Bagalatia 2 - Bibilia Ilagano Lya Kale 2015

Paulo na batūng'wa bataale

¹ Aho yabīta myaka ikūmi n'īne nūja ko hangī ī Yelusalemu, nalī na Balinaba hamò na Tito.

² Nakaja ko kūlwa nguno nakakundūlīlwa ū mhayo gwenūyo, nūkibona nabo a batongeeji abo baalī bamanīkile. Nūhoya nabo balī boi dūhū. Nūboolekeja ī Ng'hūlū Jawiza ījo nakūjilomeelaga kū banhū ba mahanga, nguno naalī natatogilwe kūbiza hamo naatagambaga, nūūlū nakūtagambaga dalali dūhū.

³ Alīyo ū Tito ūyo naalī nang'hwe atahadīkilwe ū kūsaalwa nūūlū īkī walī Nyunani.

⁴ Gwike būkabiza ho wihalalīja, nguno gashinaga baalī benhwa badūgū ba nyalomolomo mu wiba wiba, kwiza kūbūdata ū wiyabī wise, ūbo tūlī nabo mulī Kilisito Yesu, gīkī batwingīje mu būsese.

⁵ Alīyo tūtabazunīlīgije nūūlū hado ū kūtūyebenganya, īkī twalī tūtogilwe ī ng'hana ya Ng'hūlū Jawiza yikale ho kūlwa nguno ying'we.

⁶ Hūna lūūlū abo bamanīkile gīkī bataale (ū nene natūlonja ūmo babizīle, nguno ū Mulungu atasolanhyaga banhū), abo bamanīkile gīkī bataale benabo, batanongelelegije mhayo gose gose.

⁷ Būgelela kūbona dūhū gīkī ū nene ninhwa Ng'hūlū Jawiza ja kūbatwalīla banhū ba mahanga, gīt'ūmo Petelo winhīlwa ja kūbatwalīla Bayudaya.

⁸ Nguno ūyo wang'winha ū Petelo nīmo kūlwa Bayudaya, hū ng'wene ūyo akaninha nū nene kūlwa banhū ba mahanga.

⁹ Hūna lūūlū a ba Yakobo nū Kefa nū Yohana, abo bamanīkile gīkī hū jene ī ng'hīngī, aho bawitegeleja ū būdūla ūbo ninhwa, būtwinha ū nene nū Balinaba nkono gwa būlyo kūlwa būsangī, gīkī a bise tūje ū kū mahanga, lelo a bene baje ū kū Bayudaya.

¹⁰ Gwike dūhū būtūlomba tūyūbizūkwa a bahabī; na ng'hana ū nīmo gwenūyo tūkabiza na būkalalwa būtaale ū kūgwīta.

Paulo kūng'hūgūla Kefa

¹¹ Alīyo ū Kefa akiza Antiokia, wahayūshika wīta mhayo ūyo gwalī gwigeleelilwe nsango; nūng'hūgūla hape hape kū būtongi bo banhū.

¹² Nguno a h'ikanza lya shilīwa walyaga nabo a banhū ba mahanga, alīyo bahayiza banhū balebe ba kūfuma kūlī Yakobo, ūbogoha a Bayudaya wikomanya, wisunda ha mhūjo!

¹³ Na Bayudaya bangī būtwalanījiwa nū wibeeleja bokwe; nose nū Balinaba ūjananījiwa ū mu wibeeleja wabo!

¹⁴ Aho nabona gīkī bafumīla hanze ya būtūngīlīja bo Ng'hūlū Jawiza, nūng'wīla ū Kefa kū būtongi wa bose; gīkī, “Ū bebe ūlū ūlī Nyudaya, alīyo ī nhūngwa jako jilī gītī ja banhū ba mahanga, jitī gītī ja Bayudaya, nibūlī ūlībahadīkīja a banhū ba mahanga kūlondeela nhūngwa ja Bayudaya?”

Būpīji kūlwa kūzunya

¹⁵ A bise abo tūlī Bayudaya mu shibyalīlwe, abo tūtī banhū ba mahanga, a ba shibi,

¹⁶ tūmanile gīkī ū munhū atīko kūbalīlwa būtūngīlīja kūlwa shītwa sha mu shilagīlo, ūlū ītī kūlwa kūnzunya Yesu Kilisito dūhū. H'ī nguno yene na a bise tūnzunije ū Kilisito Yesu, gīkī tūbalīlwe būtūngīlīja kūlwa kūnzunya Kilisito, ītī kūlwa shītwa sha mu shilagīlo. Nguno atīho nūūlū ūmò ūyo akūbalīlwa būtūngīlīja kūlwa shītwa sha mu shilagīlo.

¹⁷ Alīyo ūlū tūlī bakomeezu ba kūkooba kūbalīlwa būtūngīlīja kūlwa ng'wa Kilisito, hūna tūbiza tūlī ba shibi, angū, hū kūhaya gīkī ū Kilisito alī ntūmami wa kūgaliila shibi? Ūtī chene na hado yaya!

¹⁸ Gwike ūlū nandya kwīzenga hangī īyo naamala kwīsambagūla, nakwiyoolecha gīkī nalī ng'hūbi ū nene!

¹⁹ Alīyo ū nene nachile ū kū shilagīlo; shanibūlaga shoi, gīkī nabize mpanga kūlī Mulungu.

²⁰ Nakomilwe ha nsalaba hamò na Kilisito; hūna lūūlū ū nene ng'wenekīlī natī mpanga, alīyo Kilisito h'ūyo alī mpanga ū mulī nene. Hama ū būpanga ūbo nalī nabo ī haha ū mu mīlī gwane, nakūbūtūmamīlaga mu kūnsanya Ng'wana wa ng'wa Mulungu, ūyo akifunya wei ng'wenekīlī kūlwa nguno yane.

²¹ Ū nene natīko kūshisundīla ha mhūjo ī shigongo sha ng'wa Mulungu, nguno ū mhayo gwa kūbalīlwa būtūngīlīja ūlū gūbize gūlīho kūlwa shilagīlo, numho ū Kilisito akacha dalali!