Bahebrania 5 - Bibilia Ilagano Lya Kale 2015

¹ Nguno būlī ngabīji ntaale akasolagwa kūfuma mu banhū kūlwa nīmo go ng'wa Mulungu, gīkī īme ha ng'wanya gwabo, abize mfunya wa shakwinha na shitambo kūlwa nguno ya shibi.

² Ū wei adūgije kwiyūmīlīja nabo abo batamanile, na a babo bajimīīlile, nguno nū wei alī na būgokolo.

³ H'ī nguno yene shing'wigelile nang'hwe kūfunya shitambo kūlwa shibi shakwe, gīt'ūmo akafunījaga kūlwa nguno ya banhū bangī.

⁴ Na atīho ūyo akisolelaga ikūjo lyakwe wei ng'wenekīlī ūlū atitanilwe na Mulungu, ūmo akitanīlwa ū Alooni.

⁵ H'ī nguno yene nū Kilisito atigūngūhije wei ng'wenekīlī, kwitūūla kūbiza Ngabīji Ntaale; alīyo akatūūlwa nū yūyo akang'wīla gīkī, “Ū bebe ūlī Ng'wana wane, Ī lelo naakūbyalaga.”

⁶ Na ng'wipandī līngī alīng'wīla gīkī, “Ū bebe ūlī Ngabīji wa welelo bose mu mbika ya būgabīji bo ng'wa Melikizedeki.”

⁷ Ū mu shikū ja kikalīle kakwe mu mīlī, ū Kilisito walombaga mu kwifunya kūtaale na kūlīla shisoji, akūng'wikūmbīlījaga ūyo adūgije kūmpīja kūfuma mu kūcha; na ng'hana akigwiwa kūlwa logohano lokwe.

⁸ Nīyo nūūlū īkī alī Ng'wana, nahene akilanga wigwi kwīngīīla mu mihayo īyo akaluhiwa.

⁹ Hūna lūūlū aho washikanyiwa, ūbiza ng'winhi wa būpīji butashilaga ū kū bigwi.

¹⁰ Nguno asolilwe na Mulungu kūbiza Ngabīji Ntaale mu mbika ya būgabīji bo ng'wa Melikizedeki.

Būhūgūji kūlwa būhūbi

¹¹ Tūlī nayo mingī ī ya kūmuwīla kūlwa nguno yakwe ū ng'wenūyo, gwike īkī mulī badīzu ū kwitegeleja, īlī shilambu ū kwīsomboola.

¹² Nguno ū kūlenganīla nī likanza īlo lyabītile, a bing'we ni mulī balangi ī haha. Alīyo mutaalī dūhū mugongile munhū wa kūmulanga hangī ī mihayo ya kwandya, ū mu malange ga kwandya a ga mhayo gwa ng'wa Mulungu! Hū kūhaya mutaalī ng'wigeleelilwe mabeele, ītī shilīwa shitimbu yaya.

¹³ Nguno būlī ng'wene ūyo akang'waga mabeele ataalī ng'weleele, ataalī ū kūgūmanīīla ū mhayo gwa būtūngīlīja.

¹⁴ Alīyo ī shilīwa ī shitimbu, ī shene shilī sha banhū bataale, abo bilanga kūfuma mu nzīla ya kūbona mingī; a masala gabo gūmana ū kwīkomanya ī yabūbi nī yawiza.