Bakolose 1 - Bibilia Ilagano Lya Kale 2015

¹ Nene Paulo ntūng'wa wa ng'wa Kilisito Yesu kūlwa būtogwa bo ng'wa Mulungu, hamò na ndūgū Timotheo.

² Kū badūgū beela na batogwa mulī Kilisito, abo balī Kolose. Shigongo na mhola shibize hamò ning'we kūfuma kūlī Mulungu Sīswe.

³ Tūkūnūmbaga ū Mulungu, ū Ise wa ng'wa Seeba wise Yesu Kilisito, būlī gwa ūlū tūkūmulombelaga.

⁴ Nguno twajiigwile ī mhola ja kūzunya kwing'we ū mulī Kilisito Yesu, nū būtogwa ūbo mulī nabo ū kū beela pye a bose.

⁵ Ū yose yenīyo mulī nayo kūlwa wisagījiwa ūbo mubīkīlilwe ng'wigūlū, na ng'wamalile kūwigwa mu mhayo gwa ng'hana; ī Ng'hūlū Jawiza,

⁶ Ījo jamupandīkile, na jikūjaga jūtwaja matwajo na kongeja kwigalīhīja hose pyī ū mu sī, gīt'ūmo jikwītīlaga nū mu bing'we, kwandīja lūshikū ūlo mukajiigwīla, nī shigongo sha ng'wa Mulungu ng'ūshimana mu ng'hana.

⁷ H'ūmo akamulangīla nū ntogwa Epafra, ū ntūmami ng'wichiswi mulī Kilisito kūlwa nguno ying'we.

⁸ Ū ng'wenūyo hū ng'wene watoolekegije ū būtogwa wing'we ūbo mulī nabo ū mulī Moyo.

⁹ H'ī nguno yene na a bise tūtaalī ū koya ū kūmulombela kūfuma lūshikū ūlo tūkandīja kūjiigwa ī mhola jing'we. Tūkūnombaga ū Mulungu ang'okaje būmani būshikanu ū mu yose īyo ayītogilwe, ng'wīmane mu masala gose na witegeleja wa mu moyo.

¹⁰ Mudūle kūshimīza gīt'ūmo īng'wigeleelilwe kū būtongi bo ng'wa Seeba, munyeje mu yose, mubize na matwajo mu būlī nīmo gwawiza; hangī mukūle ū mu kūmana ū Mulungu.

¹¹ Nīyo ū Mulungu amuguzuhye mu būdūla bose, gīt'ūmo jilī ī nguzu j'ikūjo lyakwe, mu būshisha ng'holò bose, na wiyūmīlīja, hamò na būyegi.

¹² Mubize banhū ba kūnūmba ū Sīswe, ūyo wang'winhile kwigeleelwa kūbiza na ngabo ū mu wingīji wa beela abo balī ng'wisana.

¹³ Nguno hū ng'wene ūyo wamala kūtūkomoola kūfuma mu nguzu ja giiti, ūtūtūūla mu būsugi wa Ng'wana wakwe Ntogwa,

¹⁴ ūyo mulī we tūlī na būkomoolwa; hū būlekejiwa wa shibi shise.

Butale wa ng'wa Kilisito

¹⁵ Ū ng'wenūyo hū ng'wene ūyo alī suso ya ng'wa Mulungu ūyo atabonagwa, Myalwa wa kwandya, ūyo alī higūlya ya shisumva.

¹⁶ Pye ī shose shiseemilwe mulī we ū ng'wenūyo, īsho shilī ng'wigūlū nī shisho shilī mu sī, īsho shikabonagwa nī shisho shitūdūla kūbonwa, gabize masumbī g'ikūjo, nūūlū mabūtaale, nūūlū mabūsugi, nūūlū mabūdūla; pyī ī shose shiseemilwe mu nzīla yakwe na kūlwa nguno yakwe.

¹⁷ Walīho kūfuma na a haho ī shose shitaalī kūbiza ho; hangī nīyo pyī ī shikolo shisangījiwe mulī we.

¹⁸ Ū wei alī Ntwe gwa mīlī, h'ī kanisa. Alī wandījo, Myalwa wa kwandya, ūyo akajūūka kūfuma mu bafu, gīkī abize ntaale mu shose.

¹⁹ Nguno gūkanyeja ū Mulungu gwa gīkī, ū būshikanu bokwe ū bose wikale mulī we ū Ng'wana.

²⁰ Na gīkī ū mulī we, ū Mulungu ashisangīje kūlī wei ng'wenekīlī pyī ī shose, īsho shilī ng'wigūlū, nī shisho shilī mu sī. Ūbeeja mhola mu nzīla ya mininga gakwe ayo gakidīka ha nsalaba gokwe.

²¹ A bing'we ī kale ng'walī babisa, ng'walī banishi ū mu maganiko ging'we kūlwa nguno ya shītwa shing'we shabūbi!

²² Alīyo ī haha ng'wamalile kūsangījiwa mu mīlī gwakwe kūlwa kūcha kwakwe, hama ng'wejiwe gīkī mubize mutī na shilingo, banhū abo batīko kūsolwa būbi kū būtongi bokwe.

²³ Gwike ikalagi mo ū mu kūzunya muhandatīle na būkomeezu, yaya ū kwīnjiwa a ha wisagījiwa ūbo ng'wawigwile mu Ng'hūlū Jawiza. Ī Ng'hūlū Jawiza jenīji jikūlomeelagwa hose pye ū kū shiseeng'wa īsho shilī ha sīlīlī y'igūlū; mhayo ūyo nene Paulo nalī ntūmami kūlwa nguno yago.

²⁴ Ī haha nalī na būyegi ū mu būluhiwa ūbo būkūnigwīlaga kūlwa nguno ying'we; īkī ū mu mīlī gwane nakwīshikīlījaga īyo īsaagīīlile ū mu būluhiwa bo ng'wa Kilisito kūlwa nguno ya mīlī gokwe, h'ī kanisa.

²⁵ Ū nene nakatūūlwa ha nīmo gwa būtūmami kūlwa nguno ya kanisa, hū gwene ū nīmo ūyo waninha ū Mulungu kūlwa nguno ying'we; gīkī namushikīlīgīje ū mhayo gokwe.

²⁶ Ū mhayo gwenūyū īlī mbisīla īyo yalī ībisilwe ū kū shiseeng'wa a makanza a ga kale. Alīyo ī haha waboolekegije a beela bakwe.

²⁷ A benabo ū Mulungu atogilwe booleche ū kū mahanga ūmo būlī ū būsabi w'ikūjo lya mbisīla yenīyī, hū Kilisito ūyo alī mu bing'we, ūyo alī kwisagīlwa kw'ikūjo.

²⁸ A bise hū tūkūmulomeelaga ng'hūlū jakwe ū ng'wenūyo; nīyo tūkūng'hūgūlaga būlī munhū na kūnanga mu witegeleja bose, gīkī būlī ng'wene ajaame ū mulī Kilisito, tūdūle kūnshisha kū būtongi bo ng'wa Mulungu.

²⁹ H'ī nguno yene nakūtūmamaga milīmo midito gīt'ūmo būlī ū būdūla bokwe ūbo būkūtūmamaga mulī nene.