Balamuji 17 - Bibilia Ilagano Lya Kale 2015

Shiikolile sha ng'wa Mika

¹ Walīho munhū ūmò lina lyakwe Mika walī wa mu sī ya magūlya ga Efulaimu.

² Ū munhū ng'wenūyo akang'wīla nina gīkī, “Mayū ī kilo ikūmi na idatū ja feza ījo ūkajimīīja, nūūkwigwa wahaya na mihayo ya kūzuma, nalī najo; naalī naajisola nene.” Hūna ū nina ūhaya, “SEEBA akwinhe ng'wana wane.”

³ Aho wajishosha ī kilo ikūmi n'idatū ja feza jenījo ū kūlī nina, ū nina ūhaya, “Naajīnja ī feza jane ū mu nkono gwane naajifunya kūlī SEEBA kūlwa nguno ya ng'witūnja wane, jibeejiwe shiikolile sha kūsula na shiikolile sha kwaabya. Na lūūlū leka nakūshokeje.”

⁴ Aho wajishosha ū kūlī nina ī feza jenījo, ū nina wīnja ho kilo ibīlī na nusu ū mu feza jenījo ūjitwaala kūlī nsuji; ū nsuji ng'wenūyo ūbeeja shiikolile sha kūsula na shiikolile sha kwaabya, shūūtūūlwa mu numba ya ng'wa Mika.

⁵ Ū Mika ng'weenūyo walī na iduku lya kwitongelegeja, waalī wabeeja na līīshiikolile ilebe; na walī nago maashikolo gangī ga kūlamiwa, ūntūūla būgabīji ūmò wa bitūnja bakwe.

⁶ Ū mu shikū jenījo a Baisilaeli baalī batī na ntemi, būlī ng'wene wīītaga gīt'ūmo walī atogelilwe.

⁷ Nsūmba nebe ūmò wa Balawī, muna Betelehemu ya Yuda; wikalaga na banhū balebe ba mu ndūgū ja Yuda,

⁸ akīnga ū mu nzengo ūyo wikalaga, ūja akūkoobaga ipandī līngī lya kwikala. Aho alī mu kūbīta bīta gīko, ūshika a ha ng'wa Mika ū kū magūlya ga mu sī ya Efulaimu.

⁹ Ū Mika ūmūūja, “Ū bebe ūfumile halī?” Nang'hwe ūshosha ūhaya, “Nalī Nnawī nafumile Betelehemu ya Yuda, nalīīkooba ipandī lya kwikala.”

¹⁰ Ū Mika ūng'wīla, “Ikalaga hamò naane aha ūbize baba na ngabīji wa ha ng'wane. Nakūyūūkwinha gulaamu igana n'ikūmi ja feza būlī ng'waka, na shizwalo sha kūzwaala nī shilīwa sha kūlya.”

¹¹ Na lūūlū ū Nnawī ng'wenūyo ūzunya ū kwikala nang'hwe; nīyo ū sūmba ng'wenūyo ūbiza gītī ūmò wa bitūnja ba ng'wa Mika.

¹² Ū Mika ūntūūla ū sūmba ng'wenūyo, ū Naawī ha nīmo gwa būgabīji wa ha ng'wakwe, ūbiza ng'wikaji wa henaho.

¹³ Hūna ū Mika ūhaya, “Ī haha lūūlū nalībona gīkī ū SEEBA akūnīītīla yawiza, nguno naapandīkaga Nnawī kūbiza ngabīji a ha ng'wane.”