Danyeli 10 - Bibilia Ilagano Lya Kale 2015

Danyeli na shakoolechiwa sha Munhū

¹ Mu ng'waka go kadatū go ng'wa Koleshi ntemi wa Būajemi, ū Danyeli (lina līngī Belitishaza) akenhelwa shakoolechiwa. Ū goi gwalī mhayo gwa ng'hana, gwike gwalī nambu ū kūgwitgeleja; kūshisha aho washiitegeleja ī shakoolechiwa.

² Ū mu shikū jenījo ū nene Danyeli naalī namala mifungo idatū nakūlīlaga ng'hūngū

³ Ū ng'wikanza lyenīlo nataliile shilīwa shibeegije chiza; nyama yose yose nūūlū divai shitikuumije na nomo gwane, nū mīlī gwane natibilile maguta na hado yaya kūshisha yūshila ī mifungo īyī idatū.

⁴ Mu lūshikū lwa makūmi abīlī n'inè ng'weji gwa kwandya naalī nīmīīlile ha ngegu ja mongo ntaale, gwa Tiigili,

⁵ Kūponya a miso nūbona munhū ū kū būtongi bone azwalile shizwalo sha kitaani, itungile nshipi gwa zahabu niiza no ū mu nkīmbīlī gwakwe.

⁶ Ū mīlī gwakwe gwalabangīlaga gītī kilisolito, ū būshū walī gītī lūlabi, a miso gakwe gakeemaga gītī chenge sha moto, a makono gakwe nī milūndī yalī gītī chūma sha shaba shiguusilwe shūlabagījiwa; ī lilaka lyakwe lyalī gītī ly'ibità itaale.

⁷ Nene Danyeli iyene nakashibona ī shakoolechiwa shenīsho; a banhū abo baalī hamò nū nene batashibonile, gwike dūhū bakogoha no būpeela būkibisa.

⁸ Nūlekwa iyene naashikalalīlaga ī shakoolechiwa ī shitaale shenīshi; nū nene ī nguzu jikanigaya, ū būshū bone būgalūka būbiza gītī bo munhū achile, nūduuma ūmo nītīle.

⁹ Kwimanīla nang'wigwa wayomba, aho nalīndegeleka nūgwa hasī nachimīgije, nūlaala tūlo nhaale no.

¹⁰ Nkono gūnigūngūmūla nūtuja mazwi kūnū na a makono gadiimile hasī, alīyo nakūdetemaga kīngī nasho.

¹¹ Ūhaya, “Bebe Danyeli munhū ūyo ūkūjiwe no no no, ī mihayo īyo nalīhaya kūkūwīla yidedeeng'hage chiza; nīyo īmīīlaga, nguno naatūmagwa kūlī bebe.” Aho waniwīla gīko nīmīīla kūnū nakūdetemaga.

¹² Ongeja kūniwīla, “Lekaga ū kogoha Danyeli. Kūfuma lūshikū lwene aho ūkagalogeja a maganiko gako kūkooba witegeleja, na kwidoohya bebe ng'wenekīlī kū būtongi bo ng'wa Mulungu wako, ī mihayo yako īkigwiwa, ū nene lūūlū ī haha nizaga kūkwinha ishosho kūlwa mihayo yenīyo.

¹³ Gwike jashikaga shikū makūmi abīlī ū nsugi wa būtemi wa Būajemi akūnichaamaga. Alīyo ū Mikaeli, ūyo alī ūmò wa bataale ba basugi akiza kunigunanha, nguno ū ntemi wa Būajemi walī wanilemegegije kwenūko.

¹⁴ Hūna lūūlū ī haha niza kūkūwīla īyo īlabilongele a banhū bako ū kū shikū ja kū būtongi; nguno ī shakoolechiwa shilī sha mihayo y'ikanza īlo lītaalī līlī kū būtongi.”

¹⁵ Aho alīniwīla ī yenīyī, ninamya ū būshū bone kūlola hasī, yanigayaga ī mihayo ya kūhaya.

¹⁶ Hūna ūmò wa kūbiza gītī munhū ūnikuumya ū kū nomo gwane, hū nūdūla ū kūgwasamya ū nomo gwane, nandya ū kūyomba. Ūyo walī wīmīīla kū būtongi bone nūng'wīla, “Baba ī shakoolechiwa shenīshi shanenheleja kwiyigwa kībi no, ī haha natī na nguzu gete.

¹⁷ Ū nene ntūmami wako nakūdūla kinehe baba ū kūhooya nang'ho? Namalaga gete ī nguzu, nū kwesheema nalīkoya, nalīpelwa myūyī.”

¹⁸ Ū wa kūbiza gītī munhū ūnikuumya hangī, ūninha nguzu.

¹⁹ Hūna ūhaya, “Bebe munhū ūyo ūkūjiwe no no no, lekaga ū kogoha. Mhola ībize hamò nang'ho! Anukūlaga nguzu ī haha, anukūlaga nguzu.” Aho waniyombya nūpandīka nguzu nūng'wīla, “Baba waninha nguzu lūngalūngaga lūūlū ī haha.”

²⁰ Ūlīmana nibūlī niza ū kūlī bebe? Nashokile wangū kūja kwilwisha nū nsugi wa Būajemi. Alīyo ūlū nalīnge, akwiza nsugi wa Būyunani;

²¹ gwike nakūkūwīla tame īyo yandīkilwe ū mu Shitabo īsho shilī nayo ī Ng'hana. Atīho ūyo akanigunanhaga ū kwilwisha nabo a banishi ūlū atī Mikaeli dūhū ū nsugi wing'we.