Danyeli 3 - Bibilia Ilagano Lya Kale 2015

Shiikolile sha kūlamiwa sha zahabu

¹ Ū Ntemi Nebukadineza akabeeja shiikolile sha kūlamiwa, shalī sha zahabu; ū būlīhu washo ū kūja ng'wigūlya shaalī miita makūmi abīlī na mpungatī, ū būgalī galī washo miita ibīlī na sentimita mpungatī, ūshīmīlīja ha mbūga ya Dula ū mu sī ya Babuloni.

² Hūna ūbalagīja pye a basugi na a batwaale, na a bataale ba basugi na a bahūgūji ba banhū, na a balang'hani ba sabo, na a balamuji, na a bataale ba mabanza na a bataale ba sī a bangī pye a bose; akabalagīja bize kū wanīlwa bo shiikolile shenīsho.

³ Na ng'hana a basugi na a batwaale, na a bataale ba basugi na a bahūgūji ba banhū, na a balang'hani ba sabo, na a balamuji, na a bataale ba mabanza na a bataale ba sī a bangī pye a bose bibilinga ū kūwanīlwa bo shiikolile īsho Ntemi Nebukadineza walī washīmīlīja, bīmīīla kū būtongi washo.

⁴ Hūna ū nkumūcha ūhamuka n'ilaka lya higūlya alīhaya, “Bing'we banhū, na mahanga gose ga ndīmi jose, ū mhayo ūyo mulīlagīlwa kūgwīta gūūyū:

⁵ Ūlū mulagiigwe a malaka ga nhaaninga na mhembe, na kadeete na malimba, na ndono na mbiilulu, na shose īsho shikatūlagwa nūūlū kūfuulwa, shiigelile mugwe hasī kūshilamya ī shiikolile sha zahabu īsho Ntemi Nebukadineza washīmīlīkije

⁶ Ūyo alaleke kūgwa hasī na kūshilamya, ī likanza lyenīlo akūponyiwa mu moto gūkūligimaga.”

⁷ Na ng'hana aho baagiigwa a malaka ga nhaaninga nī mhembe na a ga kadeete, nī malimba nī ndono na a ga shose īsho shikatūlagwa nūūlū kūfuulwa, pye a mahanga ga banhū ba ndīmi jose na jose būgwa hasī kūshilamya ī shiikolile sha zahabu īsho Ntemi Nebukadineza walī washīmīlīja.

⁸ Bamò ba baloji ba sonda būbona gīkī ī lyenīlo lyalī ikanza isoga lya kūbabipīja lina a Bayudaya.

⁹ Būng'wīla ū Ntemi Nebukadineza, “Baba ntemi, kūlaga ūhangame!

¹⁰ Watūūlile shilagīlo baba ntemi, gīkī būlī ng'wene ūyo ūgiigwa a malaka ga nhaaninga na mhembe na kadeete na malimba na ndono na mbiilulu; na shose īsho shikatūlagwa nūūlū kūfuulwa, shing'wigelile agwe kūshilamya ī shiikolile sha zahabu,

¹¹ na gīkī ūyo ūleka ū kūgwa na kūshilamya akūponyiwa mu moto gūkūligimaga.

¹² Alīyo balīho Bayudaya bamò, abo wabatūūla ha nīmo gwa būsugi ū mu sī ya Babuloni, ba Shadulaka na Meshaki na Abedinego; baba ntemi, a banhū benabo batakūdīlīlile nūūlū hado. Batūbatūmamīlaga a bamulungu bako, nūūlū ī shiikolile sha zahabu īsho washīmīlīkije batūshilamyaga.”

¹³ Ū Nebukadineza akapelana no, ūbalagīlīja bize a ba Shadulaka nū Meshaki nū Abedinego. Na ng'hana a banhū benabo benhwa ū kūlī ntemi.

¹⁴ Hūna ū Nebukadineza ūbawīla, “Gwa ng'hana gete gīkī a bing'we Shadulaka na Meshaki na Abedinego mutūbalamyaga a bamulungu bane, pyī nī shiikolile sha zahabu īsho naashīmīlīgije?

¹⁵ Alilūūlū, ūlū mulagiigwe a malaka ga nhaaninga nī mhembe na a magiita, nī malimba nī ndono nī mbiilulu nī shose īsho shikatūlagwa nūūlū kūfuulwa; īkūmubeelela ūlū ng'ūgwa na kūshilamya ī shiikolile īsho naashibeegije. Alīyo ūlū mūtūshilamya, ī likanza lyenīlo mukūponyiwa mu moto gūkūligimaga, numho alīho mulungu kī ūyo adūgije kūmupīja ū mu nkono gwane?”

¹⁶ A ba Shadulaka nū Meshaki nū Abedinego būnshokeja ū ntemi, “Baba Nebukadineza, a bise tūtī na nguno ya kūkwibūūlīla ū mu mhayo gwenūyū.

¹⁷ Nūūlū tūkaponyiwa mu moto ūyo gūkūligimaga, ū Mulungu ūyo tūkanamyaga adūgije ū kūtūpīja ū mu moto gwenūyo, nūūlū ū mu nkono gwako akūtūpīja dūhū baba ntemi.

¹⁸ Gwike nūūlū aleke, tūtogilwe ūdeebe baba ntemi gīkī, a bise tūtīko ū kūbatūmamīla a bamulungu bako, nūūlū ū kūshilamya ī shiikolile sha zahabu īsho washīmīlīgije.”

¹⁹ A henaho ū Nebukadineza ūbapelanīla no a ba Shadulaka nū Meshaki nū Abedinego, nīyo nū mumo wabiganikīlaga ūgalūka. Ūlagīja ū moto gūkūbīkīīlwe gūsebe ng'hangala mpungatī kūtinda ūmo gūkikalīlaga na kale.

²⁰ Hūna ūbalagīja a bashilikale ba ng'wibità lyakwe abo baalī bamanīīkile gīkī ba mbagashūūla jigi, babatunge a ba Shadulaka nū Meshaki nū Abedinego; hūna babaponeje ū mu moto ūyo gwaligimaga.

²¹ Na ng'hana a banhū benabo būtungwa bazwalile ī ng'hanjo jabo nī sulubale nī shikooye shabo, na shizwalo shingī na shingī; hūna būponyiwa ū mu moto ūyo gwaligimaga gwenūyo.

²² Īkī ī shilagīlo sha Ntemi shaalī shikalī, nū moto gwalī gwaseba gūkīlanīja, ī ndali ja moto gwenūyo jikababūlaga a bashilikale abo bakababūūcha a ba Shadulaka nū Meshaki nū Abedinego.

²³ A banhū a badatū benaba a bene būgwa ū mu moto babohiwe būdadīlwa.

²⁴ Ū Ntemi Nebukadineza wibakīla, ūbūūka wangū wangū kūnū alīkumya; ūbabūūja a baganikīji bakwe, “Bing'we baalī batī badatū a banhū abo twalī twabatunga tūbaponya ū mu moto?” Būnshokeja, “Ka gete baba ntemi.”

²⁵ Ūbawīla, “Alilolagi! Nalībona banhū bane balīshimīza ū mu moto, nīyo batatungile; hangī batī na kabi nūūlū hado, hama ū wa kanè alī gītī ng'wana wa bamulungu.”

²⁶ Ū Nebukadineza ūbiza gītī wegeela a ha moto ūyo gwaligimaga; hūna ūhamuka alīhaya, “Bing'we ba Shadulaka na Meshaki na Abedinego batūmami ba ng'wa Mulungu ūyo alī higūlya no, fumagi mo! Nzūgi aha!” Na ng'hana a ba Shadulaka nū Meshaki nū Abedinego būfuma ū mu moto,

²⁷ a basugi na a batwaale na a bataale ba basugi na a baganikīji ba ntemi būbitinja. Būbona gīkī ū moto gūtabīītile mhayo gose gose ī mibīlī yabo, nūūlū ni lūywīlī lwa kū ntwe gwabo lūtagemile kwihinya na hado yaya; nī shizwalo shabo shitajigile, nūūlū lūnung'ho lwa moto dūhū baalī batī nalo.

²⁸ Hūna ū Nebukadineza ūhaya, “Akumīlījiwe ū Mulungu wa ba Shadulaka na Meshaki na Abedinego, ūyo wantūmaga malaika wakwe kwiza kūbapīja a batūmami bakwe! Baalī bansanyaga, būshigomela ī shilagīlo sha ntemi; baalī bamalīīlile nūūlū kūfunya būpanga wabo kūtinda kūntūmalīla nūūlū kūnamya mulungu ūngī, ūlū at'ū Mulungu wabo dūhū.

²⁹ Hūna lūūlū naafunya shilagīlo gīkī, banhū b'ihanga nūūlū lūlīmi lose lose abo būng'haya kībi ū Mulungu wa ba Shadulaka na Meshaki na Abedinego, bakūbbutagūlwa mapingili mapingili, nī kaya jabo jikenaagūlwe gabize matūūgo ga mapalala. Nguno atīho mulungu ūngī ūyo adūgije kūpīja mu nzīla gītī yenīyī.”

³⁰ Ū ntemi akabasunang'hīja higūlya ū mu būsugi a ba Shadulaka nū Meshaki nū Abedinego ū mu sī ya Babuloni.