Bagabīji 23 - Bibilia Ilagano Lya Kale 2015

Shilagīlo sha mbika ningī

¹ Ū SEEBA ūng'wīla ū Musa,

² “Lūngalūngaga nabo a Baisilaeli ūbawīle gīkī, ‘Īshi hū shene ī shigukulu shane īsho naamuhelelile; shilī shigukulu sha ng'wa SEEBA, īsho īng'wigeleelilwe mushikumūche gīkī shilī sha kwibilinga kwela.’”

Sabato

³ “Jilīho shikū itandatū ījo muzunīlīgije kūtūmama milīmo, alīyo ū lwa mpungatī, ū lwene Sabato ya kwifuula; lūlī lūshikū lwa kwibilinga kwela. Yaya kūtūmama nīmo gose gose būlī kwene ūko mukūbiza; nguno īlī Sabato ya ng'wa SEEBA.”

Pasaka na migatī ītī na shibimbya

⁴ “Shingī shiishi ī shigukulu sha ng'wa SEEBA īsho shihelilwe kūlwa kwibilinga kwela, būlī sheene mukūyūshikumūcha ng'wikanza lyasho.

⁵ Ī Pasaka ya ng'wa SEEBA īkandyaga mhīndī ya līīmi līlīīlibīla, mu lūshikū lw'ikūmi n'inè ng'weji gwa kwandya.

⁶ Ū mu lūshikū lw'ikūmi n'itanò ū mu ng'weji gwenūyo, shikandyaga ī shigukulu sha ng'wa SEEBA, ī sha migatī ītī na shibimbya. Ikanza lya shikū mpungatī mukūlya migatī ītī na shibimbya.

⁷ Ū mu lūshikū lwa kwandya ī shigukulu shenīsho, bizagi na kwibilinga kwela, hama yaya ū kwīta ī milīmo īyo mukīītaga na kale.

⁸ Ikanza lya shikū mpungatī mfunījagi ū SEEBA shitambò sha kūpemva mu moto. Hūna a ha lūshikū lwa mpungatī bizagi na kwibilinga kwela; nīyo hangī yaya ū kwīta ī milīmo īyo mukīītaga na kale.”

Matwajo ga kwandya

⁹ Ū SEEBA ūng'wīla hangī ū Musa,

¹⁰ Bawīlage a Baisilaeli gīkī, “Ūlū ng'wingīla ū mu sī īyo nalīng'winha, hūna ng'wandya kūpandīka shilīwa kūfuma muyo, mukūyenha kūlī ngabīji shigabbu sha shilīwa īsho mulayūgesa kwandya.

¹¹ Ī shigabbu shenīsho akūshiyengeeja ū ngabīji kū būtongi bo ng'wa SEEBA, gīkī ī shilīwa shanukūlwe kūlwa nguno ying'we; akūshiyengeeja ha lūshikū lwa gīkī Sabato yabītaga.

¹² Ū mu lūshikū lwa kūshiyengeeja ī shilīwa shenīsho, shiigelile ng'wenhe ng'holo ū kū būtongi bo ng'wa SEEBA; ībize ya ng'waka gūmò, nīyo ītī na būka, īfunyiwe kūbiza shitambò sha kūpemva.

¹³ Mukwīfunya hamò na shakwinha shayo sha būsu, kilo gītī ibīlī ja būsu būnogu būsangije maguta. Ī shenīsho shilī shakwinha kūlwa ng'wa SEEBA, sha kūpemva mu moto kūlwa ng'waso gwawiza; mukūfunya na shakwinha shaho sha kūng'wiwa, liita gītī īmò ya divai.

¹⁴ Yaya ū kūlya ī shilīwa ī shipya mu nzīla yose yose gītī ya kūbeeja ngatī, nūūlū kūshilya shitaalī shidoto, nūūlū kūshihelemba na kwanikīlīja, kūshisha lūshike ū lūshikū lwa kūshenha kūlī Mulungu wing'we. Ī shenīshi shilī shilagīlo sha kūshinga ho shikū jose, pyī ū mu shibyalīlwe shing'we īsho shiliza, hose hose ūko mukwikala.”

Shigukulu sha mifungo

¹⁵ “Kwandīja ū lūshikū lwa kūshenha mu shigabbu ī shakwinha sha kūyengeejiwa, ū lūshikū lwa gīkī Sabato yabītaga, mukūbala mifungo migima mpungatī;

¹⁶ hū kūhaya mukūbala shikū makūmi atanò kūshisha ū lūshikū lwa gīkī ī Sabato ya mpungatī yabītaga. Hūna mukūmfunīja ū SEEBA shakwinha sha matwajo mapya.

¹⁷ Hose hose ūko mukūbiza mukwikalaga, mukwenha ū kū būtongi bo ng'wa SEEBA shigabbu shibīlī sha migatī ya kūbeejiwa kūfuma mu kilo ibīlī ja būsu būnogu bsanjiwe na shibimbya. Ī migatī yenīyo mukwīfunya kūbiza shakwinha sha kūyengeejiwa sha matwajo ga kwandya.

¹⁸ Hamò nī migatī yenīyī, mukūfunya ng'holo mpungatī, ja ng'waka gūmò būlī yeene, hama jitī na būka; na nzagamba mūūga, hamò na ng'ondi ibīlī. Jikwenhwa kū būtongi bo ng'wa SEEBA kūbiza shitambò sha kūpemva, hamò nī shakwinha shaho ī sha būsu, nī sha kūng'wiwa. Pyī ī shenīshi shikūbiza shitambò sha kūpemva mu moto, kūlwa ng'waso gwawiza kūlī SEEBA.

¹⁹ Hanuma ya henaho mukūfunya ngulyati ya mbūli, ībize shitambò sha shibi; na ng'holo ibīlī ja shakwinha sha būsangī, būlī yeene ya ng'waka gūmò.

²⁰ Ū ngabīji akūjiyengeeja ī ng'holo būbīlī wajo kū būtongi bo ng'wa SEEBA, jifunyiwe kūbiza shakwinha sha kūyengeejiwa, hamò nī migatī ya matwajo ga kwandya. Ī shenīshi shilī shakwinha sheela kūlwa ng'wa SEEBA, nguno ya ngabīji.

²¹ Ū mu lūshikū lwenūlo itanagi kwibilinga kwela, yaya ū kwīta ī milīmo īyo mukīītaga na kale. Ī shenīshi shilī shilagīlo sha kūshinga ho shikū jose, pyī ū mu shibyalīlwe shing'we ī shose īsho shiliza, hose hose ūko mukwikala.

²² “Ūlū ng'ūgesa ī shilīwa ū mu migūnda ying'we, yaya ū kūpūmbīlīja kūshisha kū mbīmbī ja malaale ging'we, yaya nū kūshishokeela īsho shilīsaagīīla ū mu magesa ging'we. Ng'ūlekeela bayūsoleela nabo a bahabī na bageni. Ū nene nalī SEEBA Mulungu wing'we.”

Shigukulu sha kūfuula mhembe

²³ Ū SEEBA ūng'wīla hangī ū Musa,

²⁴ Bawīlage a Baisilaeli gīkī, “Ū lūshikū lwa kwandya lwa ng'weji gwa mpungatī, lūkūbiza lwing'we lwa kwifuula; lūshikū lwa kūfuula mhembe kūlwa kwiyizūkīja kwibilinga kwela.

²⁵ Yaya kwīta milīmo yose yose īyo mukīītaga na kale; alīyo mukūfunīja ū SEEBA shitambò sha kūpemva mu moto.”

Lūshikū lw'isangī

²⁶ Na hangī ū SEEBA ūng'wīla ū Musa gīkī,

²⁷ “Ū lūshikū lw'ikūmi lwa ng'weji gwa mpungatī gwenūyū, lūlī Lūshikū Lw'isangī. Mukūbiza na kwibilinga kwela, shiigelile kwilecha nī sha kūyeja mīlī; na kūmfunīja ū SEEBA shitambò sha kūpemva mu moto.

²⁸ Ū mu lūshikū lwenūlo yaya ū kwīta ī milīmo, nguno lūlī Lūshikū lw'isangī; lūshikū lwa kūbeejiwa isangī kūlwa nguno ying'we, kū būtongi bo ng'wa SEEBA, Mulungu wing'we.

²⁹ Ose ose ū wa kūleka kwilecha ī sha kūyeja mīlī, akūkomanyiwa wīnjiwe ū mu banhū bakwe.

³⁰ Ū wa kwīta nīmo gose gose ū mu lūshikū lwenūlo, nakūnkenaagūla wīnge gete ū mu banhū bakwe.

³¹ Ū mu lūshikū lwenūlo yaya gete kwīta nīmo nūūlū hado. Ī shenīshi shilī shilagīlo sha kūshinga ho shikū jose, pyī ū mu shibyalīlwe shing'we īsho shiliza, hose hose ūko mukwikala.

³² Īlī Sabato ying'we ya kwifuula; gwike shiigelile nū kwilecha ī sha kūyeja mīlī. Ī Sabato ying'we īkwandya līīmi līlīīlibīla ū mu lūshikū lwa kenda ū ng'weji gwenūyo, kūshisha tondo yaho līīmi līlīīlibīla.”

Shigukulu sha maduku

³³ Ū SEEBA ūng'wīla hangī ū Musa,

³⁴ Bawīlage a Baisilaeli gīkī, “Ū lūshikū lw'ikūmi n'itanò lwa ng'weji gwa mpungatī, lūkūbiza lwa kwandya shigukulu sha ng'wa SEEBA sha maduku; shikūshinga kūshisha ikanza lya shikū mpungatī.

³⁵ Ū lūshikū ūlo shikwandya lūkūbiza lwa kwibilinga kwela, yaya ū kwīta ī milīmo īyo mukīītaga na kale.

³⁶ Hūna līkūbīta ikanza lya shikū mpungatī mukūfunyaga kūlwa ng'wa SEEBA shitambò sha kūpemva mu moto; hama a ha lūshikū lwa kanaane mukūbiza na kwibilinga kwela hangī, ng'ūmfunīja hangī ū SEEBA shitambò sha kūpemva mu moto; ū lwenūlo lūlī lūshikū lwa kūmalīīja libilinga, yaya ū kwīta ī milīmo īyo mukīītaga na kale.

³⁷ “Ī shenīshi h'ī shigukulu sha ng'wa SEEBA īsho shihelilwe; īsho īng'wigeleelilwe mushikumūche gīkī shilī sha kwibilinga kwela, na kwenha shakwinha kūlwa ng'wa SEEBA, sha kūmfunīja mu nzīla ya moto; shakwinha gītī, shitambò sha kūpemva, shakwinha sha būsu, shitambò, na shakwinha sha kūng'wiwa. Būlī shene shikūfunyiwa mu lūshikū ūlo lūhelilwe kūlwa nguno yasho.

³⁸ Ī shakwinha shenīshi shikūyūfunyiwa ītī kūlwa gīkī shileke kūfunyiwa īsho shikafunyiagwa ha Sabato ja ng'wa SEEBA, nī shisho shikafunyiagwa būlī lūshikū, nī sha kūfunyiwa kūlwa kūshikīlīja mihayo īyo banhū baalahīla, nī shakwinha sha wiyaabī īsho shikenhagwa kū būtongi bo ng'wa SEEBA.

³⁹ “Na lūūlū ūlū ng'ūmala kūkuminga magesa kūfuma mu migūnda, ī likanza lya shigukulu sha ng'wa SEEBA līkūshika. Ī shoi shikūsola shikū mpungatī, kwandīja lūshikū lwa ikūmi n'itanò ū mu ng'weji gwa mpungatī. Ū lūshikū lwa kwandīja lūkūbiza lwa kwifuula, nū lwa kanaane nalo lwa kwifuula.

⁴⁰ Ū mu lūshikū lwa kwandīja mukūsolanhya matwajo ga kūfuma mu mitī misoga, ng'ūbbuta na matambī ga mitī ya būkīndū, na ga mitī ya madūūtū mingī, na ga magobeko kūfuma kū ng'hilimva ya mongo. Mukūmala shikū mpungatī mukūyegaga kū būtongi bo ng'wa SEEBA Mulungu wing'we.

⁴¹ Na lūūlū shidimagi ī shigukulu shenīshi; būlī ng'waka mukūshiyegela shikū mpungatī kū būtongi bo ng'wa SEEBA. Ī shenīshi shilī shilagīlo sha kūshinga ho shikū jose, pyī ū mu shibyalīlwe shing'we īsho shiliza; ī shigukulu shenīshi shikūbiza mu ng'weji gwa mpungatī.

⁴² Mukwikala mu maduku ikanza lya shikū mpungatī; pye a bana byalwa ba mu sī ya Isilaeli bakwikala ū mu maduku.

⁴³ Ū mu gīko, a banhū ba shibyalīlwe shing'we bakūdeeba gīkī, a Baisilaeli aho nalīībīnja mu sī ya Misili nakabikaja mu maduku. Ū nene nalī SEEBA Mulungu wing'we.

⁴⁴ Na lūūlū ū Musa ūbakumūkīja a Baisilaeli, ī shikū ja shigukulu sha ng'wa SEEBA ījo jalī jihelilwe.”