Balamuji 13 - Bibilia Ilagano Lya Kale 2015

Manoa na nke kwisagījiwa ng'wana ngosha

¹ A Baisilaeli bakandya kwīta yabūbi hangī ū mu miso ga ng'wa SEEBA, na lūūlū ū SEEBA ūbatūūla mu makono ga Bafilisiti ikanza lya myaka makūmi anè.

² Walīho ngosha ūmò wa mu nzengo gwa Zola, lina lyakwe Manoa; wa mu ndūgū ja banhū ba lūganda lwa ng'wa Dani. Ū ngosha ng'wenūyo walī atoolile, gwike ū nke walī ngūmba, nose walī atī na ng'wana.

³ Malaika o ng'wa SEEBA akang'wilongela ū nkīma ng'wenūyo ūng'wīla, “Ū bebe ūlī ngūmba alīyo ūkūbūūcha nda ūbyale ng'wana ngosha.

⁴ Na lūūlū ilang'hanage ūtizūng'wa divai nūūlū shikoji shingī shose shose, nūūlū yaya kūlya shikolo shisoso shose shose.

⁵ Nguno ūkūbūūcha nda ūbyale ng'wana ngosha, ūyo lūgembe lose lose lūtī lo kūbīta mu ntwe gokwe, nguno kūfuma kūbyalwa kwakwe akūbiza Nazili, ng'wela kūlwa ng'wa Mulungu. Ū ng'wenūyo akwandya kūbapīja a Baisilaeli kūfuma ū mu nkono gwa Bafilisiti.”

⁶ Ū nkīma ng'wenūyo ūja ū kūlī ngoshi ūūkang'wīla gīkī, “Munhū o ng'wa Mulungu walī wiza aho naalī; ū kw'ihanga lyakwe walī gītī malaika o ng'wa Mulungu, walī wa kogohya no. Naalī naalemeelwa nū kūmūūja ūko walī afumile, nī lina lyakwe ataniwīlile.

⁷ Gwike walī waniwīla gīkī, ‘Ūkūbūūcha nda ūbyale ng'wana ngosha. Na lūūlū ilang'hanage ūtizūng'wa divai nūūlū shikoji shingī shose shose, nūūlū yaya kūlya shikolo shisoso shose shose. Nguno ū nyanda ng'wenūyo akūbiza Nazili, ng'wela kūlwa ng'wa Mulungu kūfuma kūbyalwa kwakwe kūshisha lūshikū lwa kūcha kwakwe.’”

Manoa na Malaika o ng'wa SEEBA

⁸ Ū Manoa ūnomba ū SEEBA alīhaya, “Ee SEEBA, nalīkwikūmbīlīja ize hangī ū munhū o ng'wa Mulungu ūyo walī watūtūmīlile, atūlangīīle chiza ūmo tūlanang'hanīle ū nyanda ūyo alaabyalwe.”

⁹ Ū SEEBA ūng'wigwa ū Manoa, ū malaika o ng'wa Mulungu wiza hangī ūnsanga ū nkīma alī kwilaale, alīyo ū ngoshi ū Manoa wal'atī hamò nang'hwe.

¹⁰ Ū nkīma ūpeela kūjūng'witana ū ngoshi; ūng'wīla, “Ū munhū ūyo walī waniilongelile lwise lwene ūūyū wiza hangī!”

¹¹ Ū Manoa ūbūūka ūnkūūbīja ū nke; aho washika aho walī ū munhū ng'wenūyo ūmūūja, “H'ūlī bebe ūyo walī wizile na lūshikū lūngī ūhooya nū nke wane?” Nang'hwe ūshosha, “Nalī ng'wene.”

¹² Ū Manoa ūmūūja, “Eehe ūlū yūshikīīla ī mihayo yako, ū nyanda ng'wenūyo shiigelile abize na kikalīle ka mbika kī, nū nīmo gwakwe gūkūbiza nīmo kī?”

¹³ Ū malaika o ng'wa SEEBA ūnshokeja ūhaya, “Ū nke wako shing'wigeleelilwe wīshikīlīje pyī īyo nang'wīlile.

¹⁴ Atizūlya shose shosse īsho shifumile mu matwajo ga mizabibu, yaya nūūlū kūng'wa divai, nūūlū shikoji shingī shose shose, hangī yaya nūūlū kūlya shikolo shisoso shose shose. Shing'wigelile ayīshikīlīje pyī ī yose īyo naanangīīlile.”

¹⁵ Hūna ū Manoa ūng'wīla ū malaika o ng'wa SEEBA gīkī, “Tūtogilwe wikale ho kakanza tūkūbeegeje kakūbī ka nyama ya mbūli songi.”

¹⁶ Ū malaika o ng'wa SEEBA ūhaya, “Mukūnitindīka dalali dūhū, nguno nūūlū mukabeeja naaheene natīīko ū kūshilya ī shilīwa shing'we. Alīyo ūlū mulashibeeje shifunyagi kūlwa ng'wa SEEBA.” (Ū Manoa walī ataadeebaga gīkī walī malaika o ng'wa SEEBA.)

¹⁷ Hūna ū Manoa ūmūūja ū malaika o ng'wa SEEBA, “Ī lina lyako ūlī nani, tūlakūkūje ūlū gūūshikīīla ū mhayo gwako?”

¹⁸ Nang'hwe ūnshokeja alīhaya, “Lyaakī ī lina lyane ūlīlībūja? Ī lyoi līlī lya kūkumya!”

¹⁹ Na lūūlū ū Manoa ūsola kabūli kasongi, hamò na shakwinha sha būsu; ī shose shenīsho ūshitūūla hiwe, ūshifunya kūbiza shakwinha kūlī SEEBA. Ū SEEBA wīta mhayo gwa kūkumya, ū Manoa nū nke balolile.

²⁰ Ū lūlali lwa moto aho lūlībūūka kwīnga a ha ng'walīlo kūlinha kūja kwigūlū, ū Malaika o ng'wa SEEBA ūīlanīja ū mu lūlali lwenūlo! Ū Manoa nū nke aho baagūbona ū mhayo gwenūyo, būūgwa bachimīgije būlamya.

Kūbyalwa kwa ng'wa Samsoni

²¹ Ū malaika o ng'wa SEEBA atizile hangī ū kū ba Manoa nū nke; ū gwenūyo gūng'winha ū Manoa kūdeeba gīkī ū ng'wenūyo walī malaika o ng'wa SEEBA.

²² Ūng'wīla ū nke gīkī, “Tūkūcha gete, nguno twamonaga Mulungu!”

²³ Alīyo ū nke ūnshokeja alīhaya, “Ītī gīko, ū SEEBA ūlū ni walī atogilwe kūtūbūlaga ni atazunije kwanukūla shakwinha sha kūpemva, na sha būsu kūfuma mu nkono gwise, ni atatoolekegije ī mihayo ī yose yenīyī; nūūlū ū kūtūwīla īyo watūwīla ī haha īyī.”

²⁴ Ū nkīma ng'wenūyo ūbyala ng'wana ngosha, būng'wilīka ī lina lyakwe Samsoni; ū nyanda ūkūla, nīyo ū SEEBA ūng'wīlūkīla no.

²⁵ Aho alī Mahane-dani, ipandī lya ha gatī ya Zola na Eshitaoli, ū Moyo o ng'wa SEEBA wandya kūng'oolekeja ī ya kwīta.