Balamuji 14 - Bibilia Ilagano Lya Kale 2015

Samsoni na nkīma wa Timuna

¹ Ū Samsoni ūja Timuna ūūkabona koi nkīma Mfilisiti.

² Aho washoka ī kaya ūng'wīla ū ise nū nina gīkī, “Napandīkaga nkīma Mfilisiti kū nzengo gwa Timuna, jagi ko mukanilūngīje nantoole.”

³ Ū ise nū nina būng'wīla, “Batīho a bakīma ū mu banhū ba lūganda lwa ng'wing'we, nūūlū ū mu banhū bise a bose, nose ūje ūkatoolele kū Bafilisti banhū batasaalilwe?” Alīyo ū Samsoni ūbawīla gīkī, “Nilūngījagi ū ngw'wenūyo aniigeleelilwe ū nene.”

⁴ A babyaji bakwe baalī batamanile ī gīkī, “Ū mhayo gwenūyo gwalī gūfumile kūlī SEEBA, wakoobaga nzīla ya kūbakomya a Bafilisiti, nguno ū mu shikū jenījo baalī babasugile a Baisilaeli.

⁵ Hūna ū Samsoni ūtulumenha ajile ī Timuna hamò nū ise nū nina. Aho beegeela kū migūnda ya mizabibu ya bana Timuna, kwimanīla yansanga shimba īlīpogoma.

⁶ Ū Moyo o ng'wa SEEBA ūng'wizīīla mu nguzu ningī no, wīdima ī shimba yenīyo wītandūla na makono gaakwe dūhū, gītī munhū akūtandūlaga kaana ka ng'holo. Alīyo ūleka ū kūng'wīla ū ise nūūlū ū nina ū mhayo ūyo akagwīta.

⁷ Hūna ūja ūūkahooya nū nkīma ng'wenūyo; ūntogwa.

⁸ Aho jaabīta shikū, ūshoka ko hangī kūjūmalīīja kahelele ka nhoola; ūliga kūjūūgūlola ū mimba gwa shimba; ūsanga nzūkī jaateelile mo, jaaswīīlile na būūki ū mu malela.

⁹ Ūhagūla malela gamò na makono gakwe ūja alīīlya, ūūkabinha na a babyaji bakwe aho wabapandīka ū mu nzīla, nabo būlya; alīyo atabawīlile ū gwa gīkī a malela genayo akagasolela mu mimba gwa shimba.”

Kaalaagū ya ng'wa Samsoni

¹⁰ Na lūūlū ū ise o ng'wa Samsoni ūja kūnola ū nkīma ūyo alībiza ng'wīnga wakwe. Hūna ū Samsoni ūbeeja shigūūkūlū sha būkombe gīt'ūmo shaalī shīmīle sha ntooji ū mu sī yenīyo.

¹¹ Aho washika winhwa balūngūnja makūmi adatū.

¹² Kwimanīla ū Samsoni wabawīla, “Yīyī kaalaagū namutūūlīle bagosha, ūlū ng'wībbadīja ū ng'wikanza lya shikū mpungatī ja būkwīlīma, nakūng'winha shizwalo makūmi adatū sha kitaani na myenda makūmi adatū ya kwalūla.

¹³ Alīyo ūlū mulaalemeelwe ū kūniinha ī lishosho ū ng'wikanza lyenīlo, a bing'we hū mukūninha ī shizwalo īsho makūmi adatū sha kitaani, nī myenda ya kwaalūla īyo makūmi adatū.” Nabo būng'wīla, “Alitwinhage ī kaalaagū yako!”

¹⁴ Hūna ūbawīla, “Ū kūfuma ū mulī nni, shilonga mo shakūlya; ū kūfuma ū mulī wa nguzu, shilonga mo shinonu!” Bakakoya shikū idatū baalemeelagwa ū kūpandīka ī lishosho.

¹⁵ Nose ū mu lūshikū lwa kanè būng'wīla ū nke o ng'wa Samsoni gīkī, “Bebe nembalembage ū ngoshi wako akwinhe ī lishosho lya lūgano, ūlū ītī chene numho tūkūkūpembeela moto ū bebe nī kaya ya ng'waso muche. Gashi nīyo ng'watwitanile aha kwiza kūtwiba dūhū?”

¹⁶ Hūna ū nke wakwe ū Samsoni ūng'wigondeela kūnīlīīla alīhaya, “Ū bebe ūnidalahile ī gete, nīyo gashi ūtanitogilwe; a banhū ba lūganda lwane wabinhile lūgano alīyo ū nene ūtaalī nū kūninha ī lishosho!” Nang'hwe ūng'wīla, “Ū baba nū mayū nataalī ū kūbawīla, ū bebe hū nakūwīle?”

¹⁷ Ū nkīma ng'wenūyo akanīlīīla ū Samsoni pyī ī likanza lya shikū mpungatī ī ja shigukulu; nose a ha lūshikū ū lwa mpungatī ūng'wīla, nguno akangaagaanīla no. Nang'hwe ūbawīla a banhū bakwe ī lishosho.

¹⁸ Ū mu lūshikū lwa mpungatī aho lītaalī kūloka ī līīmi, a banhū ba mu nzengo gwenūyo būng'wīla gīkī, “Ī shinonu kūtinda būūkī ni kī? Nū wa nguzu kūtinda shimba nani?” Nang'hwe ū Samsoni ūbawīla, “Ūlū ni mutalīmile nayo ī ndogoosa yane, ni mutadūgije ū kūlīpandīka ī lishosho lya lūgano lwane.”

¹⁹ Hūna ū Moyo o ng'wa SEEBA ūng'wizīīla na nguzu ningī, ūja Ashikeloni; ūūkabūlaga banhū makūmi adatū ba kwenūko. Ūbīngīja ī shikolo shaabo ūūkabinha ī shizwalo abo bakang'winha ī lishosho lya lūgano lwakwe. Hūna wīnga ko wapelanaga no, ūja kū kaya ya ng'wa ise.

²⁰ Ū kū numa ū nke wakwe ū Samsoni winhwa sūmba ng'wiye, ūyo walī nsheesha wakwe a ha lūshikū lwa kūfumanīja.