Bakolose 2 - Bibilia Ilagano Lya Kale 2015

¹ Hūna lūūlū, natogilwe mubūmane ūmo būlī ū būdito bo nīmo gwane ūyo nalī nago kūlwa nguno ying'we, hamò na a bana Lodikea, pye na a bangī abo bataalī kūnibona būshū bone.

² Nalī na ng'hūmbū balūngūjiwe ū mu ng'holò jabo, hangī babize na būsangī ū mu būtogwa, nū mu būsabi ū bose ūbo balī nabo kūlwa kūbūmana mu ng'hana ū witegeleja, nū mu kūmana mu būshikanu bose ū Kilisito, ūyo alī mbisīla ya ng'wa Mulungu.

³ Ū mulī ng'wenūyo h'ūmo būbisilwe pyī ū wibīkīja bo masala nū witegeleja.

⁴ Nalīmuwīla ū mhayo gwenūyū nguno natatogilwe ilonge munhū wa kūmulemba lemba mu kalūngalūngīle ka kūmuduta.

⁵ Nguno nūūlū īkī natī hamò ning'we ū mu mīlī, alīyo ū mu moyo nalī hamò ning'we; nīyo nalī na būyegi ū kūbūbona ū būgaliili bo kalongeje king'we, nū kūhandatīla kwing'we ū mu kūnzunya ū Kilisito.

Būshikanu bose bo ng'wa Kilisito

⁶ Hūna lūūlū ūmo mukang'wanukūlīla ū Kilisito Yesu Seeba, shimīzagi mulī we gīko.

⁷ Komagi miji ū mulī we, ng'wizenge na mujaame ū mu kūzunya gīt'ūmo mulangīlilwe; ng'ongeje kūkūla ū mu mhayo gwa kūlūmba.

⁸ Ilang'hanagi atizilonga wa kūmujananīja kūlwa malange ga nyasala sala, na mihayo midūhū ya nyalomolomo, ya kūlondeela nhūngwa ja mu sī na mihayo ya kūlekwa bakūlūgenji, īyo ītī mu kahelele ka ng'wa Kilisito.

⁹ Nguno pyī ū būshikanu bo ng'wa Mulungu būlī mulī we mu suso ya mīlī.

¹⁰ Na a bing'we mushikanyiwe ū mulī we ū ng'wenūyo, ūyo alī Ntwe gwa būsugi na būdūla bose.

¹¹ Na hangī ū mulī we musaalilwe mu būsaalwa ūbo būtī bo kūbeejiwa na makono mu nzīla ya kwīnja ikoba lya mīlī; alīyo musaalilwe būsaalwa bo ng'wa Kilisito.

¹² Ū mu kūbatījiwa mukajīkwa hamò nang'hwe, na hangī kūlwa kūbiza ū mulī we, mujūūchiwe hamò nang'hwe kūlwa nguno ya kūbūzunya ū būdūla bo ng'wa Mulungu ūyo akanjūūcha kūfuma mu bafu.

¹³ Na ng'hana ng'walī bafu kūlwa būkenaagūji, na būtūsaalwa ū mu nhūngwa jing'we ī ja mīlī; alīyo akang'wīta kūbiza bapanga hamò nang'hwe, ūmulekeja pyī ū būkenaagūji wing'we.

¹⁴ Wabūjimangūcha ū būbūūlwa wise ūbo walī wandīkilwe mu shilagīlo īsho shalī shitūchaamile; ūbūbūūcha ūwīnja ūūkabūkomeela ha nsalaba.

¹⁵ Mabūsugi na mabūtaale ūgazuuja magaka, ūgagwesa kūja ha nsalaba, akūboolechaga ū būtindi bokwe kū bose, ūgapyenela henaho, ūgaleka galī buyīkī gitendegesaga!

¹⁶ Hūna lūūlū mutizūnzunīlīja ose ose ūyo akūmulamulaga kūlwa nguno ya shilīwa nūūlū shakūng'wa, nūūlū mihayo ya kūkūja shikū ndebe, nūūlū makanza ga ng'weji mpya, nūūlū sabato.

¹⁷ Ī mihayo yenīyo īlī nengeeji dūhū gwa mihayo īyo īliza; alīyo ū gwa ng'hana ng'wene Kilisito.

¹⁸ Mutizūnzunīlīja ose ose ūyo akūmudalahaga, kūnū ūng'wenhela mihayo ya wibembu bo higūlya gūlya, na ya kūbalamya bamalaika ūmo abonelile wei ng'wenekīlī. Ū ng'wenūyo adooshiwe maganiko ga mīlī gokwe dūhū, lekanagi nang'hwe nguno alī dalali; atizūng'wenheleja kūjimīīja mheela ying'we.

¹⁹ Atadimanile nago ū Ntwe, ūyo pyī ū mīlī gūdimanyiwe hamò kūlwa nguno yago, mu nzīla ya nge na matimba; nose gūkūlishiagwa gīkī gūkūle mu kakūlīle ka kūfuma kūlī Mulungu.

²⁰ Ī gīsī ūlū muchile hamò na Kilisito ū kū mihayo ya mu sī, numho mulī na nguno kī hangī ū kūbiza gītī mulī banhū ba mu sī, nose mukwikalaga musugilwe na shilagīlo sha mu sī; gīkī,

²¹ “Ūtizūkuumya, ūtizūloja, ūtizūdima?”

²² Ī yenīyo ūlū yūlinda yūtūmama īkamalaga ū nīmo, nguno ū ng'wihando gwayo gūlī ha malange ga banhū.

²³ Na ng'hana ī chene ī yoi īkilongaga gītī mitengeke, ūlū munhū atogilwe kwihedeka wei ng'wenekīlī mu mbika ndebe ya kalamīje, nūūlū mu wibembu bo higūlya gūlya, nūūlū mu mhayo gwa kwiluhya mīlī; gwike ī yoi ītī na būdūla bose bose bo kūhangīja kwikūmva kwa mīlī.