Bahebrania 9 - Bibilia Ilagano Lya Kale 2015

Kalamīje ka ng'wiheema lya mu sī

¹ Ali lūūlū, nī lilagane ī lya kwandya lyalī nayo ī milonjo ya kalamīje ū mu sī; lyalī nalyo nī lipandī ī lyeela.

² Nguno ī liheema īlo līkabeejiwa lyalī na mapandī abīlī, ī lipandī ī lya kwandya litanagwa lyeela. Ū ng'wenūmo yikalaga mo tala na meza, na migatī ya kūtūūlwa kū būtongi bo ng'wa Mulungu.

³ Alīyo ī lipandī ī lya kabīlī, ū kū mpīndo y'isenge, ī lyene litanagwa lyeela no no no.

⁴ Ū ng'wipandī lyenīlo gwalīmo ng'walīlo gwa zahabu, lyalīmo n'isandīko ly'ilagane līnaagīlilwe zahabu kose kose. Ū ng'wisandīko lyenīlo yalīmo shinje ya zahabu yokalile mana, gwalīmo na nang'ha gūfulumile, gwa ng'wa Alooni, gaalīmo na mabalala ga mawe ayo gaalī gandīkilwe ī lilagane.

⁵ A higūlya y'isandīko gaalīho makelubi g'ikūjo, galīfīkīgije ī Lisumbī lya shigongo. Gwike ī haha tūtūdūla ū kūmuwīla pyī ī mihayo yenīyo gūmò gūmò.

⁶ Aho shamalīīla ū kūbeejiwa ī shikolo ī shose īshi, a bagabīji bakayingīla gwa gwa gwa ū ng'wiheema kūja kūshikīlīja milonjo ya būtūmami wabo, ū ng'wipandī ī lya kwandya.

⁷ Alīyo ū ng'wipandī ī lya kabīlī, ū ng'wene wingīlaga Ngabīji Ntaale iyene, nīyo kamò dūhū ū mu ng'waka; hama walī atingīlaga ūlū atī na mininga ga kūfunya kūlwa nguno ya būhūbi bokwe nū wa banhū, ū bo kwītwa mu būtūmana.

⁸ Ū mu gīko ū Moyo Ng'wela oolechaga gīkī, ī nzīla ya kwingīla ng'wipandī lyeela no no no yalī ītaalī ū kwigela; aho lyalī lītaalī lyīmīīlile ī liheema lya kwandya,

⁹ Īlo līlī shigemelo sh'ikanza lya haha. Ū ng'wenūmo shafunyiagwa shakwinha na shitambo īsho shitadūgije kūshikanya wiyangūji bo namya.

¹⁰ Nguno ī yenīyo īlī mihayo ya malange ga mu mīlī dūhū; īlī mihayo ya shilīwa na shakūng'wa, na mbika jingī na jingī ja kūkooba wela. Ī mihayo yenīyo yalī yigelile ībize gīko, kūshisha līshike ī likanza lya mihayo kwītwa kūbiza mipya.

Mininga ga ng'wa Kilisito

¹¹ Alīyo ū Kilisito akiza kūbiza Ngabīji Ntaale wa mihayo yawiza īyo īlīho, wingīla ng'wiheema itaale na lyawiza kūtinda, īlo lītī lya kūbeejiwa na makono; nīyo lītabeejiwe kwīngīīla mu shiseeng'wa sha mu sī.

¹² Nīyo hangī ū wei atingīlile na mininga ga mbūli nūūlū ga ndama, alīyo na mininga gakwe we ng'wenekīlī. Aho wamala kūpandīka būkomooji butashilaga, wingīla lūkangala lūmò lwenūlo dūhū ū ng'wipandī ī lyeela no no no.

¹³ Nguno abo batī beela ūlū baseeseebelwa mininga ga mbūli na ga nzagamba, na mabu ga ndogoosa, bakeelaga babiza batī na shilingo ū mu mīlī.

¹⁴ Hū kūhaya a mininga ga ng'wa Kilisito ūyo atī na shilingo, ūyo akifunya wei ng'wenekīlī kūlī Mulungu mulī Moyo wa welelo bose, a gene gadūgije kūweja na kūtinda ho ū wiyangūji bo mung'holò jise twīnge ū mu milīmo īyo īchile, tūbize batūmami ba ng'wa Mulungu mpanga!

Nsangīja wawiza kūtinda

¹⁵ Hūna lūūlū, ū ng'wene alī Ntūūji w'ilagane ipya, gīkī a bitanwa banukūle ū wisagījiwa kūlwa wingīji butashilaga; nguno akacha kūlwa kūbakomoola kūfuma ū mu būhūbi ūbo walī wītwa ng'wikanza ly'ilagane lya kwandya.

¹⁶ Īmanīkile gīkī, aho līlīho ilagane kūlwa nguno ya wingīji, nū kūcha kwa ntūūji walyo shiigelile koolechiwe.

¹⁷ Nguno ī lilagane lya wingīji līkabizaga na nguzu ūlū lūfu lwigela; alīyo ūlū ataalī mpanga ū ntūūji walyo lītabizaga na nguzu.

¹⁸ H'ī nguno yene nī lilagane lya kwandya lītatūūlilwe dūhū mu būtidīka mininga.

¹⁹ Nguno ū Musa aho wamala kūbawīla a banhū pyī ī shilagīlo ūmo gahayīlile a malange, akasola mininga ga ndama na ga mbūli, hamò na minzī; ūsola na booya wa ng'holo yaza, n'itambī lya ntī gwa husopo, ūshiseeseebela ī shitabo, na a banhū.

²⁰ Ūhaya gīkī, “A genaya galī mininga g'ilagane lya ng'wa Mulungu īlo wang'winhaga.”

²¹ Nī liheema akalīseeseebela, pyī nī shiseme ī sha kūtūmamīla mu myatīla ya būlamya.

²² Na hangī ū mu shilagīlo hihī būlī shikolo shikeejiagwa na mininga, nīyo ūlū mininga gatidīkile būtīho būlekejiwa!

Kwifunya kwa ng'wa Kilisito

²³ Hūna lūūlū, ī shiikolanījo sha shikolo sha ng'wigūlū shalī shiigeleelilwe kwejiwa na shitambo shenīsho, alīyo ī shikolo sha ng'wigūlū shenekīlī, shilī sha kwejiwa na shitambo shawiza kūtinda shenīsho.

²⁴ Nguno ū Kilisito atingīlile ng'wiheema lyeela lya kūbeejiwa na makono, ipandī īlo līlī shiikolanījo dūhū ū kū shikolo ī sha ng'hana. Alī ng'wigūlū henekīlī, ī haha alī kū būtongi bo ng'wa Mulungu kūlwa nguno yise.

²⁵ Na hangī ītī gīkī ikale akwifunyaga ng'hangala na ng'hangala gīt'ūmo Ngabīji Ntaale akingīlaga ng'wipandī lyeela no no no būlī ng'waka, nīyo na mininga ayo gatī gakwe.

²⁶ Nguno ūlū ni chene, numho ū Kilisito ni yang'wigeleela kūluhiwa ng'hangala ningī ū kūfuma a ha kūseeng'wa kwa sī; alīyo ū wei akilonga aho lyang'wa ī likanza. Ī haha wamalile kwingīla lūkangala lūmò lwenūlo dūhū, kūlwa kwīnja shibi mu nzīla ya kwifunya wei ng'wenekīlī kūbiza shitambo.

²⁷ Hūna lūūlū, ūmo banhū bahelelilwe icha kamò dūhū, hūna a ha numa ya henaho būlamulwa,

²⁸ h'ūmo nū Kilisito wamala kūfunyiwa kamò dūhū gīko, kūlwa kwīnja shibi sha bingī. Ū lūkangala lwa kabīlī akwilonga, ītī kūlwa nguno ya shibi; alīyo kūlwa kūbenhela būpīji abo banindīīlile we.