Bakolose 4 - Bibilia Ilagano Lya Kale 2015

¹ Na a bing'we basaabo būgonzo, ng'ūbīītīla a basese bing'we mihayo ya būtūngīlīja na ya longe. Managi gīkī ning'we mulī na Seeba ū ng'wigūlū.

² Bizagi bakomeezu ū mu kūlomba, nīyo ilang'hanagi gete ū mu mhayo gwenūyo, na mubize banhū ba kūlūmba.

³ Na a bise ng'ūtūlombela, ū Mulungu atūlugūlīle nyango tūgūlomeele ū mhayo gwa mbisīla ya ng'wa Kilisito, ūyo nalī ntungwa ī haha kūlwa nguno yago.

⁴ Nabize na būdūla bo kūgoolecha gīt'ūmo īnigeleelilwe kūgūhaya.

⁵ Bizagi bitegeleja ū mu kashimīzīle king'we ū kū banhū abo balī hanze ya kūzunya; nī likanza ng'ūlītūmamīla chiza.

⁶ Būl'ikanza bizagi na shigongo ū mu kalūngalūngīle king'we, kabize kasandūku gītī kasanjiwe munhu, mumane ūmo īng'wigeleelilwe kūnshokeja būlī munhū.

⁷ Ī mihayo yane pyī ī yose akūmumanīkīja ndūgū ntogwa Tikiko, ū ng'wenūyo nang'hwe ntūmami ng'wishigwa; nīyo hangī nsese ng'wichane ū mulī Seeba.

⁸ Nalīntūma ū kū bing'we kūlwa nguno ya mhayo gwenūyū, gīkī mumane ūmo tūkūjīlaga, mulūngūjiwe ū mung'holò jing'we.

⁹ Balī na ndūgū Onesimo, munhū ng'wishigwa. Ū ng'wene alī ūmò wing'we; hūna lūūlū a benabo bakūmumanīkīja pyī ī ya kūūnū.

¹⁰ Ū ntungwa ng'wichane ū Aristako alīmugīsha, nū Maliko ū ng'wifwa wa ng'wa Barinaba (ū ng'wene ng'walanjiwe ī ya kūng'wītīla; ng'wanukūlagi ūlū alize ko).

¹¹ Nū Yesu, ūyo akitanagwa Yusto, alīmugīsha. A batūmami bichane ū mu nīmo gwa būtemi wa ng'wa Mulungu balī benaba dūhū a Bayudaya; nīyo h'abo baabizile balūngūja bane bataale.

¹² Alīmugīsha nū Epafra ū nsese o ng'wa Kilisito Yesu, nang'hwe ū ng'wenūyo alī ūmò wing'we. Akūmulombelaga gwa na būkomeezu no no no, gīkī ng'wīmīīle mu būshikanu, hangī muyitegelegije īyo Mulungu ayītogilwe.

¹³ Nguno nalīnkaanīla gīkī akūtūmamaga na būkalalwa būtaale no kūlwa nguno ying'we, hamò na a bana Lodikea, na a bana Hierapoli.

¹⁴ Nū ntogwa Luka, ū mfumu, nang'hwe hamò na Dema; nabo balīmugīsha.

¹⁵ Bagīshagi a badūgū ba Lodikea; nū Nimfa, hamò nī kanisa īyo īlī mu kaya yakwe ū nshīke ng'wenūyo.

¹⁶ Ūlū mulamale ū kūsomelwa ī nyalūba yenīyī, ītwalagi Lodikea īkasong'we nū kū kanisa ya kwene; na a bing'we musomelwe ī ya Lodikea.

¹⁷ Ū Arikipo ng'wīlagi akalagane ū kūgūshikīlīja ū nīmo ūyo wagwanukūla kūfuma kūlī Seeba.

¹⁸ Ū būgīsha ūbū nawandīka nene Paulo na nkono gwane; ng'ūnizūkwa ū mu būtungwa bone. Shigongo shibize hamò ning'we. Alichene.