Balamuji 8 - Bibilia Ilagano Lya Kale 2015

¹ Hūna a banhū ba lūganda lwa ng'wa Efulaimu būndugumīla ū Gidioni balīhaya, “Nibūlī watwītīlile mihayo īlī gīko? Nguno kī walī ūtatwitanile aho wabūūka kūja kwilwisha būlūgū na a Bamidiani? Būyoga ho nang'hwe gete.”

² Nang'hwe ūbashokeja alīhaya, “Ū nene naabeegije mhayo kī ū ntaale kūtinda īyo ng'wayītile a bing'we? Angū, a kapūmbīīlīle ka mizabibu a ka banhū ba lūganda lwa ng'wa Efulaimu katī na mpango ntaale kūtinda na a kahūlūlīle ka mizabibu a ka Baabiezeeli?

³ Ū Mulungu wabatūūlile mu makono ging'we a batongeeji ba Bamidiani, a ba Olebu nū Zeebu. Mmho lūūlū ū nene nīītile mhayo kī ū ntaale ūyo gūshikile kūlenganījiwa nī yīyo ng'wīyītile a bing'we?” Aho wahaya ī yenīyo wiika ū būpelanu wabo, ūbo waalī wabenheleja bankolwe.

Mizengo īyo īkalema kūngunanha Gidioni

⁴ Ū Gidioni na a banhū bakwe abo magana adatū baalī baanoga no, alīyo baalī bataalī dūhū būbakūūbīja a banishi; būshika a ha mongo gwa Yolodani būgūkīla.

⁵ Hūna ū wei ūbawīla banhū ba Sukoti gīkī, “Binhagi shilīwa a banhū bane benaba, nguno bayembaga no; alīyo nataalī nūbakūūbīja batemi ba Bamidiani, a ba Zeba nū Zalimuna.”

⁶ A batongeejia ba Sukoti būng'wīla, “Tūbinhe migatī yaakī a bashilikale bako abo baaseedeekaga benaba, gītī ninga wamalaga kūbadima a ba Zeba nū Zalimuna?”

⁷ Ū Gidioni ūshosha ūhaya, “Ndūhū ū mhayo naaheene, gwike ū Seeba ūlū alabatūūle a ba Zeba nū Zalimuna mu nkono gwane, ī mibīlī ying'we īkūtandagūka no, nguno nakwītūlīla ming'hwa na magwaata ga mu masaka!”

⁸ Wīnga a henaho ūja Penieli, ūūkalomba gīko nū kwene; alīyo nabo būnshokeja dūhū gīt'ūmo bakanshokegeja a bana Sukoti.

⁹ A bana Penieli ūbawīla gīkī, “Ūlū nalashoke mhola nakwīholomola ī numba ying'we ya balang'hani yenīyī!”

¹⁰ A ba Zeba nū Zalimuna baalī mu Kalikooli, pye na a mabità gabo ga bashilikale abo baalī baasaagīīla mu banhū abo baalī baafuma kīya; banhū ba kūshika shihūmbī ikūmi na shitaano. Abo baalī baashila kūcha bene baalī banhū shihūmbī igana na makūmi abīlī; bose benabo baalī bamanile kūlwa wa shū.

¹¹ Ū Gidioni ūbītīla ng'wikūūwa lyalī lyasheshiwa na bashimizi, lyalī lībītile kū kīya na mizengo ya Noba na Jogibeha; abo wabapeejaga ūbisanganīja biyībaga.

¹² Alīyo a batemi ba Bamidiani a babīlī, a ba Zeba nū Zalimuna būpeela; gwike akabakūūbīja ūbapandīka ūbadima. Ī libità lyabo ī lyose lyūhaahūka lyūsambaala.

Kūbūlagwa ba Zeba na Zalimuna

¹³ Hūna ū Gidioni ū ng'witūnja o ng'wa Yoashi ūshoka ū kūfuma ū kū būlūgū, wiza na nzīla ya kūtulumenha kūbītīla Halesi.

¹⁴ Aho wegeela ī Sukoti ūndima nsūmba nebe, ūmūūgīlīja a mina ga batongeeji ba ng'wene; ū nsūmba ng'wenūyo ūng'wandīkala mina makūmi mpungatī na mpungatī ga batongeeji ba mu Sukoti, abo baalī banamhala ba mu nzengo gwenūyo.

¹⁵ Hūna ū Gidioni aho washikīīla ī Sukoti ūbawīla a banhū gīkī, “A ba Zeba nū Zalimuna baaba aha, abo ng'walūnidalahaga lūshikū lweene mukūhahayaga, ‘Tūbinhe migatī ya kī a bashilikale bako abo baaseedeekaga benaba, gītī ninga wamalaga kūbadima a ba Zeba nū Zalimuna?’”

¹⁶ Ūbasola a banamhala ba mu nzengo, ūbinha nsango gwa kūtūlīlwa ming'hwa na magwaata ga mu masaka, kūlwa kūbalanga a banhū ba mu nzengo gwenūyo.

¹⁷ Ūja nī Penieli ūūkīholomola ī numba yabo ya balang'hani; hama a bagosha ba mu nzengo gwenūyo ūbabūlaga.

¹⁸ Hanuma ya henaho ūbabūūja a ba Zeba nū Zalimuna gīkī, “A bagosha abo mukababūlaga Tabooli baalī ba mbika kī?” Būnshokeja, “Baalī gīt'ūmo ūlī ū bebe gīko, baali gītī baana ba batemi.”

¹⁹ Ū Gidioni ūshosha, “Agaya a benabo baalī baana ba ng'wise gete, baana ba ng'wa mayū; nalīng'wilahīlīla kūlī Seeba mpanga gīkī, ūlū ni mutababūlagile ni naaleka ū kūmubūlaga.”

²⁰ Hūna ūngalūkīla ng'witūnja wakwe; tangī wakwe, lina lyakwe Jeeta, ūng'wīla, “Bebe alibūūkaga ū babūlage a benaba!” Ū Jeeta ogoha ū kūlīsopoola ī līlūshū, nguno walī ataalī sūmba ndo.

²¹ A ba Zeba nū Zalimuna būng'wīla, “Būūkaga ū bebe ng'wenekīlī ūtūbūlage, nguno ūmo alī ū munhū nī nguzu jakwe h'ūmo jilī.” Ng'hana ū Gidioni ūbūūka ūbabūlaga, ūshīsola ī shikolo sha būlenji īsho shalī mu nhingo ja ngamīla jabo.

Gidioni kūbeeja shiikolile

²² Hūna a Baisilaeli būng'wegeela ū Gidioni būng'wīla, “Ī gete tūsugage ū bebe, nguno watūpīgije kūfuma ū mu nkono gwa Bamidiani; nīyo nū ng'witūnja wako akūtūsuga, pyī nū ng'wizūkūlū wako.”

²³ Ū Gidioni ūbawīla, “Ū nene natīīko ū kūmusuga, nū ng'witūnja wane atūdūla ū kūmusuga. Ū Seeba hū ng'wene ūyo akūmusuga.”

²⁴ Ongeja kūbawīla, “Gwike nalīmulomba mhayo gūmò, gīkī būlī ūmò wing'we aninhe ī sīīlī ja kū matū, ījo ng'wapandīkile kwīnga kū bading'wa ba kūfuma mu būlūgū;” (nguno baalī Baishimaeli, banhū ba shīmīle sha kūzwaala sīīlī ja zahabu kū matū).

²⁵ Būnshokeja būhaya, “Ī jenījo tūkūkwinha dūhū, nīyo na būyegi.” Na lūūlū bamba ng'wenda hasī, hūna būlī munhū ūyūponeja ho ī sīīlī ja kwīnga kū bading'wa ba mu būlūgū.

²⁶ Ū būdito wa sīīlī ja zahabu ījo akalomba būshika gītī kilo ikūmi na kenda na nusu; kūleka kūshiisaaba ī shikolo sha būlenji ī shingī, nī migufu, nī myenda ya nzulunge īyo yazwalagwa na batemi ba Bamidiani; nūūlū ī migufu īyo yaalī mu nhingo ja ngamīla jabo.

²⁷ Ū Gidioni ūjibeeja ī zahabu līshiikolile, ūlītūūla mu nzengo gwa ng'wawe gwa Ofla. Pye a Baisilaeli bandya kwisosohaja kūlwa kūlīlamya ī līshiikolile lyenīlo; lyūbiza lūtu ū kūlī Gidioni nū kū banhū ba mu kaya yakwe.

²⁸ A Baisilaeli bīsuga ī sī ya Midiani; na a ītabūūkje ntwe gwayo hangī ikanza lyose lyose.

Kūcha kwa ng'wa Gidioni

²⁹ Ū Yelubaa ū ng'witūnja o ng'wa Yoashi ūja kū ng'wawe, ūūkikala mu numba yaakwe wei ng'wenekīlī.

³⁰ Walī na bitūnja bakwe gete makūmi mpungatī, nguno wal'atoolile mhalī ja bakīma bingī.

³¹ Ū mu Shekemu walīmo nkīma oshihyaga nang'hwe, nang'hwe akamyalīla ng'witūnja ūng'wilīka ī lina lya kwe Abimeleki.

³² Hūna ū Gidioni ū ng'witūnja o ng'wa Yoashi ūcha mu būnamhala wa būlamu wawiza; ūjīkwa mu shigila sha ng'wihalo lya ng'wa ise Yoashi, mu nzengo gwa Ofla ya Baabiezeeli.

³³ Ū Gidioni aho waacha, a Baisilaeli batadīīlile kwandya kwisosohaja kūlwa kūgalamya Maabaalī hangī. Būūtūūla ho lī Baali-beliti, gīkī hū lībize lī mulungu lyabo;

³⁴ būng'wība gete ū Seeba ū Mulungu wabo ūyo wabapīja kūfuma kū banishi babo, abo baalī babapīndīlīgije mhandī jose.

³⁵ Nī kaya ya ng'wa Yelubaa (h'ū Gidioni), būlemeelwa ū kwīyītīla ya koolekeja būlūmbi ū mu yose īyo walī wabīītīla.