Bahebrania 13 - Bibilia Ilagano Lya Kale 2015

Būtūmami būsoga kūlī Mulungu

¹ Ū witogwi bo nyadūgū ni būlamage.

² Yaya ū kūgwība ū mhayo go wiza ng'holò ū kū bageni, nguno bangī babīta na kūchumbeela bamalaika mu būtūmana.

³ Ng'ūbizūkwa a batungwa, ning'we mubize gītī mulī batungwa bichabo, na a babo bakūluhiagwa; mubize gītī mulī hamò nabo ū mu būluhi bo mu mīlī.

⁴ Ū mhayo gwa nhoola shiigelile gūkūjiwe na banhū bose, nū būlīīlī bo batooleke yaya ū kūsosohajiwa, nguno ū Mulungu akūbinha nsango pye a bajingi na a bashihani.

⁵ Na hangī yaya ū kwikala mukūhahaalīlaga sabo ū mu būpanga wing'we, ni shing'wigelagwe īsho mulī nasho. Nguno alīhaya gīkī, “Natīko kūkūleka nūūlū kūkwība na hado yaya.”

⁶ Nose tūkūhayaga na būgimu gīkī, “Ū Seeba alī ngunanhi wane, hūna lūūlū natī na sha kogoha, ū munhū akūnīītīla mhayo kī?”

⁷ Ng'ūbizūkwa a batongeeji bing'we abo bakūmulangaga mhayo go ng'wa Mulungu, hama ng'ūgalola a matwajo ga nhūngwa jabo, nū kūzunya kwabo ng'ūkūlondeela.

⁸ Ū Yesu Kilisito ataalī kūgalūka; ūmo walī igolo h'ūmo alī nī lelo, kūshisha shiku jose.

⁹ Yaya ū kūjananījiwa na malange mageni ga būlī mbika, nguno īlī yawiza īng'holò jiyūguzuhiwa mu nzīla ya shigongo, ītī mu nzīla ya shilīwa; ī shoi shitīko kūbagunanha mhayo gose gose abo bakashikoya koyelaga.

¹⁰ Tūlī na ng'walīlo ūyo batazunīlījiwe kūlīīla ho abo bakatūmamaga ng'wiheema.

¹¹ A mininga ga mitugo ījo jikasīnzagwa, Ngabīji Ntaale akagatwalaga ng'wipandī lyeela no no no, kūlwa nguno ya shibi. Alīyo ī mibimba ī yene īkatwalagwa hanze ya ng'hambī yakapemva.

¹² H'ī nguno yene nū Yesu akajūluhījiwa hanze ya mita gwa nzengo, kūlwa nguno ya kūbinha wela a banhū bakwe mu nzīla ya mininga gakwe.

¹³ Hūna lūūlū, tūbūbūūchagi ū būsondagūlwa bokwe tūje ī hanze ya ng'hambī ūko alī.

¹⁴ Nguno ū ng'wenūmu tūtī na nzengo gwa kūlama; ūyo gūliza hū gwene ūyo tūkūgūkoobaga.

¹⁵ Ū mulī Yesu tūmfunījagi gwa ū Mulungu shitambo sha kūkumīlīja; h'a matwajo ga milomo īyo īkūlīkaanīlaga lina lyakwe.

¹⁶ Alīyo mutizība ū kwīta ī yawiza, nū kūtūmamīla mu būsangī ī shikolo. Nguno ī shitambo sha mbika yenīyo shinyegije ū Mulungu.

¹⁷ Ng'ūbigwa a batongeeji bing'we, hangī ng'widohya ū kūbo, nguno bakikalaga nzūgūlū matū, īkī shibigelile kūfunya būsombooji kūlwa būpanga wing'we. Īlī yawiza bagwīte ū nīmo gwenūyo mu būyegi, ītī mu kūzwangana; nguno numho mutūpandīka solobo.

¹⁸ Na a bise ng'ūtūlombela, tūmanile hape gīkī tūlī na wiyangūji wawiza ū mu myoyo yise, nīyo ī ng'hūmbū jise jilī gīkī tūshimīze kashimīzīle kawiza mu yose.

¹⁹ Nalīmulomba no no no mugwīte ū mhayo gwenūyū, nangūhe kwenhwa ūko mulī.

Mihayo ya kūmalīja na būgīsha waho

²⁰ Hūna lūūlū, ū Mulungu wa mhola ūyo kūlwa mininga g'ilagane lya shiku jose akang'wenha kūfuma mu bafu ū Seeba wise Yesu, ū Ndīīmi Ntaale wa ng'holo,

²¹ leki amushikanye mu būlī mhayo gwawiza, mudūle kūbeeja īyo yīnyegije; nū mu bise agwīte ūyo gūlīnyeja mulī Kilisito Yesu; ūyo ikūjo līlī lyakwe we, shikū jose ja shiku jose: Alichene.

²² Badūgū nalīng'wikūmbīlīja ng'wiyūmīlīje nago ū mhayo gwa būkomeleja wenūbū, ū mu mihayo migehu īyo nang'wandīkīla yenīyī.

²³ Managi gīkī ū ndūgū wise ū Timotheo walekelilwe, ūlū alangūhe ū kwiza, nakwiza nang'hwe ko, twize tūmubone.

²⁴ Bagīshagi pye a batongeeji bing'we, na a beela pye a bose; a bana Italia balīmugīsha.

²⁵ Shigongo shibize hamò ning'we bose: Alichene.