, “Baba ntemi kūlūga ūhangame, lekaga ū kūkoya! Yaya nū kūjilūka ū būshū gīko.

11 Ū mu būsugi wako ng'wenūmu alīho munhū alī na moyo gwa bamulungu beela ū mulī we. Ū mu shikū ja ng'wa so waalī na būdūla bo kūbona ya kūle, witegeleja na masala gītī ga bamulungu. Ū Ntemi Nebukadineza ū so, baba ntemi, nalīng'haya ū so; walī wansola kūbiza ntaale wa bafumu na nchūja, pye na a baloji ba sonda na a baboni.

12 Ū munhū ng'wenūyo Danyeli, ūyo ntemi akag'witana Belitishaza; amanīkile gīkī alī na būdūla bo kūkumya no na būmani na būdeeba. Alī na būdūla bo kūshomeleja shilooti nūūlū koolecha mihayo ya mafubo, na kūgoloola īyo yigologomile; alilūūlū, ni itanagwe ī haha ū Danyeli, akūkūwīla a makūlū ga wandīke wenūbū.”

13 Na ng'hana ū Danyeli wenhwa ū kūlī ntemi, ū ntemi ūmūja, “Ū bebe h'ūlī Danyeli, ūmò wa basaamiwa abo ntemi ū baba wabenha kūfuma sī ya Yuda?

14 Nigwaga gīkī ū mulī bebe gūlīmo moyo gwa bamulungu, na gīkī ūlī na būdūla bo kūbona ya kūle, hangī ūlī na witegeleja na masala gakīlanīgije.

15 A ba masala na a bachūja benhagwa a ha būtongi bone aha, gīkī babūsome ū wandīke ūbū baniwīla a makūlū gaho, alīyo balemeelagwa ū kūbūshomeleja.

16 Alīyo nigwaga gīkī ū bebe ūdūgije kūfunya būshomeleja, na kūgoloola mihayo midaamu. Ūlū ūladūle kūbūsoma ū wandīke wenūbū na kūniwīla ūmo būlīhayīla, ūkūzwalīchiwa shizwako sh'ikūjo sha nzulunge, ūtūūlīlwe na ngufu gwa zahabu ū mu nhingo yako; nū mu būsugi bo sī ūkwītwa kūbiza wa kadatū ū mu būtaale.”

17 Ū Danyeli ūnshokeja ū ntemi, “A manong'ho gako ikalaga nago bebe ng'wenekīlī, nī shakwinha shako ng'winhage ūngī. Alīyo ū nene nakūbūsoma ū wandīke, na a makūlū gaho nakūng'wīla ū ntemi.

18 Baba ntemi, ū Mulungu wa Higūlya no walī wang'winha ū so ū Nebukadineza, būsugi na būtaale n'ikūjo, na lūkumo lwawiza.

19 Kūlwa nguno walī wagūngūhiwa gīko, pye a mahanga na a banhū ba ndīmi jose na jose baalī bang'ogohile no, badetemaga ū kū būtongi bokwe. Abo walī atogilwe kūbabūlaga ū ntemi wababūlagaga; abo walī atogilwe kūbalekeja wabalekejaga; na a babo walī atogilwe kūbasunang'hīja higūlya mu mhayo, wabasunang'hījaga; nūūlū abo wikūmbagwa kūbadooheleja wabadoohelejaga.

20 Alīyo ī ng'holò yakwe aho yadoosa na kūgūna kūlwa wikumīlīja, akichiwa a h'isumbī lyakwe lya būtemi, nī likūjo lyakwe ūzuujiwa;

21 ūpeejiwa wīnga ū mu banhū, winhwa na ng'holò ya nyalimu, ūyikala na nzobe ja kū makūngū akūlyaga maswa gītī mitugo. Ū mīlī gwakwe gūyūlobiwa lūme lwa kūfuma kwigūlū, kūshisha ūdeeba gīkī Ūyo alī Higūlya no hū ng'wene ū nsugi wa mabūtemi ga banhū, na akang'winhaga ose ose ūyo antogilwe we.

22 “Alīyo ū bebe Belishaza, ng'wana wakwe ūtī na widoohya, nūūlū īkī wīmanile pyī ī yenīyī.

23 A ha ng'wanya gwaho ū bebe witūūlaga higūlya ya ng'wa Seeba wa ng'wigūlū, ūlagījaga wenhelwa ī shikombe sha zahabu sha kūfuma mu hekalu yakwe. Hūna ū bebe ng'wenūyū na a banikūlū bako na a bake bako, na a bakīma bako a bangī ng'wūshing'wela divai, kūnū mukūkumīlījaga bamulungu ba zahabu na ba feza, ba shaba, na ba chūma, na ba mantī na ba mawe; abo batī na būdūla wa kūbona nūūlū kwigwa, nūūlū kwitegeleja. Alīyo ū Mulungu mutankūgije, ūyo abūdimīīlile mu nkono gwakwe ū būpanga wako nī nzīla jako pyī ī jose.

24 H'ī nguno yene wagūtūmaga ū nkono ūyo gowandīkaga ū wandīke wenūbū.”

25 Alilūūlū, ū wandīke ūbo wandīkilwe būūbū, MENE, MENE, TEKELI, PELESI.

26 A makūlū ga mihayo yenīyī gaya: Mene, Ū Mulungu wajiisaabile ī shikū ja būsugi wako ūjikalīcha.

27 Tekeli, Ū bebe wapimilwe ū būdito wako h'ipimīlo ūbonwa ūlebegije.

28 Pelesi Ū būtemi wako bogabanhyiwe binhwa Bameedi na Baajemi.

29 Hūna ū Belishaza ūlagīja, ū Danyeli ūzwalīkījiwa shizwalo sh'ikūjo sha nzulunge, ūtūūlīlwa na ngufu gwa zahabu ū mu nhingo yakwe; na a banhū būkumūkījiwa gīkī ū mu būsugi bo sī obizaga wa kadatū ū mu būtaale.

30 Ū mu būjikū wa lūshikū lwenūlo ū Belishaza, ntemi wa Bakalidayo ūbūlagwa,

31 Dalio muna Būmeedi ūbūdima ū būtemi, walī na myaka makūmi atandatū n'ībīlī.

Sukuma Bible © Bible Society of Tanzania, 2019.

Bible Society of Tanzania
Lean sinn:



Sanasan